Айкеԯӑт - Новости

«Организация Объединённых Наций» мўвтєӆ мир тӑхи 2019-мит оӆ шуши мир ясңӑт оӆа альсӑӆэ. Тӑмхӑтӆ мўв ӆуваттыйн ӆапӑт щурӑс арсыр ясӑң вәӆ, кашӑң кӑт ӆапӑтмитн и ясӑң хуӆт вәшӆ. Шуши мир ясңӑт, щит 96 процента иса ясңӑт эвӑӆт, тәп няӆ процента мўвтєӆ мир хӑннєхуятӑт щи ясңӑтн путӑртӆӑт. ЮНЕСКО щирн 90 процента иса ясңӑт эвӑӆт вәшты щир тӑйӆӑт. 

Ай кєр тыӑщ 15-мит хӑтӑн Ёмвошн КТЦ «Югра-Классик» нєм тӑйты  хот йитн округев мәш ямӑты тӑхи вән кәщайт па тохтурӑт нємасыя ыв кўтэн вән мирхота ӑктӑщийсӑт па путрємӑсӑт, муй щирн тӑм  юхи хӑщум 2018-мит он рәпитсӑт па муйсӑр вєрӑт еы па нәмӑсӑт ищиты ямсыева па тўңщирӑңа эщӑтты. 

Тӑм оӆ вән кєр тыӆӑщ 22-мит хӑтӆӑн «Титул» нємпи шуши мирӑта нётты тӑхи кәща ёх мирхот вєрӆӑт. Щӑта путӑртӆӑт, хутыса 2018-мит оӆ мӑр рәпитсӑт, муй арат вух аршӑка йис, муй арат шимӆа йис. Щӑӆта Ревизионной комиссия па кәщайт совет ёх йиӆпа пириты питӆӑт. 

Мирхот Ёмвошн 12 щосн оӆңитӆы тӑм адрес хўват: Ёмвош, Карла Маркса вош хўлы, 15-мит хот. Шимӆ хуят ки юхӑтӆ, мирхот Ас нопӑтты тыӆӑщ 23-мит хӑтӆӑн йиӆпа вєрӆы. 

Ай кєр тыӑщ 4-митн «Дух огня» нємуп кинайт вантӑты тӑхи кәща Сергей Соловьёв па Ёмвош округ – Югра ух нє Наталья Комарова щи ут вәтща лӑп тәхӑрсӑңӑн. Щит мӑнум апӑт Мўвтє па российской дебют нємуп утңӑнӑн кашӑң хӑрн нив кина вантӑсы, «Дебют – короткий метр» нємуп утн нивхущъяң йиуп кина вәс. Щи тумпи «Твоё кино» нємуп кӑсупсы мӑнӑс, ай кинайт па хурӑң вєр вәс.

Тӑм оӆ тәнӆуп тыӆӑщ хәс оӆӑңмит хӑтӑӆн Ас-угорской институтн рәт ясӑң емӑңхӑтӑӆн «Фронтальный диктант на хантыйском, мансийском, ненецком языках» вєрыйӆсы. Арсыр тӑхетн мўвев ӆуватн хӑнты, вухаӆь па юрн ёхӆўв диктант хӑншсӑт.                   

Тӑта мосванӑн ай кєр тыӑщ 11-мит хӑтӑн Ёмвошн Югра мўвев правительства хот йитн округев, арсыр оса тӑхет па мўв ипи тащ кӑншты кәщайт нємасыя мирхот вєрсӑт. Щи мирхот мӑнум пурайн ыв ушӑңа-сащӑңа путрємӑсӑт, муй щирн Югра ӆуватн йипа вўюм мўвӑт-йиңкӑт авӑты «Экология» нємуп поступсы пиа еы рәпитты па муйсӑр вєрӑт щи унтасн ямсыева эщӑтты тӑмхӑт мос.

Югра мўв кәща нє мойупсы хоумты щира округев вўєң ёх кўтн V-мит кӑсупсы мӑнум пурайн «Югра ыңуптӑты» оса тӑхета ӆуӊум ёх мирхота  ӑктӑщийсӑт.

Юхи хӑщум оӑт иты оса тӑхев кӑт-хәум пўш тӑн па ўңӑн вәйтантыйӑт, ән кўтэн арсыр вєрӑт, нўшайт оӑңӑн путӑртты, ияха уша вєрты, муй щирн щитӑт тәса тўңматты рӑх па айке тәты, муйсӑр йилуп вєрӑт ыв кәртан, вошан тывӑт.

Ёмвош округевн социальной развития департамент ёх нєпек китсӑт, муйсӑр нётупсэт увӑс мир хуятӑт пӑта мўң округевн вәӆӆӑт. Щи нётупсы «О государственной программе Ханты-Мансийского автономного округа – Югры «Устойчивое развитие коренных малочисленных народов Севера» па «Социальное и демографическое развитие» поступсэңӑн щирн ӆэщӑтӆы.

1. Шимӆ тыӆӑщ вух вўты хуятӑт щимӑщ нётупсыйн вєрӆыйт:

– лекщитыйӆты тӑхи вәнты яңхты па юхӆы йиты пӑта и хӑннєхә 20 щурӑс шойт вух арат вәнты сухуптӑӆы;

– няврємӑт ӆәмӑтсухн ӆәтты пӑта:

Ай кєр тыӑщ Ёмвошн округ кәща нє Наталья Комарова ўв-сом омӑсты тохтурӑт пиа вәйтантыӑс.

Вәйтантупсы  пўншум пурайн кәща нєңев ям ясңӑт лупӑс па мух омӑсты операция вєрум тохтурӑта ишӑкты нєпекӑт мӑс. Щиты лупӑс: «Тӑм ванӑн тәнуп тыӑщн мўң леккарўв мєт оӑң пўш мәшӑң хуята мух омӑссӑт. Щи операция яма мӑнӑс. Округ пәьница тохтурӑта вән пәмащипа путӑртум. Мос лупты, хуты тәня сӑм хуща 5318 операция, ўв-сом омӑсты 1560 операция вєрсы. Щи тумпи юхи хӑщум хәум о мӑр вєрк омӑсты щира 30 операция вєрсы, щи эвӑт кӑт – тӑм о».

Ай кєр тыӑщ 13-мит хӑтӑн «Открытый регион – Югра» нємуп тӑхийн айке хӑншты ёх пиа Ёмвош негосударственной пенсионной фонд кәща нє Мария Стулова па экономической вєрӑт тәты департамент хуща рәпитты ими Анна Губанова вәйтантыйсӑңӑн.