Кашӑӊ оӆ Россия мўвн Ас хӑӆты тыӆӑщн 27-мит хӑтӆӑн Вуӆаӊ ӆаӆь пурайн Ленинград вош эвӑӆт блокада нух вўюм хӑтӆ постӑӆы. Тӑм хӑтӆӑн Югра мўвевн вәӆты мир ищи щи пӑӆтап пурайн пӑрум хӑннєхуятӑт нәмӑӆмӑӆӑт. Тӑм оӆ округ кәща хә Руслан Кухарук, кәща хуятӑт, оса па рәпитты тӑхетн кӑпӑртты хӑннєхуятӑт, СВО тӑхийн ӆаӆясум ёх ӑня лыптӑт кев хураса пунсӑт. 

Ленинград вош бло­ка­да 1941-мит оӆн лыпӑт хой­ты тыӆӑщ 8-мит хӑтӆӑн немщӑтн иса мухӑӆая лӑп вўсы па 872 хӑтӆ мӑр щиты тӑйсы. Па тәп 1944-мит оӆн Ас хӑӆты тыӆӑщ 27-мит хӑтӆӑн иса блокада нух вўсы. Щит вошӑӊ хӑннєхуятӑт пӑта мєт пӑӆтап па нўшаяӊ хӑтӆӑт вәсӑт. Щи ӆавӑрт хӑтӆӑтн рәпитты вән хуятӑта – 250 грамм, няврємӑта – 125 грамм нянь мийӆясы.  
1941-мит оӆ сўс вўш эвӑӆт Ладожской мӑӆӑӊ хўват ӛш вєрсы па хопӑтн ӆєтутӑт, пуртәнӑт па па мосты утӑт щив тәтьӆя­сыйт. Ас потты тыӆӑщ вўш эвӑӆт, хән мӑӆӑӊ пот­сы, ӊк әхтыйн ӆаӆь машинайт ӊхты пӑта вєрсы. Щи ӛш «Дорога жизни» нємн нємӑтсы. Юхӆы па щи ӛш хўват имет, няврємӑт, мәшмӑӆтум хуятӑт вән мўва тәсыйт.
Блокада хӑтӆӑт мӑр 641 щурӑс муӆтас (па нєпекӑтн миллион муӆтас арат хуят оӆӑӊӑн хӑншман) хӑннєхә ӆєӆ­ӆы вәӆман па бомбайт, нёӆӑт эвӑӆт ӑнтәма йисӑт. Иса араттэӆн 1 миллион 837 щурӑс хӑннєхәя во­шӑӊ мир шимӆа йис. Итәх хӑн­нєхуятӑт, муӆтыкєм няв­рємӑт, щи «Вәӆупсы ӛш» хўват ӆаӆьӆы мўвӑта тәсыйт. Хән нем­щӑт вош пўӊӑӆ эвӑӆт йира вошӑтсыйт, щӑта тәп 557-кєм щурӑс хуят хӑщӑс. 
1943-мит оӆн «Искра» нємпи операция оӆӊитсы, хута Ленинградской па Волховской фронтӑтн ӆаӆясты ёхн Ленинград вош блокада еша пєлки пўншсы. Па тәп иса тӑ­ӆаӊтєӆн 1944-мит оӆн Ас хӑӆты тыӆӑщ 27-мит хӑтӆӑн Ленинград вош мухӑӆая вуракӑт еӆӆы вошӑтсыйт. Щи хӑтӆӑн Ленинград вошн салют єсӑӆсы. Ӆыӆӑӊа хӑщум мир нух амӑтсӑт. 
Иса мўв ӆуваттыйн па мўӊ Россия мўвевн щи ӆавӑрт, пӑӆтап па сур­тӑӊ хӑтӆӑт оӆӑӊӑн хӑн­нєхуятӑт иса нәмӆӑт па кашӑӊ оӆ блокада нух вўюм хӑтӆ постӑӆӑт. Щит веккеши мўӊ нумӑсӆўвн па сӑмӆўвн хӑщӆ.

Путӑр хӑншӑс 
Надежда Ильина