Айкеԯӑт - Новости

Лыпӑт тыӆӑщ ӆапӑтмит хӑтӑӆн Ёмвошн «Торум Маа» йис пурмӑсӑт шавиты хотн иха ӑктӑщум шуши мир хӑннєхуятӑт па арсыр вән кәщайт нємасыя округев вухаӆь ёхӆўв айкеӆӑӊ нєпек ӆэщӑтты ёх пиӆа иха вәйтантыйӆсӑт.

Мӑнум товийн Москва вошн «Увӑс мир тащӑт» вән ванӆтупсы вәс. Щи хӑтӆӑтн щӑта «Женская гостиная» нємпи имет пӑта хӑр рәпитӑс. Увӑс мўв па Дальний Восток хӑтӆ єтты мўв эвӑӆт юхтум апрӑӊ нєӊӑт арсыр мосты вєрӑт оӆӑӊӑн путӑртсӑт.

Ас нопӑтты тыӆӑщ 1-мит хӑтӆӑн щӑта Увӑс па хӑтӆ єтты мўв ми­рӑт рәт ясӑӊӆаӆ па йис вєрӆаӆ ӆавӑӆты щира вуӆаӊ мирхот вєрсы. 

Щӑта путӑртсӑт, хутыса тӑм йис пурайн рәт ясӊӑт, йис путрӑт, якты-ариты вєрӑт ӆавӑӆты мосӆ, хутыса няв­рємӑт щи вєрӑта хущты, хутыса юӆн ӑӊкета-ащета пушхиеӆаӆ єнмӑӆты, ӆәӆн ӆыв рәт ясӑӊӆаӆ пєӆы сӑмӑӊа ат вәсӑт. 

Щи оӆӑӊӑн рәт ясӊӑт ӆавӑӆты научно-координационной совет мирхот пурайн путӑртсӑт. Щит Ёмвошн Ас нопӑтты тыӆӑщ 28-мит хӑтӆӑн мӑнӑс. Мирхотн путӑртсӑт, муйсӑр тӑхетн еӆӆы 2024-2025-мит вәнӆтыйӆты оӆн шуши мир айӆат ёх вәнӆтыйӆты питӆӑт. 

Тăм ванăн УрФО ӆуваттыйн кәща ики Владимир Якушев Югра мўв правительства ёха йиӆуп кәща хуят Руслан Кухарук оӆăӊăн путăртăс. Тăм вән мирхотн сырыя вәӆум губернаторэв Н. Комарова ищи вәс. Ӆўв 2010-мит оӆ вўш эвăӆт 14 оӆ мăр Югра мўв кәщая рәпитăс.

Щиты Россия мўв президент ики В. Путин поступсы щирн 2024-мит оӆ Ас нопăтты тыӆăщ 30-мит хăтӆ вўш эвăӆт Югра мўв кәщая Руслан Кухарук йис.

Руслан Кухарук Урай вошн сєма питăс, тăта ăшкола етшуптăс. Юрист хәя вәнӆтыӆăс. Ӛхăтшăк Тюмень вош кәщая пирисы, ар оӆ мăр вән вошн кәщая вәс. 

Ас нопӑтты тыӆӑщ 30-мит хӑтӆӑн округ дума 33-мит мирхот вәс. Щи пурайн депутатӑт 30 вєр нух вантсӑт.

Хон вошн Ас нопӑтты тыӆӑщн 17-мит хӑтӆӑн «Выставка достижений народного хозяйства» хуща «Рабочий и колхозница» нємуп хот йитн ӑктупсы вәс, щит «Академическая история Югры» хӑншум нєпек оӆӑӊӑн путӑртты пӑта. Тӑм хот йитн па «Трудовые династии» ванӆтупсы вәс. 

Ёмвошн вән кєр тыӆӑщн 23-25-мит хӑтӆӑтн ветмит пўш ӑктупсы вәс. Щи ӑктупсыя сыр-сыр ясӑӊӑн путӑртты мир, сыр-сыр йис вєрӑт вана тӑйты мир юхӑтсӑт. Щи мирев и нумӑсн, ха катӆӑсман вәӆӆӑт, и пӑнт хўват шәшӆӑт. Тӑмӑщ ӑктупсы сыр-сыр мўвтєӆ мирев кўтӆаӆн ӆәхсӑӊа вәӆты пӑта вєрӆа. Россия мўвев ӆуват мирев м нумӑсн ат вәӆӆӑт, м сӑмн ат вәӆӆӑт па йис ёхӆўв, йис вєрӑт тӑм хӑтӆ вәнта вана ат тӑйӆӑт. Щи пӑта тӑта вєра арсыр мир ӑктӑщсӑт, щи кўтн ариты-якты мир, вєрӑӊ ёх, учёной щира вәӆты хуятӑт, кәщая вәӆты хӑннєхәйт.

Щимӑщ нєм оӆӑӊмит вән мирхот тӑйс, мӑта ут Ас нопӑтты тыӆӑщ Москва хон вошн «Яндекс» хотн ӆэщӑтман вәс. Вантэ, 2022-2032-мит оӆӑт – щит мўвтєӆ шуши мирӑт рәт ясӊӑт ӆавӑӆты арт, щирн Россия мўвев арсыр мир вєрӑт тәты федеральной агентства (ФАДН) па «Россия мўвев мирӑт хот» нємпи тӑхеӊӑн ёх щимӑщ вән мирхот вєрсӑт. Тыв 50 тӑхи эвӑӆт 200-кєм рәт ясӑӊ еӆӆы Интернет хуща пунты вєрӑт тәты кәщайт, программистӑт, ӑӆ хуятӑт, айӆат ёх юхтыйӆсӑт. 

Ёмвошн вән кєр тыӆӑщн 25-мит хӑтӆӑн РИЦ «Югра» хуща ӑктупсы вәс. Щӑта ай вошӑта касӑӆман ӊхты пәӆьница хуща рәпитты ёх ясӑӊ тӑйсӑт. Щит «Югорский центр профессиональной патологии» нємуп тӑхийн рәпитты тохтурӑт. Ӆыв путӑртсӑт, муй тӑхетн ӆыв тӑм оӆн, тӑӆ тәрумн ӊхсӑт, щит вєра хўв тӑхийн вәӆты ай вошӑт па ай кәртӑт. 

Мӑта ёх йис вєрӑт па йис нумсӑт вана тӑйты каш тӑйӆӑт, щи ёх тӑм хӑтӆӑтн конкурс нєпекӑт хӑншты пищ тӑйӆӑт. Тӑм вєрӑт пӑта федеральной бюджет эвӑӆт некоммерческой организация хуща вәӆты ёх, мӑта хуя­тӑт кӑсупсыйн нух питӆӑт, вухн мӑӆыйт.

Тӑмӑщ вєр «Феде­ральное агентство по делам молодёжи» ху­ща айӆат ёх пиӆа рәпитты кәща хуятӑт ӆэщӑтсӑт.