2009-мит он Югра мўвн шуши мир кимит яң о эщӑтты пӑта нємасыя тӑхи вєрсы. Щи тӑхи кәщая вә Ёмвош округ губернатор. Яң о мӑра нєпек хӑншсы па нємасыя вєрӑт эщӑтсыйт.

Щиты кимит яң оӑтн увӑс мир пӑта 56 нормативной акт па 13 поступсы вўсы. Щит, шуши мирӑт вәты тӑхет, факторияйт, емӑң тӑхет, йис моньщӑт-арӑт оӑңӑн, 10 государственной целевой программа, округ правительства 29 поступсы. Щи утӑт кўтн шуши мирӑт пӑта хӑншум «Концепция устойчивого развития...»  нємпи поступсы па мосты вєрӑт щи поступсы эщӑтты пӑта. 

Округн 475 шуши мир вәты тӑхи вә, щит 13 миллион гектар мўв. Кәща ёх па мўв ипи тащ вўты хуятӑт увӑс мир пиа закон щирн путрємуман рәпитӑт. ыв кашащты нєпекӑт вўӑт, хута хӑншӑт, шуши мўвӑтн рәпитты пӑта муй арат вух компанияйт увӑс мира сухуптӑты питӑт, ән няврємӑт вәнтӑты, мир лекщитты па па вєрӑта. 

2013-мит о мӑр шуши хоттє ёх па нефтяникӑт кўтн 741 экономической соглашения нєпек хӑншсы, щит 247 шуши тӑхетн вәты 3173 хӑннєхә пӑта, ыв 1,5-кєм миллиард вухн сухуптӑсыйт. Хән ын кўтанӑн вўра вєрӑт тывӑт ки, щи пурайн нємасыя вєрум комиссия ёх щит нух вантӑт па мосты щирн щит эщӑтӑт. Хән ын комиссия пиа ӑн кашащӑт,  щи вєр сўт мухты тўңматы. Шуши мира щи пурайн ыв вєра вәнььты нємасыя хуят нёт. Округн поступсы вўсы, округ бюджет унтасн увӑс ёха щимӑщ вәнььты хуят вохты рӑх. 

Ёмвош округн па мўвӑт киньщи мєт ар мир вәнт шушийн вә. 

2007-мит он увӑс ёх община  35 тӑхи вәс, 2013-мит он – 92. 

Вўы ищи ара йис, 2004-мит он – 27 585 арат, 2013-мит он – 40 068 арат. 

Учёной ясңӑт щирн Югра мўвн тәп 46 620-кєм вўы тӑйты рӑх. 

Мўв-авӑт авӑты вєр – щит мєт вуаң вєр. Щит пӑта округн нємасыя нєпек вўсы, хута хӑншман, ән мўвӑт-автӑт нух вантты па хута мос щит ямӑты. Мўв ипи тащ вўты тӑхет пиа щи оӑңӑн нємасыя кашащты нєпекӑт хӑншман вәӑт.

Шуши мир ямӑты вєр ищи така нух вантман тӑйы. Округевн ар ай кәрт па мир вәнт шушийн вәты тӑхи вә. Щит пӑта кӑшаң хуят пәьницая тәты пӑта нємасыя тухӑң хопӑт эщӑтсыйт. 2013-мит он 1858 арат щимӑщ рейс вєрсы, щи пурайн 2427 кӑшаң хӑннєхә пәьницая тәсы. 559 вәнт шушийн вәты 2308 хуят леккарӑтн вантман тӑйыйт. Округевн тӑн машинайн, ўңӑн па тўтӑң хопн тохтўрӑт ай кәртӑта яңхӑт. Кашӑң о щиты мир ямӑты хуятӑт 40-45 ай кәртӑтн 12-кєм щурӑс хӑннєхә, ыв кўтэн 2,5-3 щурӑс, щит шуши ёх нух вантӑт. 

Щи вєрӑт унтасн округевн шуши мир кўтн ар няврєм сєма пит, шим хуят сурма йи. Щит унтасн шуши мир аршӑка йис, 2005-мит он 30 268 хуят вәс, 2013-мит он – 32 862 хуят. 

Па и вуаң вєр, щит шуши мир вәты хот тӑйты унтас. Яртъяң о мӑр 2005-2013-мит оӑтн 2408 шуши хоттє ёх вәты хотӑт ёша павӑтсӑт. Щи вєра округ бюджет эвӑт 4 миллиард вух тӑруптӑсы.

Ханты-Мансийской автономной округн няврємӑт нив этнокультурной вєра вәнтӑыйт. 2011-мит он округ правительства поступсыйн рәт ясӑң авӑты па нётты пӑта нємасыя Научно-координационной совет вєрсы. Тӑмхӑт рәт ясӑң пушхӑт вәнтӑӑт 9 садикн – 246-кєм няврєм па 26 ӑшколайн – 1736 хуят. 

22 ӑшколайн няврємӑт шуши мир йис вєрӑта вәнтӑыйт, 8 ӑшколайн нємасыя вепӑсӑты тӑхет эщӑтсыйт. 

Айат ёхн рәт ясӑң тәса вәнтӑты пӑта олимпиада па сыр-сыр кӑсупсэт вєрӑнтыйт. 2012-2013-мит оӑтн щимӑщ кӑсупсэтн 5-11 классӑтн вәнтыйты 228 няврєм кӑссӑт, 25 хуят нух питӑс.

2013-мит он 673 вәнтыйты айат ёх вух нётупсыйн мӑсыйт. Студентӑт вәнтӑты киникайт әтты пӑта 12 582 шойт вух ёша павӑтсӑт, әмӑтсух әтты вєра оӑңмит курсӑн вәнтыйты хуят пӑта – 40 щурӑс шойт, вәнтыйты тӑхи етшуптӑты ёха – 50 щурӑс шойт вух мӑсы. 

2011-2013-мит оӑтн юхи яңхты ӛша па общежитияйн вәты щира 2 166 хуят вух вўсӑт. 

Рәт ясӑң ӑн вәтшӑты пӑта округевн хӑнты па вухаь ясӑңӑн газетайт, теле- па радиопередачайт єтӑт. 

Шуши мир пӑта єтты «Хӑнты ясӑң» па «Луима сэрипос» газетайңӑн государства эвӑт нётупсы вух унтасн аршӑк мир ўңӑтты щир тӑйӑт. 2012-мит о вўш эвӑт щи нєпекңӑн йиуп хурас тӑйӑт: уваттэн айшака йисӑт, 16 арат лопӑс тӑйты питсӑт, 6 лопӑс хӑншӑң оюпӑн хӑншыйт. 2013-мит о вўш эвӑт шуши редакция ёх сайт вєрсӑт. Интӑм хӑннєхуятӑт хӑнты, вухаь па рўщ ясӑңӑн айкеӑт ўңӑтты щир тӑйӑт. Щи тумпи шуши ясӑңӑн ўв сӑттэа єтты хәум нєпек ищи вухн нётыйт. 

«Россия-1» телеканал хущи хӑнты па вухаь ясӑңңӑнӑн шуши мир оӑңӑн айкеӑт па кинайт вантӑыйт. «Югра» нємпи тӑхийн няврємӑт рәт ясӑңа вәнтӑыйт па йис вєрӑт оӑңӑн путӑрты. 

2014-мит о вўш эвӑт Югра мўвн арсыр поступсэт хӑнты па вухаь ясӑңӑна тулмӑщтӑты питсыйт. Интернет хущи мўвтє шуши мирӑт па хӑннєхә правайт оӑңӑн ООН Декларацияйңӑн шиваӑты рӑх. 

Ёмвош округ кәща нє унтасн шуши мир «Вурңа хӑт»  округ емӑңхӑта вєрсы. 

Югра мўвн шуши мир емӑң тӑхет авӑман тӑйты пӑта нєпека хӑншыйт. Тӑмхӑт 57 щимӑщ тӑхи нух хӑншман вә. 2013-мит он ня емӑң тӑхи нєпека хӑншсы, 2014-мит он – кӑт. 

Йис арӑт, якӑт шавиман хӑйты пӑта округн 7 районӑн нив увӑс мир культура тӑхи вә, яң районӑн – 38 якты-ариты тӑхи рәпит, 7 районӑн – няврємӑт пӑты 17 якты-ариты тӑхи. 

Яңкєм о юхы Ас-угорской мир «Хӑт» нємпи театр вєрсы, щимӑщ тӑхи Россия мўв уваттыйн тәп мўң округевн вә. 

Кашӑң о Ёмвош округ грант вухӑт хоумтты пӑта кӑсупсэт вєрӑнтыйт. Щи вухӑт шуши мир йис вєрӑт, культура па ясӑң нух аумты щира мӑнӑт. 

2012-мит о вўш эвӑт щимӑщ кӑсупсэт шуши няврємӑт рўтьщӑты тӑхет эщӑтты пӑта вєрӑнтыйт. И гранта 1 миллион шойт вух мӑн. Кӑт о мӑр щи вухӑт хоумтты пӑта 45 хуят нєпек хӑншсӑт, 24 хуят нух питсӑт. 

Шуши мир рәпатайн мӑты, щит ищи вуаң вєр. Щит пӑта ыв арсыр нётупсыйн эщӑтыйт, йиуп рәпата вєра вәнтӑыйт. 

Мєт ар вух мӑы «Социально-экономическое развитие коренных малочисленных народов Севера» вєр хўват. Щи тумпи вухӑт мӑыйт няврємӑт вәнтӑты, социальной, мир ямӑты, рәпата мӑты па па  вєрӑт хўват.

Вепӑсӑты, ай кәртӑтн, вәнт шушетн вәты пӑта, вәты хотӑт ёша павӑтты вєра 2005-2013-мит оӑтн округ бюджет эвӑт 6 147,5 миллион шойт вух тӑруптӑсы. Мос лупты, хуты тӑм вухӑта ӑн ўңӑт, машинайн яңхты ӛшӑт эщӑтты, єтутӑт, пурмӑсӑт тәты, карты ке хўват тўт мӑты  па па ар мосты вєрӑт. 

 

Хӑнты ясӑңа тулмӑщтӑс Надежда Вах