Айкеԯӑт - Новости

Тӑта мосванӑн вәйт ӆор тыӆӑщ 21-мит хӑтӆ вўш эвӑӆт па иса 25-мит хӑтӆ вўш вәнта Румыния хон пєлӑкн Клуж-Напока нємуп вән вошн Бабеш-Бойяи университетн финно-угорской киникайт хӑншты ёх XV-мит Мўвтєӆ мирхотн иха вәйтантыйӆсӑт. 

Вәйт ор тыӑщ 29-мит хӑтӑн Ёмвош «Югра-Классик» нємуп якты-ариты хотн округ ӆуваттыйн няврємӑт вәнтӑты ёх па щи вєрӑт әхтыйн рәпитты хуятӑт «Вәнӆтӑты вєр: кашӑӊ няврєм тәса вәнӆтӑты щирӑт» нємпи мирхота ӑктӑщсӑт. 

Мӑнум тыӆӑщн Ёмвоша Россия мўв арсыр вошӑт па па хон пєлӑк мўвӑт эвӑӆт хур хӑншты ёх юхтыйӆсӑт. Тӑта хӑнты мир хур хӑншты хә Геннадий Райшев сєма питум хӑтӆэӆ вўш эвӑӆт 85 оӆ постӑты щира Мўвтєӆ мир Арт-пленэр ӆэщӑтман вәс. Пленэр – французской ясӑӊ – щит камн хур хӑншты вєр. Щи мирхот 2004-мит оӆ вўш эвӑӆт вєрӆы. Тӑм оӆн щит кӑсупсы иты вәс, хәӆум щирн рәпитӑс: «Г. Райшев творческой ӑшкола», «Югорская академичка» па «Ӑӆ мир хӑншты вєр».

Лыпӑт хойты тыӆӑщ 2-митн Югорской государственной университет (ЮГУ) научной киникайт ӆўӊӑтты хотн йиӆуп ут рәпитты оӆӊитӑс. Щи автомат ут унтасн киникайт мӑты хуят такӆы вўты рӑхӆ.

Ёмвошӑӊ ӑшко­лайта тӑм оӆн 1800 муӆтас няврєм оӆӑӊ­мит класса мӑнӑс. Пушхӑт ӑшколая ӑң­киан-ащиан, аң­каңкиан-щащиан па аңщащиӆаӆн-щать­щащиан тәӆыйт. Вантэ, кашӑӊ хоттєӆ ёх пӑта щит ӑнтә тәп мӑӊхӑтӆ, щит вуӆаӊ хӑтӆ. Ӑшко­лайн вәнӆтуман мӑр няврємие нєпекӑӊ па нумсӑӊ хӑннєхәя йиӆ. 

Ёмвошн вәӆты хӑн­ты пухие Арсений Ма­лыгин ӑшкола вўша ювмаӆ, тӑм сўсн оӆӑӊ­мит класса мӑнӑс. Ӆўв мєт оӆӑӊмит вәнӆтӑты нєӊеӆ Ири­на Николаевна Ко­жаненко хәс вет оӆ муӆтас ӑшколайн няв­рємӑт  пиӆа рәпитӆ. 

Тӑм тыӆӑш 24-25-мит хӑтӆӊӑнӑн Ёмвошн «Клёвый берег» нємпи хўӆ веӆпӑсӆӑты ёх мӑӊхӑтӆ мӑнӑс. Щӑта Ёмвош, Сәрханӆ, Пыть-Ях, Нижневартовск па Нефтеюганск вошӑт эвӑӆт юхтум хўӆ веӆпӑсӆӑты ёх кўтэӆн кӑссӑт.

мӑӊхӑтӆ нлкӑт єн­мӑӆты завод тӑхийн вәс. Оӆӑӊмит хӑтӆӑн иса хуятӑт хўӆ веӆпӑсӆӑты вєрн кӑсты вєритсӑт. Муй арӑт ӆыв хўӆ веӆсӑт, судья ёх ӆыв пєӆэӆа вантсӑт па иса ӆўӊӑтсӑт. Хута ӆыв хўӆ веӆпӑсӆӑ­ты ӆӑӊхасӑт, щи тӑхи пирисӑт. Ӆӑӊхасӑт ки, па тӑхия мӑнсӑт.

Вәйт ӆор тыӆӑщ 10-митн Нуви сӑӊхум районӑн Тўкъякӑӊӑн вәӆты мир кәртэӆ 225 оӆа йитум хӑтӆ постӑсӑт. Аӆӑӊ саты кәртӑӊ хуятӑт кўлуп ещаӆт хӑрн ӑктӑщсӑт.  

Поӆнавӑт эвӑӆт кәща нє Лариса Макеева юх­тӑс, ӆўв м вўща ясӊӑт лупӑс па ар оӆ тәса рәпитум хӑннєхуятӑт ишӑк нєпекӑтн мой­ӆӑсӆэ. Щит Тўкъякӑӊ кәща хә Георгий Мат­веевич Гришкин, тўт мӑты тӑхийн рәпитты ики Николай Петрович Себуров, пиркашек нє Августа Савельевна Се­бурова, леккар ими Ва­лентина Геннадьевна Тользина, хотхӑры ӆю­хитты ими Роза Нико­лаевна Тользина. 

Вәйт ӆор тыӆӑщ 28-мит хӑтӆӑн Ёмвошн сәх хўӆ нлкӑт Ӆӑӊӑӆ ас хуща єсӑӆсыйт.

Мўӊ Россия мўвн вәӆӆўв. Кашӑӊ оӆ вәйт ӆор тыӆӑщ 22-мит хӑтӑӆн Россия мўв вот вой хӑтӆ постӑӆўв. 

Вот вой йис вўш эвӑӆт тывӑс. Кашӑӊ мўв ӆўв юкан вот вой тӑйс. Йис пурайн мўвтєӆ мир кў­тэӆн ар ӆаӆяссӑт, тынєс­ман ӊхсӑт па вот вой пӑнӑн тәтьӆясӑт. Вот вой эвӑӆт уша вєрсы, мӑта мўв эвӑӆт ёх вәӆӆӑт. 

Тӑм ванӑн Ёмвошн «Русской географической общество» хотн хӑнты хә Руслан Богордаев па вухаӆь нє Галина Эдин (Яптина) пиӆа вәйтантупсы вәс. Ӆын тӑм ӆўӊӑн Москва хон вошн па па хон пєлӑк Швейцария мўвн Женева вошн шуши мир правайт вәньӆьты вєра вәнӆтыйӆсӑӊӑн.