2025-мит оӆн ок­ругевн кӑт вуӆаӊ мӑӊхӑтӆ постӑты питӆўв. Ас нопӑтты ты­ӆӑщн Вуӆаӊ Оте­чественной ӆаӆьн нух питум хӑтӆ вўш эвӑӆт 80 оӆа йиӆ. Ван хӑтӆуп тыӆӑщ 10-мит хӑтӆӑн 95 оӆа йиӆ щи пура вўш эвӑӆт, хән Ёмвош округев тывӑс. 

Россия мўвев кәща Владимир Путин 2025-мит оӆ «Мўвев ӆа­вӑӆты ёх оӆа» аӆьсӑӆэ. Юг­ра мўвев кәща Руслан Кухарук тӑм оӆ «Йис вє­рӑт нәмман тӑйты оӆ» нємн пунсӑӆэ.  

Щи мӑӊхӑтӆӊӑн пӑ­та мўӊ «Хӑнты ясӑӊ» газе­таевн оӆ мӑр Югра мўвевн ӆаӆь пурайн тар­ма рәпитум ёх оӆӑӊӑн хӑншты питӆўв. Щи путрӑт мўӊ «Ленин пӑнт хўват» па «Хӑнты ясӑӊ» катра га­зетайт эвӑӆт вўӆўв, ӆәӆн интӑм Югра мўвевн вәӆты ёх ат вәйтсӑт щи хуятӑт оӆӑӊӑн, хуйтат ӆавӑрт ӆаӆь оӆӑт пурайн мўӊ мўвевн тарма рәпитсӑт, щиты вуӆаӊ ӆаӆьн нух питум хӑтӆ ванамсӑт. 

Газетаев ӆўӊӑтты тынӑӊ ёх, нын рәтӆан «труженик тыла» нєм ки тӑйсӑт, нын ӆыв оӆӊеӆн хӑншаты па мўӊева китаты (gazeta@khanty-yasang.ru), щи путрӑт мўӊ «Хӑнты ясӑӊ» газетаевн єсӑӆӆўв.

Путӑр хӑншӑс: 
Надежда Рагимова