Тӑм товийн Ёмвошн окружной киникайт ӆўӊӑтты хот хуща «XVIII Окружной фестиваль детской и юношеской книги» нємпи мӑӊхӑтӆ вәс. Щи пурайн округев хўваттыйн арсыр ванӆтупсэт ӆэщӑтман вәсӑт. Вән кєр тыӆӑщн Нуви сӑӊхум района Санкт-Петербург вош эвӑӆт путрӑт хӑншты нє Екатерина Земляничкина юхтылӑс. 

Ӆўв хәӆум хӑтӆ мӑр Нуви сӑӊхум райо­нӑн киникайт ӆўӊӑт­ты хотӑтн вошӑӊ мир пиӆа вәйтантыӆӑс. Вән кєр тыӆӑщ 15-мит хӑтӑӆн Касум воша юхтылӑс, М.К. Волдина нємуп ки­никайт ӆўӊӑтты хота па музея ӊхӑс. Тӑта Ека­те­рина ай няврємӑт пиӆа вәйтантыӆӑс. 

Екатерина Землянич­кина няврємӑт пӑта ки­никайт, моньщӑт па путрӑт хӑншӑӆ, щи тум­пи ай пушхиет пӑта ки­найт ӆэщӑтӆ, щит «Новые приключения Прос­ток­вашино», «Тима, Тома», няврємӑта мєт әмӑщ тӑм кинайт телевизор хуща вантты. 

Ӑктӑщийӆты пурайн ӆўв киника оӆӑӊӑн м­сыева путӑртӑc, шєӊк әмӑщ хәӆӑнтты вәс. Ӆўв няврємӑт пиӆа путӑр па моньщ хӑншты оӆӑӊӑн путӑртӑс, муй вўрн хӑнш­ты мосӆ, муй вўрн арсыр вєрӑт юӆн, камн муй вән­тӑн иса муӆты мутшӑты мосӆ. Вантэ, моньщӑт ху­ща арсыр пурмӑсӑт муй ай войт путӑртты хошӆӑт па муӆты вєрӆӑт. 

Ай няврємӑта шєӊк әмӑщ вәс, ӆыв иньщӑссӑт, муй пӑта тӑм киникайн хуятӑт щиты вєрсӑт, тӑм муй тум вєр муй пӑта щиты тывӑс? 
Екатерина Борисовна лупӑс, кашӑӊ хӑтӆ мосӆ киникайт ӆўӊӑтты, ӆәӆн ма па кєна вәнӆтыйӆты, ма нәмӑсты. 
Тӑм йисн ай пухӑт-эвет киникайт ар ан ӆў­ӊӑтӆӑт, ӆыв интернет хуща электронной щўӊкӑт эвӑӆт ӆўӊӑтӆӑт.
Мосӆ лупты, мўӊ биб­лиотека хотэва мєт ай пушхиет ӑӊкиӆаӆ-ащи­ӆаӆ пиӆа ӊхӆӑт, кини­кайт вўӆӑт. Тӑта арсыр ванӆтупсэт, киникайт унтасн тӑм йисн сыр-сыр вєрты хӑрӑт тӑта ӆэ­щӑтӆум. Мўӊ хущева вән хуятӑт ищи газетайт па журналӑт вўты юхтыйӆӆӑт. Мўӊ ар киника тӑйӆўв, тӑта кашӑӊ ай няврєм муй вән хӑннєхә ӆўвеӆа мос­ты киника вәятӆ.

Тӑм оӆн Нуви сӑӊхум районӑӊ киникайт ӆў­ӊӑтты хотн кимит пўш ӑктупсы ӆэщӑтсы, щит «литературный десант» нємпи хӑр, щирн мўӊ хущева писательӊӑн юхтыйӆсӑӊӑн – щит Олег Яненогорский па Анжелика Бивол. Щит мўӊ округ писательӊӑн, тӑм ӑктупсыя вошӑӊ мирӑт па вәншӑк няврємӑт юхтыйӆсӑт.
Мирхот сухнум пу­райн няврємӑт па ӆывты вәнӆтӑты нєӊӑт ар м па сӑмӑӊ ясӊӑт Ека­те­рина Борисовна Зем­ляничкиная лупсӑт, итәх эвет па пухӑт лупсӑт, моньщӑт питӆӑт хӑншты. Няврємиет, нын нәмӑсты м нумӑсӆан па вєрӆан еӆӆы ат мӑнӆӑт!  

Путӑр хӑншӑс:
Светлана Рандымова