Ай Мощнєңие вәс, атэт йиңк авӑтн, атэт мўв авӑтн. Щи вәс, щи вәс, хўв вәс, муй ван вәс, ӑңкеӑн-ащеӑн хутӑщ йитан епийн карты веюп апӑт сӑрн хӑйса. Мосӑң, щӑха мӑтта хӑт шәкӑң хӑта йи, щи сӑранӑн щӑха нётайн. Щиты вәта кўтн, хўв вәс муй ван вәс, питы вой аке ики нурума щи ӑт. Ай Мощнєңие ким этӑ па шуваӑ: и муй щи уват вевн рохсємуман па. Мӑттырн, питы вой аке ики нурум әхтыя атма, омӑс па лупӑ:

– Атэт кәртӑң Ай Мощнєңие, нӑңен вәртаты ма юхӑтсум. 

Ин Мощнєңие лупӑ юхы пєа:

– Я па, йивӑп-асӑп, па щохтыйн ма па тухӑң воя мӑнум. Тухӑң воя хән мӑнум, хӑнты хутты-мӑтты мўв суңӑн а па вә. Муйсӑр муй, тухлӑң воя мӑнум?

– Ма хущєма ӑнт йиӑн ки, ма вән Тәрум ащєма пойкщӑум: вотасн ат вєрайн, па нӑң вәты хотэн вотасн лӑп ат ёвӑа, ма хущєма ӑнт йиӑн ки, – питы аке ики щиты упӑс.

– Ӑнтә, ма ӑнт йиум нӑң хущена – Ай Мощнєңие юхы нёхмӑс. ўв щив хән эвӑ, вотасн хән вєра.

Щи кўтн, ин питы вой аке ики нухы пєа пойкщӑ:

– Тәрум вән ащие, курс вән ащие, лоньщ лып-лып, вотас пуа-пуа!

Щиты щи, мӑтты, путӑртта ин питы вой аке ики.

– Я, йивӑп-асӑп, нӑң па ма эвӑтєма муй вохӑн, ма ӑңкеңӑамн-ащеңӑамн атэт хӑйсаюм, тӑм хўват вәмєм эвӑт щи вәсум. Нӑңена па ӑнт ювӑртыйсум.

Щи  щӑта, ааң вәнта ин Ай Мощнєңие, ишниал па ӑн кӑӑт, овӑ кўш пәхаӑэ, овӑ пєлка ӑн хоумӑэ. Муха, сыры щи ӑңкеңаам-ащеңаам лупӑңӑн:

– Карты веюм апӑт сӑрн, хәт сӑрн хӑйємн, мӑтта ерумтэн щос нӑң щӑха щи сӑран щи мосмитӑт.

Я, щи Ай Мощнєңие, хирӑс-хирӑс оньщ, муты ӛшие а нє вєрӑс, ким хуты питӑс, па щи хирӑ оньщ, ин карты веюп сӑра хулыева ара шукаӑсӑт, оньщ хирман.

Хӑтаа йис, питы вой аке ики па щи юхтӑс, лупий:

– Ма хущєма ки йиӑн, тӑм хотыен нюр эпа пит, ов хӑрен па оньщ ӑн тӑйты пит ишниан муйан. Ма па пойкщаум.

– Йивап-асап, нӑң па мӑнєма тыв турастыйӑн, ма муй нӑңена атум вєрсум, – Ай Мощнєңие лупӑс.

Щи щӑта, щи кашащӑс, хута мӑнта вә, щи мӑнӑс. Ин питы вой аке ики нух амтӑс, яңхӑс, ай әхӑ тәс. Ай әхӑа Ай Мощнєңие эсӑэ, щи тәэ ўв хотӑа.

Хўв тӑхе хўв мӑнсӑңӑн, ван тӑхе ван мӑнсӑңӑн. Щи мӑнӑс, мӑнӑс, имутыйн нохӑр юх пәхӑра юхтӑс, лупӑ: 

–Нохӑр юх пәхӑр упам, вўща вәаты, ма атэт хотӑң Ай Мощнє тәум, атэт кәртӑң Ай Мощнє имия тәум.

Ин упа ўв пиаа вўща вєрӑт, па щи еы шәшма, па щи мӑнӑ. Хўв тӑхе хўв мӑнсӑэ, ван тӑхе ван мӑнсӑэ па вәнши юх пәхӑра юхӑтл, лупий:

– Вәнши юх пәхӑр упам, вўща вәаты, ма атэт хотӑң Ай Мощнє тәлум, атэт кәртӑң Ай Мощнє тәум.

Я, па щи еы пєа мӑнӑ. Хўв тӑхе хўв мӑнсӑэ, ван тӑхе ван мӑнсӑэ. Па ин сумӑт юх пәхӑра юхӑт, ищиты щи лупӑ:

– Сумӑт юх пәхӑр акиам, вўща вәаты. Атэт хотӑң Ай Мощнє тәлум, атэт кәртӑң Ай Мощнє тәум. 

Сумӑт юха лупӑт: 

– Вўща, вўща!

Я, па щи мӑнӑ, хўв тӑхе хўв мӑнсӑэ, ван тӑхе ван мӑнсӑэ. Имутыйн, вантӑэ, ай хотые щи омӑс. Ин ай хотыева ай Мощнєңие щив щи тәсы, щив юхтӑс, иы вухӑс Ай әхӑ эвӑт, юхи уңӑс. Ова тәты ар тӑпрӑ, ова таӑэ, вўты тәты ар тӑпрӑ, вўты таӑэ. Ин хот, мӑттырн щимурта тӑпрӑң, щи мурта хәлэң.

Питы вой ике ики лупӑ:

– Нӑң хотэн нух эщӑтэ, ма мӑнум. 

Ин питы вой хуран щиты щи путӑртӑ. Мӑнта епийн таңӑэ: 

– Потум вуй похал вәйтан, ов пўңӑ нурума, нух пунумтэ, амп сух лакки кӑр вәйтан, ов пўңӑа нух ихтумтэ. Вут нури щӑта, пури па пурмӑс вәйтан, ищи нух ихтумтэ.

Ин Ай Мощнєңие, яна щи хот хӑри ёвӑта каша щи вәйт, хуты таңса, щиты щи вєрӑэ: потум вуй похӑл вәйтӑс, нурума нух пунсӑэ, амп сух лак кӑры вәйтӑс, ов пўңӑла нух ихӑтсӑэ. Я щӑта, щиты етна щи йис. Имутыйн нюхӑс молупщӑң, нюхӑс порхайң ики юхи щи питӑс: ӑнтуп кеӑ мухаая нюр аңки, ӑнтпӑ па щимурт хурамӑң.

Па лупӑ, тӑм па и муй тӑхи эвӑт юхтум ики. Ин мәнты, питы вой акєм ики вәс. Ин ики вўща вєрӑс па лупӑ:

– Хотэн щимурта нух эщӑтмен, ӑ пуңхар. 

Я щи, ин эвӑңасңӑн, мостыйсӑңӑн, ин утңӑн, ияха вәмитсӑңӑн, ияха хомитсӑңӑн. Щи эвӑт, щит Най Вәрт, щит ищи. Щиты щи курӑк икен питы хурн яңхӑ. Щи эвӑт ўв хӑнты. Ин па, мосӑң, ын хутты вәӑңӑн. Тӑм моньщ ариман моньща йис ёхн.

 

Путӑртӑс Екатерина Васильевна Молданова Нуви сӑңхум вош эвӑт. 

Нєпека хӑншӑс Евдокия Вожакова.

 

P.S.Тӑм моньщ путӑр ямкєм хўвӑншӑк ма нух хӑншсєм, радива хўват арсыр ёхн хәӑнтса. Кашӑң ай кәртӑн муй па вошн арсыр моньщӑт вәӑт Ай Мощнєңие оӑңӑн.