Мӑнум оӆ ван хӑтӆуп тыӆӑщ Нягань вошн округ ӆуваттыйн «Югра ыңуптӑты» оса тӑхи XIII-мит мирхот пурайн «Ай вошӑтн па кәртӑтн рәт ясӊӑт вәнӆтӑты вєр» нємпи ӆўӊтупсы вєрсы. Тӑм вәйтантупсыя Югра мўв рәт ясӊӑт вәнӆтӑты вєрӑт тәты ёх тумпийн нємасыя пиӆ округев Пуӆӊавӑт вош эвӑӆт хӑнты нє Клавдия Слепа вохсы. Ӆўв ар оӆ мӑр пушхӑт вәнӆтӑс, интӑм  Ямал мўв ӆуваттыйн вәнӆтӑты вєрӑт вантман тӑйӆ. 

Ӑктӑщум мир ещаӆт Клавдия Слепа айкеӆ тәс, хутыса Ямал мўв хўваттыйн ӑшкола-ин­тернатӑтн няврємӑт рәт ясӊӑта вәнӆӑты вєр ӆэ­щӑтман вәӆ. Уша йис, ху­ты Ямал мўвн 18 ӑш­ко­ла-интернат, пришколь­ной хәт ин­тернат, вевтама вәнӆтыйӆты няврємӑт пӑта и ӑшкола-интер­нат, вәнтӑӊ мӑӆты па лекщитты кӑт ӑшкола рәпитӆӑт. Тӑта увӑс мир пушхӑт хӑнты, юрн, сӑран па селькупской ясӊӑта вәнӆтӑӆыйт. 

Мосӆ ястӑты, пиӆ ок­ругевн шуши мир ясңӑт вәнԯтӑты пӑта няв­рємӑт кўтн арсыр кӑсупсэт вєрԯыйт. Щӑԯ­та йиԯуп щирн ясңӑт вәнԯтӑты утӑт ԯэщӑт­ԯыйт па учителят ищи йиԯуп щирн рәпитты вәнԯтӑԯыйт. Нух пи­тум айӆат ёх Россия мўв президент па Ямал мўв губернатор нємпи кӑсупсыйӊӑна пириӆыйт. 

Щи тумпи ӑшкола етшуптӑты эвет па пухӑт ГИА па ЕГЭ экзаменӑт мӑты пурайн рәт ясӑӊ пириты вєритӆӑт. Щи­ты 2019-мит оӆн 164 няврєм рәт ясӑң хўват экзамен мӑты пирисӑт. Ӆыв кўтэӆн 49 хуят юрн ясӑӊ, 15 хуят – хӑнты ясӑӊ хўват экзаменӑт мӑсӑт.

Йиӆуп щирн ӆэщӑ­тум рәт ясӑӊӑн хӑншум учебникӑт єсӑӆӆыйт

Няврємӑт вәнтӑты ёх па пушхӑт пӑта рәт ясӑңӑн учебникӑт па нємасыя программайт йиӆуп щирн тӑта хӑнш­ӆыйт па щитӑт єсӑӆыйт. 2016-мит оӆн 1-4-мит классӑтн вәнӆтыйӆты пушхӑт пӑта юрн па хӑнты ясӑӊӊӑнӑн йи­ӆуп щирн учебникӑт єсӑӆсыйт. 2017-мит оӆн ищиты йиӆуп щирн селькупской па сӑран ясӑӊӊӑнӑн 1-4-мит клӑсс няврємӑт пӑта вәнӆтӑ­ты нєпекӑт єтсӑт. 2018-мит оӆн йиӆуп щирн ӆэщӑтум киникайт хӑн­ты, юрн па селькупс­кой ясӊӑтн 5-7-мит клас­сӑтн вәнӆтӑты эвет-пухӑт пӑта вєрсыйт. 2018-мит оӆн ищимӑщ учебникӑт тәп 8-9-мит классӊӑн ӆуват айӆат ёх пӑта хӑнты, юрн па селькупской ясӊӑт вәнӆ­тӑты щира єсӑӆсыйт.

Щиты иха ӆўӊӑтты ки, 2017-2018-мит оӆ­ӊӑнӑн вәнӆтӑты вєрӑт тәты 37 тӑхийн йиӆуп щирн хӑншум нєпекӑт хўват пушхӑт рәт ясӊӑт вәнӆтӑсӑт, 2019-мит оӆн – 26 вәнӆтӑты тӑхийн.

2019-мит оӆн 8-9-мит классӊӑнӑн няврємӑт юрн ясӑӊа вәнӆтӑты пӑ­та учебникӑт М.Я. Бар­мич, Л.А. Вуквутагина па Е.Ю. Писчикова хӑнш­сӑт. 8-9-мит классӊӑн ӆуват айӆат ёх пӑта хӑнты ясӑӊ вәнӆтӑты кєши М.А. Рачинская, Н.С. Аляба. Л.П. Еприна па Н.Д. Вальгамова учебникӑт ӆэщӑтсӑт. Ищимӑщ нєпекӑт, тәп селькупской ясӑӊӑн Р.А. Кусамина, М.К. Мо­рокова па А.А. Хозова єсӑӆсӑт.