Айкеԯӑт - Новости

Ёмвошӑӊ округ мӑӊхӑтӆ еԯпийн шуши мир Ассамблея ёх кәща Еремей Айпин мирхот ӑктыӆӑс, ӆәӆн оӆ мӑр тўӊматум вєрӑт оӆӑӊӑн путӑртты па уша вєрты, хутыса еӆӆы рәпата тәты. 

Тӑм оӆ мўӊ, «Хӑнты ясӑӊ» па «Луима сэрипос» газетайӊӑн хущи рәпитты ёх, няврємӑт кўтн рәт ясӑӊӑн кӑсупсы вєрӑнтсўв. Айӆат хуятӑт мўӊ хущева 13 арат ай кина па 16 арат хӑншум путӑр китсӑт. 

Увӑс мир мӑӆты па тӑӆаӊа вәӆты вєр ок­ругев пәӆьницайт хущи така вантман тӑйӆы. Кашӑӊ шуши хуята ипўш оӆ мӑр тохтурӑта ванӆтыйӆты мосӆ. 

Ван хӑтӆуп тыӆӑщн Сәрханӆ вош хәӆмит пәӆьницайн шуши хуя­тӑт пӑта нємасыя хӑтӆ вєрӑнтсы. Щи хӑтӆӑн кашӑӊ хуят пәӆьницая юхӑтты па тохтурӑта ванӆтыйӆты щир тӑйс.

«Мўӊ щимӑщ хӑтӆ щи пӑта ӆэщӑтӆўв, ӆәӆн хӑннєхә мәшӑт оӆӑӊӑн сырышӑк уша вєрты па мосты щирн ӆўвеӆ лек­щитты», – лупӑс пәӆь­ница мєт вуӆаӊ тохтур хә Дмитрий Гуз.

Ван хӑтӆуп тыӆӑщ 10-мит хӑтӑӆн 1930-мит оӆн Советской Союз мўвн Остяко-Вогульской нємуп округ вєрса. Ӛхӑт 1978-мит оӆн Ханты-Мансийской национальной округа нємӑтса, 2003-мит оӆн па Югра нємн оӆса. Щиты, ван хӑтӆуп тыӆӑщн 10-мит хӑтӑӆн кашӑӊ оӆ Ёмвош округ сєма питум хӑтӆ постӑӆы.

Хур хӑншты хӑнты хә Ген­надий Райшев 85 о постӑты пӑта Ёмвошн Ас потты тыӑщ 5-7-мит хӑтӑтн «Геннадий Райшев: культурный ландшафт. Диалоги в пространстве и вре­мени» нємуп Россия мўвтє мир вән научной мирхот вәс.

Оӑңмит хӑтӑн мойң ёх хӑн­ты мир хур хӑншты хә Геннадий Райшев пиа вәйтантыйсӑт, щӑта «Геннадий Райшев. Хӑннє­хә. Мўв-авӑт. Тәрум» йиуп ван­тупсыйн ўв хура вантсӑт.
Кимит хӑтӑн Ёмвошӑң хурӑт вантты хотн научной мирхот оңитӑс. Тыв Россия арсыр мў­вӑт эвӑт 30-кєм учёной хуят юхтыйсӑт. 

Тӑм ванӑн Ёмвош округ правительства хуща хӑнтэт, вухаӆят па юрнӑт вәӆупсы суртӑт арта­ӆӑты щира рәпитты тӑхи ёх мирхота ӑктӑ­щийӆ­сӑт. Тӑм вәйтантупсы Югра мўв вән кәща ӆӑӊкӑр хә Алексей Шипилов тәс. ха ӑктӑщум мир тӑм пўш Ёмвош округа рўтьщӑты ӊхты вєрӑт оӆӑӊӑн путӑртсӑт. 

Ас потты тыӑщ 21-мит хӑтӑн правительства хотн Ёмвош округ «Югра ыңуптӑты» оса тӑхи кәща нє Людмила Алфёрова мирхот ӑктӑщиӆӑс. Ар пєлӑк оса тӑхия ӆўӊум вошӑт па районӑт эвӑӆт кәщайт йиӆуп видео щирн мўӊ пиӆэва путӑртты вєритсӑт. 

Тӑм ванӑн Югра мўв ӆуваттыйн вәнӆтӑты па айӆат ёх вєрӑт тәты департамент хотн шуши мир рәт ясӑң па культура вєрӑт вантман тӑйты совет ёх мирхота ӑктӑщийсӑт. Щи тумпийн округев арсыр районӑт па вошӑт эвӑт видео щирн вәнӆтӑты вєрӑт әхтыйн кәщайт, рәт ясӑңа, культура вєрӑта вәнтӑты хуятӑт па оса рәпата тәты ёх путӑртты ищи вєритсӑт.

Ӆыв Югра мўв ӆуват­тыйн вәӆты ӑшкола-интернатӑт оӆӑӊӑн уша вєрсӑт. Щит хутыса увӑс мир няврємӑт вәӆӆӑт-хоӆӆӑт, муйсӑр нўшайт тӑйӆӑт, муй щирн мәш­мӑӆтум пурайн ӆыв мӑӆӆыйт.

Васы мӑнты тыӑщ 31-мит хӑтӑн Мўв-Авӑт па Хӑннєхә нємпи музей хуща округ киникайт ўңӑтты хот 85 оа вум пурайн вантупсы вәс.

Тыв юхтум ёха щи киникайт ўңӑтты хот кәща ӑңкӑр нє Светла­на Волженина вўща ясӑң лупӑс:
– Тӑмхӑт вуаң хӑт – мўң округ киникайт ўңӑтты хотэв ёх Мўв-Авӑт па Хӑннєхә музей хуща вантупсы эщӑтсӑт. Мос лупты, хуты 1936-мит о вўш эвӑт 1960-мит о вәнты округ киникайт ўңӑт­ты хотэв краеведческой музей (ин Мўв-Авӑт па Хӑннєхә нємпи музей) хуща вәс. Тӑмхӑт мўң йипа тыв юхӑтсўв па вантупсы эщӑтсўв.

Тӑм о финно-угорской ясңӑтн путрӑт, стихӑт хӑншты ёх нємасыя литературной премия ёша хоумсӑт. Щит хӑнты няврємӑт стихӑт хӑншты нє, учёной нє Валентина Соловар, удмуртской поэтесса Ирина Самигулова па мордовской писатель Геннадий Гребенцов. 

Щи оӑңӑн Ас потты тыӑщ 1-митн уша йис. Вантэ, щи хӑтӑн фин­но-угрӑт удмурт мир писатель Кузебей Герд оӑңӑн нәмӑмӑӑт, ўв 1937-мит он нӑртамы щаврамсы.