Тӑм оӆ Ас хӑӆты тыӆӑщ 23-мит хӑтӆӑн округ кәща хә Руслан Кухарук рәпатайӆ щирн Сў­мӑтвоша ӊхӑс. Щӑта ӆўв район пәӆьницая ӆуӊтыӆӑс, мӑта хот йиӆпатты пийн ӆўӊӑн вәйт ӆор тыӆӑщн пўншсы.

«Здравоохранение» нацпроект щирн щив йиӆуп тӑм йис лекщит­ты щўӊкӑт тәсыйт. Тӑм­хӑтӆ щӑта рентген, фи­зиотерапевтической па па мосты тӑхет мсыева ӆэщӑтсыйт. Щӑта 12500 муӆтас хуят вантман тӑйӆы. Руслан Кухарук пәӆьни­ца кәща нє Екатерина Сагандукова (щит хӑнты мир мєт оӆӑӊ тохтур нє Е.М. Сагандукова хиӆнє) пиӆа пәӆьница вантман ӊхсӑӊӑн. 
Щӑӆта округ кәща хәев Сўмӑтвошн йиӆуп ӑшко­ла омӑсты тӑхия ӊхӑс. Тӑм ӑшколайн 700-кєм няврєм вәнӆтыйӆты питӆ. Иса ӑшкола 30%-кємн вєрсы. Хән ӑшкола омӑсты етшуптӑӆы, Сўмӑтвошн няврємӑт и ӑсмена щирн вәнӆтыйӆты питӆӑт.
Ищиты Р. Кухарук районной краеведческой музей тӑхийн вәс, щӑта ӆўв сыр-сыр ванӆтупсэт вантӑс. Щит шуши мир вәӆупсы щирӑт па 1953-мит оӆн Западной Сибирь мўвн мєт оӆӑӊ вәйтум газ тӑхи оӆӑӊӑн уша вєрӑс. Мосӆ лупты, тӑм музей 2003-мит оӆн омӑссы па ин щи хот йиӆпатты мосӆ, щи пӑта мосты нєпекӑт ӆэщӑтты питсыйт. 
Щи тумпи Р. Кухарук Сўмӑтвош кәща хә Р. Алек­сандров пиӆа вәйтан­тыйӆты пурайн катра хо­тӑт нух вўты па йиӆуп вәӆ­ты хотӑт омӑсты оӆӑӊӑн пу­тӑртсӑӊӑн. Щи пӑта му­ниципальной тӑхет кә­щайт пиӆа мирхот вєрты нумӑс тӑйӆ. 

Руслан Кухарук айкеӆ хӑнты ясӑӊа тулмащтӑс: Надежда Вах