Тӑта мосванăн, Ас потты тыӆӑщ 25-мит хӑтӑӆн, округев Дума хотн шуши мир депутатӑт 40-мит мирхот вєрсӑт. Щи мирхотн арсыр тӑхет эвӑӆт нємасыя щив вохум кәщайт вәсӑт па сыр-сыр ӆўӊтупсэт депутатӑт ёхӆўва ӆэщӑтсӑт.

Тӑм мирхотн иха ӑк­тӑщум депутатӑт еӆ­пийн округев Недро­пользования тӑхи кәща хә С. Филатов мєт оӆӑӊ ӆўӊтупсы вєрӑс, хута айкеӆӑт тәс, муй щирн па хуты тӑм юхи хӑщум оӆӑтн мўв иӆпи тащ кӑншты ёх рәт щирн вәӆты мўвӑтн хӑнтэт пиӆа вәӆӆӑт па муй хурасуп нётупсэт вєрӆӑт.
Ӆўв пеӆн шуши де­путатӑт кәща хә Е. Айпин округев кәща ӆӑӊкӑр хәя П. Тара­канова ясӑӊ мӑс. Щи хә лупӑс, хуты тӑм йисн ӆыв нәмӑсӆӑт одноуровневой местной самоуправления щирӑт округевн вәӆты районӑт па вошӑт хўватн ӆэщӑттыя. 
Вантэ, щи пурайн ăл хӑн­нєхуята кєншӑк питӆ вән кәща ёхӆўв пиӆа арсыр вән вошӑтн вәйтантыйӆты па иха мосты вєрӑт ищи кўрумн тәса вєрты. Тәп щи вєр тўӊматты пӑта ма рәпитты мосӆ. 

Юхи хӑщум кўтн ок­руг Ветеринарной служба тӑхи кәща С. Музафин депутатӑта ай­кеӆ вєрӑс, муй щирн тӑм йисн хотӑӊ войт тӑйӆыйт, єнмӑӆӆыйт па муй хурасуп йиӆуп поступсэт щи пӑта вўсыйт. 

Щи киньща шуши мир депутатӑт нәмӑссӑт па ар­сыр йиӆуп поступсэта тӑ­та кашащсӑт. Вантэ, щи за­конӑт оӆӑӊӑн еӆӆы Дума хотн па путрємӑты питӆӑт.

Путӑр хӑншӑс: 
Владимир Енов