Ас потты тыӆӑщн 21-мит хӑтӆӑн Югра кәща Руслан Кухарук пиӆа вәйтантупсы вәс. Нӆ щос мӑр айкеӆӑт ӑкӑтты па хӑншты ёхн па блогерӑтн ӆўв арсыр вєрӑт оӆӑӊӑн иньщӑссы, иса 40-кєм иньщӑсупсы вәс. Югра кәща пиӆа щи вәйтантупсы «Информационный мир Югры» XIX-мит мирхот вәӆум хӑтӆӑтн вєрӑнтса, щи форума айкеӆӑт ӑкӑтты па хӑншты ёх, блогер щира вәӆты ёх па медиа экспертӑт юхтыйӆсӑт.

Вәйтантупсыйн ар­сыр вєрӑт оӆӑӊӑн пу­тӑр мӑнӑс, щи кўтн округ кәщаев увӑс мирев оӆӑӊӑн ищи путӑртӑс. И вєр – щит увӑс мирева хот омӑсты муй па хот ӆәтты нётупсы программа, щит 2026-мит оӆ Ас хӑӆты тыӆӑщ оӆӑӊ хӑтӆ вўш эвӑӆт вєрты оӆӊитӆа. Кәща лупум ясӑӊӑн тӑмӑщ нётупсы вєрты еӆпийн ӆыв арсыр ёх пиӆа хўв мӑр рәпитсӑт. Щирн уша йис, тӑм хӑтӆ округев хуща 3 500 хотӑӊ ёх вәӆты хотӑт ӑн тӑйӆӑт:

- Мўӊ кӑтсыр йиӆуп нумӑс вєрсўв. Мєт оӆӑӊ нумсэв – щит хот мӑты сер­тификат тын, ин имух­ты 100% вух ёша катӆуп­тӑты питӆўв. Мўӊ вәӆэв, ар щи­ра вәӆты хотӑӊ ёх вәӆӆӑт, ар хуят хот ӆәтты вух ӑн тӑй­ӆӑт, тӑм программа ӆыв пӑтэӆа вєрум ут. Ӆавӑрта вәӆты хуятӑт тӑм хӑтӆ кредит вух вўты пищеӆ иса ӑнтәм. 

Щӑӆта па Р. Куха­рук лупӑс, хотӑт мӑты питӆайт тәп щи тӑхетн, мӑта тӑхийн хӑннєхә ин вәӆ. Щиты вєрса увӑс мирев вәӆты мўвӆаӆ эвӑӆт йира ӑн мӑнты пӑта, ин вәӆты мўвӆаӆн еӆӆы вәӆты ат хӑщӆӑт. Щӑӆта па федеральной концеп­ция хуща хӑншум щирн мирева єнмум мўвӑтн йис вәӆупсы шавиман тӑйты мосӆ. Тӑм вєрӑт ӆэщӑтты питӆӑт кашӑӊ му­ниципалитет хуща вәӆ­ты кәщайт, вухӑт щи вєрӑт пӑта округ бюджет эвӑӆт мӑӆыйт. Щиты вєрман вух вўты вєр кєнашӑк йиӆ.
Увӑс мирев оӆӑӊӑн ки­мăт пу­тӑр – щит няврємӑт рўтьщӑты кәртӑт оӆӑӊӑн. Югра кәща нумӑсн, щи вєрӑт мосӆ йиӆпа ӆэщӑт­ты па щимӑщ кәрт ара­шӑк вєрты, щит няврємӑт йис вәӆупсы уша павӑттэӆ пӑта. Ӆўв лупӑс, сыры мўӊ округев хуща аршӑк няв­рєм кәрт вєрӑнтса, тӑм хӑтӆ вәнта тәп «Мань Уск­ве» Сўмӑтвош район Ясунт кәртăн хӑщӑс. Щӑӆта Руслан Кухарук щи няврєм кәрта ӊхум вєрӆ оӆӑӊӑн путӑртӑс, ӆўв ясӊӑӆн щи няврєм кәрт эвӑӆт м нумсӑт хӑщсӑт.
- «Мань ускве» няврєм кәрт – щит тӑм хӑтӆ вәнта хӑщум кәрт… Ма щи кәрт вєрум ёха, тӑм хӑтӆ вәнта щи кәрт шавиман тӑйты ёха м ясӑӊ китӆум. Щи кәрт – щит няврєм вәнӆтӑты тӑхи, щит йис вєрӑт шавиман тӑйты тӑхи, щит няврємӑт арсыр тӑм хӑтӆ мосты вєрӑта вәнӆтӑты тӑхи, – лупӑс ӆўв. 

Пресс-конференция ёх ещаӆт кәща лупӑс, муйсӑр нумсӑт ӆўв щӑта рәпитты мир пиӆа иха вєрсӑт.

- Мўӊ и нумса юхӑтсўв, тӑмӑщ няврєм кәртӑта нётты мосӆ. Еӆӆы щиты вєрты мосӆ, ар тӑхет эвӑӆт няврємӑт тыв юхтыйӆты ат питӆӑт, ин тәп Сўмӑт­вош вўш эвӑӆт юх­тыйӆ­ӆӑт. Ма вәӆєм, ар няврєм кашӑӊ оӆ щив вўратӆӑт, щит пӑта щиты вєрты мосӆ, округев ар мўв сў­ӊӑт эвӑӆт няврємӑт щив ӊхты пищ ат тӑйты питӆӑт щӑта рўтьщӑты пӑта. Щӑӆта па мосӆ па тӑхетн ищи тӑмӑщ няв­рєм кәртӑт вєрты, ӆыв ищи йис вєрӑт ма тӑйты ат питӆӑт, – путӑртӑс Югра ух тәты хәев.

Руслан Николаевич па «Дом народов Югры» вєрӑт оӆӑӊӑн ясӑӊ тӑйс. Па оӆ тӑмӑщ хот рәпитты щи питӆ – щӑта айӆат ёх кўтэӆн вәйтантыйӆты питӆӑт, щӑта кәщайт пиӆа путӑртты пищӑт вәӆты питӆӑт па арсыр вәйтан­тупсэт вєрты хӑрӑт вєрты питӆӑт. Лупты мосл, щи вєр мўӊ округевн Дом народов России «СВОИ» хуща рәпитты ёх пиӆа па иса тӑхетн вәӆты увӑс мирев Ассоциация ёх пиӆа вєрты питӆы.
Тӑм вәйтантупсыйн округ вән вєрӑт па кашӑӊ хӑннєхә айшӑк вєрӑт оӆӑӊӑн путрӑт мӑнсӑт.

Югра кәща нумӑсн ву­хаӆь па хӑнты мирев хӑн­шет округев хуща вәӆ­ты вән вошӑтн муй па ай вошӑтн иса тӑхетн вєрты мосӆ. Хӑншет вєрты мосӆ вошн вәӆты вәнт пайт, рўтьщӑты хӑрӑт, спорт щи­ра вәӆты хӑрӑт па хотӑт хуща. Тәп щи вєрӑт ма вантман вєрты мосӆ, мӑта хӑнши рӑхӆ вєрты, мӑта хӑнши па ӑн рӑхӆ.
Вән вошӑт эвӑӆт хўвн вәӆты ай вошӑта интернет вєрты, щи оӆӑӊӑн ищи путӑр мӑнӑс. Кәщаев ну­мӑсн щи вєр ӆэщӑтты пищ тӑм хӑтӆ тӑйӆўв, щит спутни­ко­вой интернет. Тӑмхӑтӆ Югра мўвевн щи щира ИТ-стойбища проектӑт вєрман вәӆӆӑт. Вәнт кәртӑтн вәӆты мирев ищи интернет тӑйӆӑт.

Югра кәща вәйтантуп­сы ванӆтӑс, муй мурт мўӊ округ кәщаев ёх ещаӆт путӑртты каш тӑйӆ, тӑм вәйтантупсы эвӑӆт ма кӑӆ, кәщаев арсыр нум­сӑтн вәӆ, мўвев ӆуват нумсӑт вана тӑйӆӑӆэ па кашӑӊ хӑннєхә нумсӑт вана вўӆӆэ, ӆўвеӆа кӑӆ, муй вўрн мўӊ мўвев еӆӆы уяӊа-тащӑӊа вєрты, муй вўрн кашӑӊ хӑннєхә вәӆупсы тўӊматты.

Путӑр хӑншӑс: 
Пётр Молданов