Айкеԯӑт - Новости

Лыпӑт єнумты тыӆӑщ 12-митн Россия па Ёмвошэв сєма питум хӑтӆӊӑн постӑсўв. Ёмвошэв 437 оӆа йис. 

Ёмвош кәща хә Мак­сим Ряшин вўща вєрӑс:
– Сєма питум хӑтӆэн пиӆа, мўӊ сорни, хура­мӑӊ Ёмвошэв! Тӑм ванӑн округ вуӆаӊ вошевн сот щурӑсмит хӑннєхә сєма питӑс. Юхи хӑщум яӊ оӆ мӑр 30 щурӑс хуята Ёмвошев аршӑка йис, ин тӑта 98 500 хуят вәӆ. Мўӊ м вошева Рос­сия па тӑхет эвӑӆт мир вәӆты па рәпитты юхӑтӆӑт. Вән пәмащипа нынана, Ёмвошевн вәӆ­ты па вещката рәпитты хуятӑт! Нын рәпатай­ӆан унтасн мўӊ вошев хурамӑӊа йиӆ.

Ёмвош округ кәщайт мирхот вәс, щӑта путӑр мӑнӑс, муй щирн тӑм ӆўӊӑн няврємӑт рўтьщӑты питӆӑт.

Тӑм ӆўӊӑн 76 209 эви-пух (тәняӆ 2018-мит оӆн – 75 869 няврєм) арсыр мўвӑта рўтьщӑты-мӑӆты мӑн­ӆӑт. Рўтьщӑты вєр ӆэщӑт­ты пӑта округ бюджет вух эвӑӆт 2,3 миллиард шойт вух сухуптӑсы. Мєт сыры ай тыӆӑщ вух вўты семьяйтн єнмӑӆ­ты няврємӑт, щимӑщ 41 375 пушӑх, мӑӆты-рўтьщӑты хотӑта, Питы щорса мӑнӆӑт.

Лыпӑт єнумты тыӆӑщ 7-митн Ёмвошн шуши мир йис вәӆупсы, культура, вәнӆтӑты, мир мӑӆты па па вєрӑт тәты ёх иха ӑктӑщсӑт, ӆәӆн мўӊ мирӆўв пӑта вәӆум поступсэт йиӆпатты муй па йиӆуп поступсэт вўты. 

Округ кәща ӆӑӊкӑр хә Алексей Шипи­лов вўща вєрӑс: «Шуши мирӆўв еӆ вәӆупсы» пос­тупсэв хўвн вўсўв, ин­тӑм, мосӑӊ, щив йиӆуп вєрӑт оӆӑӊӑн хӑншты мосӆ. Щирн шєӊк ӆӑӊ­хаӆўв, ӆәӆн тӑмхӑтӆ нын иха инумӑсн, иёшн ат рәпитсӑты».

Тӑм ванӑн Ёмвошн «Югра-Классик» нємуп хот йитн Югра мўвев мәш мӑӆты хәйт-нєӊӑт, мӑта хӑннєхәйт ма рәпитсӑт, ӆыв мӑӊхӑтӆэӆ пӑта мойӆӑсыйт. 

Сырыя округев эвӑӆт иха ӑктӑщум тох­турӑт еӆпийн Югра мў­вев кәща Наталья Ко­марова мӑӊхӑтӆэӆ пӑта ӆывеӆа м вўща ясӑӊ тәс па лупӑс: «Тӑм юхи хӑщум 2018-мит оӆн Югра хущи араттєӆн 22 895 няврєм сєма питӑс. Щит пӑта Россия хон пєлӑк арсыр яӊкєм тӑхет кўтн ищиты нух питсўв. Мәш мӑӆты хӑн­нєхуятӑт тўӊщирӑ­ӊа па ма рәпитты пӑта округев ӆуватн тәп мур­тӑӊ хәйт-нєӊӑт ин сурма питӆӑт».

Тӑм ванӑн хӑнты мир ай тохтур нє Раиса Васильевна Головина (Нёмысова) 50 оӆа йис. Ӆўв 25 оӆ мӑр мир лекщитум вєр пийн ма йиты округ леккар хотн рәпитӆ.

Тӑта мосванӑн Ас нопӑтты тыӆӑщ 21-мит хӑтӑӆн Ёмвошн айкеӆӑт ӑкӑтты хӑннєхуятӑт мўв-авӑт ӆавӑӆты вєрӑт тәты департамент кәща ӆӑӊкӑр хә Егор Збродов па Югра мўв «База авиационной и наземной охраны лесов» кәща хә Иван Шевцов пиӆа вәйтантыйӆсӑт. Щи мирхот мӑнум пурайн айкеӆ ӑкӑтты ёхӆўв уша вєрсӑт, муй щирн округев вәнтӑт тўт питты вєрӑт эвӑӆт ӆавӑӆӆыйт. 

Сырыя Е. Збродов путӑртӑс, хуты тӑм хӑтӑӆн мўӊ окру­гев ӆуватн нємуӆты тўтн питум муй тўтн ӆєты тӑхи ӑнтәм. 

Ас нопӑтты тыӆӑщ 21-митн «Финно-угорской тови – 2019» вән мӑӊхӑтӆ пурайн «Финно-угрӑт йис вәӆупсы ӆавӑӆты вєр» нємпи хӑр рәпитӑс.

Ас нопӑтты тыӆӑщ 21-мит хӑтӑӆн Ёмвоша хӑнты, вухаӆь ясӑӊӊӑна няврємӑт ӑшколайтн па колледж хуща вәнӆтӑты ёх ӑктӑщийӆсӑт. Тӑм вән мирхотн путӑртсӑт щи оӆӑӊӑн, муй иты ӑшколайтн няврємӑт рәт ясӊӑт вәнӆтӑӆӑт. 

Ас нопӑтты тыӆӑщ 15-мит хӑтӑӆн иса мўвӑтн вәӆты мир Мўвтєӆ хоттєӆ ёх емӑӊхӑтӆ постӑӆӑт. Тӑм мӑӊхӑтӆ 1993-мит оӆ лыпӑт хойты тыӆӑщн ООН нємуп Генеральной Ассамблея кәща ёх поступсы щирн ӆэщӑтсы, ӆәӆн хоттєӆ ёх нў­шайт оӆӑӊӑн уша вєрты па щитӑт тўӊматты.

Югра мўв кәщайт ун­тасн тӑм оӆн тӑӆаӊ «Хот­тєӆ ёх апӑт хӑт» эщӑтсы. Щиты Ас но­пӑтты тыӆӑщ 15-митн округ ӆуваттыйн кашӑӊ вош пәӆьницайн веӆщи сєма питум пушхӑт тӑхи хуща ӑӊкет па тёпиеӆаӆ пӑта мӑӊхӑтӆ вєрсы.

Ас нопӑтты тыӆӑщн Ёмвошн «Югра» нємуп айкеӆӑт ӑкӑтты  тӑхийн телевиденияйн, радивайн па газетаитн рәпитты хӑннєхуятӑт Югра мўвев хотӑт омӑсты департамент кәща хә Андрей  Кривуляк па социальной развития департамент хущи рәпитты нє Людмила Низамова пиӆа вәйтантыйӆсӑт па арсыр айкеӆӑт уша павӑтсӑт. Тӑм мирхотн вән кәщайт путӑртсӑт, муй щирн 2019-мит оӆн ар няврємӑӊ айӆат хоттєӆ хӑннєхуятӑт ипотека щирн ӆәтум хотӆаӆ пӑта тәп иӆєм пўш сухуптӑты вухӑӊ нётуп­сыйн ма мӑӆыйт.