Тӑта мосванӑн Сәрханӆ вош пәӆьница хотн и 59 оӆа вум нєӊа вевтам мезотелиома нємуп хун мәш, мӑта ут ӑтмащ иса нухӆы пєӆы пўвӆӑс, тохтурӑтн мсыева артаӆӑсы па нух эвӑтсы. Щи операция шєӊк ӆавӑртӑӊа абдоминальной хирургия щирн тӑм йисн ӆўӊӑтӆы.

Щи пӑта хӑннєхә хун хуща нух пўв­ӆум тӑхи пиӆа тохтурӑт араттєӆн хәт муӆтаскєм щос арат вулкємӑсӑт па ищи­па тәса па мсыева щи­тэӆ айӆтыева нух эвӑтсӑт.

Операция ӆэщӑтум хӑннєхуятӑт кўтн арсыр вән тохтур хәйт рәпитсӑт. Щит онкологӑт-хирургӑт: Сергей Копейка, Алексей Аксарин, Павел Троян па анестезиолог ики Ра­фаэль Гайнуллин. Щи ёх­ӆўва мәшӑӊ тӑхи эвӑтты пурайн шєӊк тәса па вє­ритты кємн ма сыр-сыр нётупсы ай тохтур нє Альфия Канипова вєрӑс. Мосӆ лупты, хуты тӑм йисн Югра мўвев ӆуваттыйн щимӑщ мәш вєр мєт оӆӑ­ӊӑн мӑӆсы.
Тохтурӑт ясӑӊ щирн, перитонеальная мезоте­лио­ма – щит хӑннєхә хун ӆыпийн ӑтмащ нух пўв­ӆум тӑхи, мӑта ут айн-айн айӆта еӆӆы єнмӑӆ.

Щи киньща мєт оӆӑӊ мәшитты пураитн щит м­сыева ки ӑн артаӆӑты па нух ӑн эвӑтты, щит хӑннє­хә сурма питты вєритӆ. Тӑмӑщ операция вєр Сәрханӆ вош пәӆьницайн рәпитты тохтурӑт шєӊк ма ӆэщӑтсӑт. Щи пӑта мәшӑӊ тӑхеӆ эвтум нєӊеӆ 15-мит хӑтӑӆн мсыева юхи мӑнӑс.

Ин ӆўв реабилитация хот йита лекщитыйӆты ӊ­хӑӆ, мӑта тӑхи хуща ищи­ты тохтурӑтн тўӊщирӑӊа вантман еӆӆы тӑйӆы.

Мир тӑӆаӊа вәӆты щира рәпитты департамент айкеӆ 
хӑнты ясӑӊа тулмащтӑс: Владимир Носкин