Ёмвошн Ас хӑӆты тыӆӑщн 16-мит хӑтӆӑн региональной информационной «Югра» тӑхи хуща ӑктупсы вәс, щӑта путӑр мӑнӑс, муй вўрн Югра Росгвардия ёх 2024-мит оӆн рәпитсӑт. Тӑм мӑнум оӆэв мўвев-йиӊкев ӆавӆӑсты оӆ нєм тӑйс. Ӑктупсыйн Югра Росгвардия Управления хуща рәпитты хә, полиция полковник Евгений Симаков путӑртӑс.

Ӆўв путӑртум яс­ӊӑӆн Росгвардия ёх тӑм оӆ каркама рә­питсӑт, ӆыв Югра пра­воохранительной органӑт пиӆа пиӆтӑщман вәсӑт. ха пиӆтӑщман 2024-мит оӆн округев хуща ӆыв сыр-сыр атум вєрӑт сора вәйтсӑт па ма тўӊматсӑт.
Ӆўв путӑртӑс: 

- ОМОН па СОБР тӑхеӊӑн 1900 киньща аршӑк та­рӑӊ вєрӑт тўӊматсӑт, ӆыв правоохранительной ёха 330 ювра вєрӑт вєрум хӑннєхә катӑӆты нётсӑт. Щи хӑннєхәйт арсыр ювра вєрӑт вєрсӑт, щит государственной измена, закон такӆы мўӊ мўвева ӆыв па хон пєлӑк ёх тә­сӑт, пәӊх хурасуп атум ӆєты-яньщты утӑт контро­бандайн тыв тәсӑт, тәх ёх кўлащсӑт, хӑннєхә веӆум ёх па вәсӑт па арсыр атум вєрӑт вєрум ёх.

Мӑнум оӆн Югра хуща вәӆты мир эвӑӆт 50 арат ӆаӆясты пӑта вәӆты пуш­кан па 500 пӑтрән па па­сыр ӆаӆясты пурмӑсӑт нух вўсыйт, щит ӆыв ӑн рӑхты щира тӑюм утӆаӆ. Оӆ мӑр атум ёх эвӑӆт нӆ миллион вух нух вўсы, вет кила пәӊх хурасуп ӆєты-яньщты ут па арсыр ух шива вєрты пуртәнӑт.

Ар рәпата лицензион­но-разрешительной рәпата вєрӑтн вәӆты инспекторӑт вєрсӑт, ӆыв округев хуща вәӆты 44 щурӑс хӑннєхәя нётсӑт, щӑӆта па 15 щурӑс тӑхийн вантсӑт, муй вўрн, ма муй атма пушканӑт лэщӑтман тӑйӆайт. Щиты ӊхум тӑ­хетн инспекторӑтн щу­рӑскєм хӑннєхә катӑӆса, мӑта ёх пушканӆаӆ атум щира шавиман тӑйсӑт. Щитӑт административ­ной протокола хӑншсайт, па щи ёх поступсы щирн пушканӆаӆ тәса ӑн ша­витты пӑта вух сухуптӑсӑт. Тӑм оӆ 1400 веӆ­пӑсӆӑты пушкан нух вў­сы, щи ёх мосты нєпекӑт ӑн тӑйсӑт. Щӑӆта па 26 хӑн­нєхә тӑм оӆ пушканӆаӆ вәтшӑсӑт. Мєт ар пушкӑн Ёмвош район хуща вәӆты ёх вәтшӑсӑт, щит 8 пушкӑн.

Росгвардия Управления Вневедомственной охра­на подразделенияйт ёх 10 щурӑс арсыр тӑхет ӆавӑӆман тӑйӆӑт, щи кўтн 800 хот, хута няврємӑт па айӆат ёх вәнӆтыйӆӆӑт. Тӑм мӑнум оӆн Росгвардия хуятӑт 10,5 щурӑс пўш щи тӑхет вантты ӊхсӑт, карты щўӊкӑт «тревога» сый вєрум пӑта.

2024-мит оӆн 600 атум вєр ӑн тывӑс, щит сыры уша вєрса па вуӆытса, 32 арат пўш атум вєрӑт щи кўш тывийӆсӑт, тәп сора уша вєрсайт па щи вєр вєрум ёх катӑӆсайт. Мӑнум оӆн 120 хӑннєхә вәйтсы, мӑта ёх сўт эвӑӆт хунтыйӆсӑт.

Ван хӑтӆуп тыӆӑщн Екатеринбург вошн воен­ный совет ӑктыйӆса, щит Уральской округ ӆаӆь вуӆытты щира вәӆты Российской Федерация национальной гвардия хуща кәщая вәӆты ёх ӑктыйӆсӑт. Щит кӑсупсы щира вәс, мўӊ Югра мўвев Росгвардия Управленияев территориальной органӑт УрФО хуща кимӑтмит тӑхи ёша павӑтсӑт.

Щӑӆта па полиция полковник Евгений Си­маков айкеӆ ӑкӑтты па хӑншты ёха путӑртӑс ӆыв кўтэӆн ма рәпитты ёх оӆӑӊӑн, муй вўрн ӆыв ӆавӑрт сурта муй па атум вєра питум ёха нётсӑт. Мӑнум оӆэвн Ас потты тыӆӑщн Сәрханӆ вошн Росгвардия вне­ведомственной охрана хуща рәпитты полиция старший сержант Ислам Агаларов 18 оӆа вум эвия нётӑс, ӆўв кӑрӑщ хот 8-мит этаж эвӑӆт иӆӆы рӑкнӑс, тӑм хӑннєхәйн ӆўв шиваӆӑсы па катӑӆса, щи пӑта ӆыӆӑӊа хӑщӑс.

Югра хуща ӆаӆь щира вәӆты ёх, тӑмӑщ ведомства хуща рәпитты хуятӑт па мўвӑтн па нётӆӑт, щит мў­ӊева йиӆпа ортум мўвӑт па ӆаӆясты хӑрӑт хущи.

Сот киньща аршӑк Росгвардия ёх государст­венной па ведомственной ишӑк нєпекӑт па мевӑӆ посӑт ёша павӑтсӑт. Ай тӑхет потты тыӆӑщн 2024-мит оӆн Югра Росгвардия Сургутской Управления хуща рәпитты прапорщик Александр В. каркама вәӆмаӆ пӑта па па хуя­та нётмаӆ пӑта «За храбрость» II степени мевӑӆ посн мойӆӑсы.

Путӑр хӑншӑс: 
Пётр Молданов