Айкеԯӑт - Новости

Ас потты тыӆӑщ 8-мит хӑтӆӑн «Торум Маа» тӑхийн вухаӆь мир вуӆаӊ поэт хә Юван Шесталов нәмӑӆмӑсы. Вантэ, 2011-мит оӆн Ас потты тыӆӑщ 5-мит хӑтӆӑн Юван Николаевич ӑнтәма йис. Щимӑщ вәйтантупсы музейн рәпитты хуятӑт ветмит пўш вєрсӑт. Мойӊа щив оса мир па технолого-педагогической колледжӑн вәнӆтыйӆты айӆат ёх юхтыйӆсӑт. Вәйтантупсы музей кәща ӆӑӊкӑр нє Эрика Сургутскова тәс.

Ёмвошн Ас потты тыащ 8-мит па 9-мит хӑ­тӑңӑн мӑр «ЮграТур 2019» 18-мит пўш нємасыя туристической вантупсы вәс. Тӑм вәйтантупсыя о ўңта ар хӑннєхә юхтый. Ин иса Россия мўв вән вошӑт па округев эвӑт мойң ёх пиӆа рәпитты хуятӑт тыв ӑкмийсӑт.  

Вән ӆащкам хотн ар нюки хот хурасуп утыет омсӑӆтумӑт па щи утӑт ӆыпийн Югра мўв кашӑӊ район эвӑӆт юхтум ёх ванӆтӑсӑт, муйсӑр әмӑщ вєрӑт ӆыв мойӊ ёх кєша вєрӆӑт. 

Ас потты тыӑщ 3-митн Ёмвош район Шапша кәртӑн Россия мўвев арсыр мират иха әхсӑңа вәты хӑт постӑты пӑта етнхот вәс.

Тӑм кәрт кәща нє Лю­бовь Овчерюкова кәртӑң па мойң ёха вўща ясӑң лупӑс, ән арсыр мирӑт еы кўтэн әхсӑңа ат вәсӑт, иха тарма па вещката ат рәпитсӑт Россия мўвев пӑта па хотан иса ма ат вә.

Рәпата кӑншты – щит ӆавӑрт вєр, итәхӑт хўв мӑр щит кӑншӆӑт. Интӑм хӑншӆўв, хутыса мосӆ щит ёша павӑтты. Оӆӊӑӆн – щит ӆәхсӑт па рәт ёх кўтн, щӑӆта телевидения, газетайт па интернет хўват. Интернетн щимӑщ тӑхетн рәпата вәйтты рӑхӆ: www.deptrud.admhmao.ru, http://job.dznhmao.ru, www.trudvsem.ru.

Нын рәпата кӑншты ӆӑӊхаӆты ки муй па муӆты вєра вәнӆтыйӆ­ты, рәпата кӑншты государственной тӑхия юхтаты. Щӑта рәпитты ёх нынана нётӆӑт:

Кашӑӊ оӆ округевн ӑшколайн вәнӆтыйӆты няврємӑт кўтн рәт ясӊӑт әхтыйн кӑсты щирӑт ӆэщӑтыйӆӆыйт. Тӑм пўш щимӑщ кӑсупсы кол­леджӑтн вәнӆтыйӆты айӆат ёх кўтн вєрӑнтсы. 

Ас потты тыӑщ 11-митн «Югра» нємпи ай­кеӑт ӑкӑтты тӑхийн вәйтантупсы вәс. Тӑм хӑт Югра мўв ыв саттэа вєр тӑйты ёх нётупсэт мӑты тӑхи ёх кәща Сергей Стручков, Москва хон вошӑң «Синергия» нємпи университет кәща ӑңкӑр хә Арсен Касумян па Югра мўв ўв саттэа вєр тӑй­ты айат хә Сергей Полыгалов айт тәсӑт.

Россия мўвн рәпитты Франция Посол ими Сильвия Берманн Ёмвошн «Торум Маа» йис пурмӑсӑт шавиман тӑйты тӑхийн оса вєрӑт тәты шуши мир пиӆа вәйтантыӆӑс. 

«Торум Маа» йис пурмӑсӑт шавиман тӑйты тӑхи, «Югра ӆыӆ­ӊуптӑты» оса тӑхи кә­ща нє Людмила Ал­фё­рова путӑртсӑӆэ, муй­сӑр рәт ясӊӑт әхтыйн вәйтантупсэт вә­­сӑт. Щӑӆта «Югра ӆыӆ­ӊуп­тӑты» тӑхийн кӑпӑртты мир ар оӆ мӑр Ёмвош округ правительства хуща рәпитты хуятӑт пиӆа кӑпӑртӆӑт. Тӑм о мӑр тәп оса тӑхи ёх унтасн 30 мутас вән вәйтантупсы, мирхо­тӑт, вәнтӑты хӑрӑт па мӑңхӑтӑт вєрсӑт. 

Кашӑӊ оӆ етшӑты еӆпийн Югра мўв губернатор ими Наталья Комарова округ хўваттыйн айкеӑт эщӑтты ёх пиӆа вәйтантыйӆ, ән мўӊ иньщӑсты ясӑӊӆўв юхы лупты. Тӑм оӆн ищиты Ас потты тыӑщ 12-мит хӑтӑн «Югра» нємуп телерадиокомпания хотн Ёмвошӑӊ мўвевн вәӆты газета, телевидения, радива па интернет хўват айт ӆэщӑтты 50 муӆтас тӑхи ёх вәйтантупсыя ӑктӑщийсӑт. Иха ӆўӊӑтты ки, тӑта соткєм хӑннєхә вәс.

Васы мӑнты тыӆӑщ юхи хӑщум хӑтӑӆн Югорской государственной университет хуща округев полиция кәща Василий Романица па административной правонарушения вєрӑт йира вўты оса тӑхи ёх йиӆуп щирн мирхота ӑктӑщийӆсӑт. 

Югра мўв ӆуваттыйн атум вєрӑт йира вўты щира па щи оӆӑӊӑн путӑртты кєша нєма­сыя вет тӑхи ёх вохсы. Щит Югра мўв па округ хўваттыйн вош кәщайт, ЮГУ эвӑӆт ёх, полиция имет-икет, прокуратура хуятӑт па атум, пӑӆтап вєрӑт оӆӑӊӑн ӆєрамтты ёх вәсӑт.

Вәйт ор тыӑщн Ёмвошн округ ӆуваттыйн няврємӑт вәнтӑты ёх па щи вєрӑт әхтыйн рәпатнекӑт, щи тумпи па хон пєлӑк Финляндия, Казахстан, Армения, Россия мўвӑт па Югра ӆуваттыйн вошӑт, кәртӑт эвӑӆт няврємӑт вәнӆтӑты ёх, киникайт єсӑты тӑхет кәщайт, оса вєрӑт тәты па компьютерной щирӑт тәса вәты хуятӑт вән мирхота ӑктӑщийӆсӑт. ыв путӑртсӑт, хутыса йиӆуп щирн Россия па округ уваттыйн вәнтӑты вєрӑт эщӑтты, ән няврємӑт па айат ёх рәт па па ясңӑта, литературая, йис вәупсыя, искусства вєрӑта мєт ма ванємӑты.