Шуши мирев культура - Культура обско-угорских народов

Тӑмхӑтӆ ма ӆӑӊхаӆум хӑншты хӑнты мир арӑӊ хуят оӆӑӊӑн, щит сәрханӆ мўв нє Вера Кондратьева. Ӆўв Пим ай хӑнты кәртӑн сєма питӑс. Хәнты щи кәрт хўӆ веӆпӑсӆӑты ёх кәрта вәс, хӑнтэт щив веӆум хўӆӆаӆ тәтьӆясӑт. Ин щит Лянтор воша йис.  
 

Катра кашӑӊ хӑнты няврєм кан ки­тӑӆты ар тӑйс. Ас хӑнты арӑӊ ими шәӊӑт Евгения Петровна Русмиленко имуӆтыйн Виктория Костылева хиӆнєӊӑӆа ар вєрӑс.  
 

Сэвӑӊ акань 

Округ кәщайт мир­хот пурайн Юван Шесталов нємпи премия хоӆумтум ёх оӆӑӊӑн уша йис. 

Хӑнты ясӑӊ, лите­ратура, йис вәӆупсы ӆавӑӆман тӑйты пӑта Тэк кәртӑӊ «Ас нє» ариты тӑхи, «Округ пўпи якты ӑшкола» кәща Тимофей Алексеевич Молданов па Ларьяк ӑшколайн няврємӑт хӑнты ясӑӊа вәнӆтӑты нє Марина Александровна Прасина премия вух хоӆумсӑт. 
Щи ёха м ясӊӑт ӆуп­ӆўв, еӆӆы ищиты ма рәпитаты, – ок­руг кәща нє Наталья Комарова лупӑс.

Вухаӆь нє Людмила Савельевна Хозумова пиӆа ма тәняӆ сўсн «Мань хап» нємуп ай хопӑӊ кӑсупсэт пурайн Ванзетур кәртӑн Сўмӑтвош районӑн вәйтантыйӆсум. Мин вәӆты-хоӆты щирӆаӆ оӆӑӊӑн путрємӑсмӑн.
 

Людмила Хозумова Ломбовож кәртӑн  Сўмӑтвош районӑн ву­хаӆь хоттєӆ ёх хуща сєма питӑс па айтєӆн вәс. 

Щиты лупӑс Угут кәртӑӊ киникайт ӆўӊӑтты хот кәща нє Евгения Анатольевна Эсаулова. Щив юхӑтмємн ма мєт сыры щи хота ӊхсум.
 

Тӑм ими эвӑӆт уша йис, хуты тӑм ки­никайт ӆўӊӑтты хот кәртӑн вән кєр тыӆӑщ 16-митн 1954-мит оӆн пўншман вәс. 

Лыпӑт тыӆӑщ юхи хӑщум хӑтӆӑт мӑр тәняӆ ӆўӊӑн «Ма Ӆорвош мўвєм»  мӑӊхӑтӆ мӑнум пу­райн «Кунавӑт нє» якты-ариты тӑхи нєӊӑт пиӆа иха вәйтантыйӆсум па айкеӆ вўсум, муй щирн тӑм йисн ӆыв вәӆӆӑт па муй ху­расуп хӑнты арӑт сыр-сыр мирӑт еӆ­пийн ариӆӑт.  
 

Щиты рӑхӆ лупты Угут кәртӑн вәӆты Пётр Семёнович Бахлыков нємпи йис па катра пурмӑсӑт ӆавӑӆты хот оӆӑӊӑн. Щив ӊхмємн ма щи хота ӆуӊсум. Ванӆтупсэт ӆэщӑтты нє Людмила Юрьевна Звягинцева арсыр пурмӑсӑт аӆьман щи хот оӆӑӊӑн ай тәс.
 

Тӑм хӑнты нєӊев Надежда Николаевна Конева (Литва) юхи хӑщум оӆӑт  пурайн Тюменской область мўв немщӑт культура хуща рәпитӆ. Ма ӆўв  пиӆэӆа Тюмень вошн вәйтантыйӆсум па путрємӑсум.
 

Надежда Николаевна, муйсӑр тӑхийн нӑӊ сєма питсӑн па єнумсӑн?

Мосум мўвн Кышик вошн ар каркам хӑннєхә єнмӑс. Ӆыв ин вәӆупсы ӛшӆаӆ ар тӑхия мӑнсӑт. Тӑм пўш ма Галина Петров­на Марченко (эви щирн Ячигина) оӆӑӊӑн хӑншӆум.  
 

Мўвтє мир катра пурмӑсӑт ӆавӑӆты хотӑт мӑңхӑт пӑта ма 2010-мит оӆн Ну­ви сӑӊхум вошн пўн­шум йиӆуп «Нуви Ат» нємуп хӑнты мир тӑхи оӆӑӊӑн хӑнш­ты ӆӑӊхаӆум.