- Хантыйский
- Русский
Па пўш культура о пит
Ас потты тыӑщ 13-16-мит хӑтӑтн Ёмвошн оӑңмит пўш Культурной форум нємуп мирхот вєрӑнтсы. Сыры тӑмӑщ вәйтӑнтупсы ищи вәяс, тәп пасыр нєм тӑйс. Тӑм пўш хәс кәрт па вош эвӑт апӑтъяң мутас хуят юхтыйсӑт. Арӑ пєлак щит культура хотӑтн рәпитум ёх вәсӑт, щӑта кәща хотӑтн рәпитты мир. Ня хӑт мӑр ыв Ёмвошн музейта па па әмӑщ тӑхет вантты яңхсӑт па мирхотн путӑртсӑт, муй щирн ыв рәпитӑт, муйсӑр нўша тӑйӑт? Щӑта муй щирн вєрты, ән культура хотӑт мєт яма ат рәпитсӑт па щив мєт ар хуят ат юхтыӑс?
Мирхот оңитумн ай павӑтсы, хуты округ хўваттыйн 487 культура хот рәпит: киникайт мийяты 239 хот, сот мултас кўлуп па хәумъяң вет музей. Щит тумпи кәртӑтн, вошӑтн ветъяң нив искусства ӑшколайт па колледжӑт, хәумъяң мутас театрӑт, кинайт вантӑты, якты-ариты хотӑт па рўтьщӑты паркӑт вәӑт. Щӑта уша питӑс, мўң мўвевн культура тӑхет рәпитты пӑты «Развитие культуры и туризма в Ханты-Мансийском автономном округе-Югре на 2014-2020 годы» нємуп поступсы єсӑсы. Культура департамент хущи рәпитты нє Надежда Казначеева лупӑс, хуты округев ёх щи вєрн апрӑңа вәӑт, ар мўвӑтн щимӑщ нєпек хуна ӑнт вєрсы.
Ар хуят мирхотн ясӑң вўйясӑт. Сўмӑтвош район кәща Любовь Коротун лупӑс, ыв хущеа ищи 2014-мит о вўш эвӑт культура па туризм оӑңӑн эщӑтум поступсы рәпитты пит. Щӑта ай павтӑс, тӑм ванӑн Саранпауль хущи йиуп кўлуп пўншсы, Тэк кәртӑн образовательно-культурной хот вєрсы, щӑта и хотн кўлуп па ӑшкола вәаңӑн. Сўмӑтвошн па пўш купечество нємуп музей пўншы, щи вєр пӑты интум Добровольской ики вәум катра хот йипаты. Мос лупты, ин вәнты Сўматвошн национальной культура хот ӑнтәм. Л. Коротун нәмӑс, щӑта ищи щимӑщ хот пўншты мос, тәп шуши мирӑт тухӑпи щӑта нўм мўв ёх ищи ыв культурайа әхтыйн ат рәпитӑт.
Ю. Бойко Нуви сӑңхум район оӑңӑн путӑртӑс. Щӑта 26 культура хот вә, щит кўлупӑт, киникайт ўңӑтты хотӑт, музейт, ариты-яктыя па нарӑсты вәнтӑты ӑшколайт. Кўш авӑрт оӑт вәсӑт, юхи хӑщум хәс о щи мўвн нємӑт хот лӑп ӑн тәхӑрсы. Итәх кәртӑтн йиуп каш вєрты хотӑт омӑссыйт, интум Ваньщавӑтн па Паштӑрн щимӑщ хотӑт йипатты хӑщӑс. Лыпӑт хойты тыӑщн Нуви сӑңхум район вәнты кев ӛш вєрсы. Ю. Бойко лупӑс, интум ывеа кєншӑк питӑс па мўвӑта яңхты. Есаты щив яңхты ищи кєна йис па тӑм ванӑн щи ӛш хўват Нуви сӑңхум воша КВН юнтӑн юнттыя Октябрьской эвӑт айат ёх юхтыйсӑт.
О. Ледковская па Т. Савицкая тыӑщ вух па дорожной карта нєпек оӑңӑн путӑртсӑңӑн. Щи нєпек Россия президент єсум Указ посн вєрсы. Интум мўң мўвевн районӑт, кәртӑт, вошӑт па рәпата тӑхет щи нєпек посн рәпитӑт. «Югра-Классик» хот кәща нє И. Ткаченко ӑңха, ән якты-ариты па уңӑтупӑт вєрты мира кәртӑт па вошӑт хўват яңхты кєншӑк вәс, щи вєр пӑты нємасыя дорожной карта нєпек эщӑтты мос. Кўтуп тыӑщ вух оӑңӑн уша йис, тӑм он культура рәпӑтнекӑт 32 мутас щурӑс шойт вух ёша павӑтӑт, па пўш щи вух нух аумы па ыв 37 мутас щурӑс арат вўты питӑт. 2018-мит о вәнты нумӑс вә щиты вєрты, ән щи рәпӑтнекӑт тыӑщ вух округевн сухуптӑты кўтуп зарплата араттыя ат йис. Рўтьщӑты культура рәпӑтнекӑт ищи нәмӑмӑсыйт. Нижневартовск эвӑт вәум ёх лупсӑт, хуты щи мир пӑты окружной ветеранӑт совет вєрты мос. Щӑта щимӑщ тӑхет кашӑң вошн па кәртӑн пўншты мос, ән щитӑт унтасн вәна пєлка ювум хӑннєхәйта нётты.
2014-мит он Россияйн культура оӆ постӑты питы, округевн интум ищи щи вєр эщӑтты питсы. Әмӑщ путӑр щи оӑңӑн Урай эвӑт юхтыум Т. Куимова путӑртӑс. Вантэ, щи вошн ыв сӑттэла щимӑщ о тӑм пўш вєрсӑт па щит унтасн яңкєм миллион шойт вух ёша павӑтсӑт. Щитӑт ыв культура хотӑт йипатты па пурмӑсӑт щив әттыя тӑруптӑсӑт.
Хуйтат мирхотн ясӑң вўйясӑт, хуыева па вошӑтн, кәртӑтн вәты культура хотӑт пиа вәтща рәпитты ӑңхаӑт. Щи оӑңӑн Яков Черняк (Сәрхан) ищи путӑртӑс. Щи вошн филармония нємуп хот па симфонической оркестр вә, ўв шєңк ӑңха, ән ыв артиста вєрӑнтты каш хӑрӑт аршӑк мирн ат вантсыйт. Я. Черняк па па ёх нәмӑсӑт, щит вєрты пӑты кәртӑң па вошӑң кәща хотӑт пиа гастролят оӑңӑн нєпек хӑншты мос, щи пурайн аршӑк кәртӑң мир уңӑтупӑт па якты-ариты хӑрӑт шиваӑӑт. «Югра-Классик» хот кәща И. Ткаченко лупӑс, культура рәпатнекӑта тўтӑң хоп мӑты мос па щит ыпийн концертной хот йит вєрты. ән щи хоп кәртӑт па вошӑт хўват ат яңхӑс па щӑта вәты мир якӑт па уңӑтупӑт вантты, арӑт па нарассувӑт хәӑнтты щив ат юхтыйсӑт.
Мирхот лӑп тәхрум хӑтӑн округев кәща нє Наталья Комарова тәса рәпитты культура рәпатнекӑт пиа вәйтӑнтыӑс па ывеа мевӑ посӑт, Пәмӑщипа нєпекӑт па «За вклад в развитие межэтнических отношений» вухӑң нєпек катуптӑс. Хӑнтэт эвӑт «ыӑң союм» хущи рәпитты хӑнты нє Галина Молданова мойупсыйн мӑсы. Итәх хуятӑт «Событие» па «Время молодых» нємуп мойупсэтн мӑсыйт. Щи юпийн культурной форума юхтыум ёх пӑты «Югра-Классик» хотн якты-ариты хӑр вәс па «Сталинград» нємуп кина мира вантӑсы.
Реональда Ользина
Следующий год будет Годом культуры
В ноябре в Ханты-Мансийске состоялся I культурный форум, собравший работников культуры и искусства из разных уголков округа. Его программа включала культурные мероприятия, круглый стол и встречу с губернатором. В настоящее время в округе 487 учреждений культуры и искусства, это библиотеки, музеи, культурно-досуговые учреждения, театры, концертные организации и кинозалы. На круглом столе помимо сотрудников и руководителей этих учреждений присутствовали и главы некоторых муниципальных образований, которые рассказали о работе и проблемах подведомственных им учреждений сферы культуры. Прозвучали предложения о консолидации работы учреждений культуры разных регионов для более эффективного продвижения культурных мероприятий и для увеличения количества зрителей и более активного приобщения их к профессиональному и самодеятельному искусству.
На форуме было объявлено, что следующий год будет Годом культуры округа, который даст новый импульс для развития муниципальных учреждений культуры, а мероприятия, которые будут проведены в его рамках, привлекут большое количество жителей округа. Завершился культурный форум награждением лучших работников учреждений культуры и демонстрацией фильма «Сталинград».
Реональда Ользина
Номер Ханты Ясанг:
№ 23 (3395) 5.12.2013
