Айкеԯӑт - Новости

Ас хӑӆты тыӆӑщ 17-митн Ёмвошн округ вәнӆ­тӑты па айӆат ёх вєрӑт тәты тӑхи хуща мирхот вәс. Шуши мир вәнӆтӑты вєрӑт вантман тӑйты тӑхи кәща нє Надежда Костылева щи мирхот тәс.

Мирхотн кӑт вєр нух вантсы: «Хӑнты ясӑӊ (1-4 классӑт)», «Юрн ясӑӊ (1-4 классӑт)», «Вухаӆь ясӑӊӑн ӆўӊтупсы (2-4 классӑт)» киникайт єсӑӆты вєр, Интернет ху­ща хӑнты, вухаӆь ясӑӊ­ӊӑнӑн хӑншты вєр.

Уша йис, хӑнты, ву­хаӆь па юрн ясӊӑт вәнӆтӑты киникайт Ас-угорской институт научной рәпатнекӑт па рәт ясӊӑта вәнӆтӑты ёх ӆэщӑтты па хӑншты питӆӑт. 

Тӑм ванӑн Ёмвошн правитель­ства хотн вән мирхота кәщайт ӑктӑщийӆсӑт. Ӆыв путӑртсӑт щи оӆӑӊӑн, муй иты 2020-мит оӆн Вуӆаӊ ӆаӆьн 1941-1945 оӆӑтн нух питум вєр постӑты мосӆ. Вантэ, 75 оӆ юхӆы мўӊ мирев нух питсӑт, щирн тӑм оӆ вән мӑӊхӑтӆ Россия мўв ӆуваттыйн ӆэщӑтӆа. Тӑм вән мирхот Югра мўв гу­бернатор ӆӑӊкӑр хә Алексей Шипилов тәс.  

Тӑта мосванӑн Ас хӑӆты тыӆӑщ 16-мит хӑ­тӑӆн Ёмвошн правительства хот йитн округ кәща вєрум Координационной совет тӑхийн сыр-сыр вән кәщайт иха вәйтантыйӆсӑт па рәпитты вєрӆаӆ муй нацпроектӑт оӆӑӊӑн путӑртсӑт. 

Тӑм йиӆуп оӆ оӆӊитумн Ёмвошн юрн хотӑӊ вош хулы ӆэщӑтыйӆсы. Щив Нуви сӑӊхум, Сәрханӆ па Нефтеюганской районӑт эвӑӆт вўӆєӊ ёх юхтыйӆсӑт. Ӆыв вет нюкӑӊ хот омсыйӆсӑт, мир вўӆы әхӆӑтн тәтьӆясӆаӆ, єпӆӑӊ ӆєтутӑтн ӆапӑтсӑӆаӆ. 

Касум мўв эвӑӆт юх­тыӆум нє Валентина Тарлина путӑртӑс:

Мӑнум тыӆӑщн Ёмвошн Россия мўв арсыр тӑхет эвӑӆт Ищки Икет па ӆыв хиӆнєӆаӆ ӑктӑщийӆсӑт. Ӆыв нӆ хӑтӆ мӑр кўтэӆн кӑссӑт, ӛхӑт хӑтӆӑн мєт м ёх пирисыйт па ишӑк нєпекӑтн па мойӆупсэтн мӑсыйт. Мосӆ лупты, ӆыв пєӆэӆа вантты яӊ щурӑс муӆтас хӑннєхә юхтыйӆсӑт.

Ван хӑтӆуп тыӆӑщ 10-мит хӑтӆӑн мўӊ Югра мўвев сєма питум хӑтӆ вўш эвӑӆт 89 оӆ постӑсўв. 

Югорской научной ӑшкола ёх грант вух унтасн щимӑщ рәпата тәӆӑт: «Динамика и константа в югорском языковом сознании». Щи вухӑӊ нётупсы 2018-мит оӆн североведения гумани­тарной институт хущи Югорской научной ӑшколайн рәпитты ёх хоӆумсӑт. 

Щи вух унтасн учё­ной ёх ӆєрамтты питӆӑт, хутыса Ёмвош округевн этнолингвистической вєрӑт мӑнӆӑт. Оӆӊӑӆн ӆыв хӑншты питӆӑт, хутыса Югра мўвевн шу­ши мир ясӊӑт ӆєрамт­ӆыйт. Щӑӆта ӆыв хӑнш­ӆӑт, муй иты рўщ ясӑӊ па шуши мир ясӊӑт иха вәӆӆӑт. 

Щи вєр пӑты учёнойт 1 миллион 200 щурӑс шойт вухн мӑсыйт. 

2016-мит оӆн Нуви сӑӊхум район Ваньщавӑт кәртӑн мўӊ оӆӑӊмит пўш няврємӑт айкеӆӑт хӑншты па газета ӆэщӑтты вәнӆтӑсўв. Тӑм оӆ лыпӑт хойты тыӆӑщн кимит пўш щимӑщ вәнӆтӑты хӑр ӆэщӑтсўв. Тыв 7, 8 па 9-мит клас­сӑтн вәнӆтыйӆты пушхиет юхтыйӆсӑт.

Хәӆум хӑтӆ мӑр ма няврємӑт пиӆа вәйтан­тыйӆсум, айкеӆӑт хӑнш­сўв. Щӑӆта пушхиета ванӆтӑсум, хутыса компь­ютерӑн газета вєрты мосӆ. «Ас ёх айкеӆӑт» нємпи няврємӑт пӑта газета вєрты оӆӊитсўв. Компьютер хўват газе­та вєрты ма Екатерина Клещенок вәнӆтӑсум.

Ван хӑтӆуп тыӆӑщ 4-мит па 5-мит хӑтӆӑтн Франция мўвн Париж вошн арсыр мир рәт ясӊӑт еӆӆы тәты вєрӑт әхтыйн вән мирхота ӑктӑщийӆсӑт. Тӑм вәйтантупсыйн 150 муӆтас ясӊӑт наука щирн уша вєрты учёной ёх па арсыр мўвӑт эвӑӆт оса тӑхет кәщайт вәсӑт.