Айкеԯӑт - Новости

Тӑм йисн юӆн ай тёпиет пиӆа хәӆум оӆ вўш вәнта омӑсты нєӊӑт вәнӆтыйӆты вєритӆӑт. Ван­тэ, ай няврємиет пиӆа вулкємӑты хәӆум оӆ мӑр арсыр йиӆуп па ищи кємн ушӑӊа-сащӑӊа мӑн­ты рәпатайт тывӆӑт. Щитӑт пиӆа рәпитты итәх нєӊӑта шєӊк ӆавӑрта йиӆ. Хӑщум оӆӑтн арсыр рәпата вєрӑт йиӆпатӆыйт. Щит пӑта кашӑӊ ай муй вән вєр мсыева ӆэщӑтты пӑта хӑннєхәя пура-пурайн вәнӆтыйӆты мосӆ.

Вәйт ӆор тыӆӑщ 7-митн «Югра» нємпи ай­кеӆӑт ӑкӑтты хотн округ мир мӑӆты вєр тәты департамент кәща хә Алексей Добровольский пиӆа вәйтантупсы вәс. Ӆўв айкеӆ тәс, хутыса ок­ругев ӆуваттыйн мир мӑӆты вєр ӆэщӑтман вәӆ.

Россия мўвевн «Мир мӑӆты вєр» нємпи нац­проект хўват нивӑӆ вән вєр ӆэщӑтӆы. Щи эвӑӆт мўӊ округевн ӆапӑт вєр тәӆы — щит мир ма-тәса мӑӆты вєр; сӑм, пўвӆупсы мәшӑт тӑйты ёха тӑм йис щўӊкӑтн ма лекщитты; няврємӑт мӑӆты вєр. Щи тумпи айӆат тохтурӑт вәнӆтӑ­ты, тӑм йис щирн ин­тернет хўват мир лек­щитты па па вєрӑт.

Вўнш тыӆӑщ 15-мит хӑтӑӆн мўӊ айкеӆ хӑншты ёх «Хӑнты ясӑӊ», «Луима сэрипос» газетайӊӑнӑн па телерадиокомпания «Югра» хуща рәпитты хуятӑт пиӆа няврємӑт ӆўӊ мӑр рўтьщӑты тӑхия мӑнсўв. Щи тумпи мўӊ пиӆава айкеӆ кӑншты вєра вәнӆтыйӆты эвєӊӑн Олеся Т. па Станислава К. яӊхсӑӊӑн.

Ёмвошн хӑнтэт, вухаӆят «Торум Маа» йис кәр­та мўв вуй нух таӆты тӑхетн рәпитты хуятӑт юх­тыйӆсӑт. Мойӊ ёха йис пурмӑсӑт шавиты тӑхийн рәпитты хә Анатолий Брусницин хӑнты па вухаӆь ёх вәӆупсы оӆӑӊӑн путӑртӑс. Сєсэт, павӑрт хотӑт, ӆупасӑт ванӆтӑс.  Мойӊ хуятӑта әмӑщ вәс йис мир оӆӑӊӑн уша вєрты.

Югра мўв русской географической тӑхи кәща Михаил Савченко вўш тыӆӑщ 2-мит хӑтӑӆн айкеӆ хӑншты ёха «Вәсӑт» нємуп кина вєрты оӆӑӊӑн путӑртӑс. Ӆыв хәнты йисн тӑм мўвн рәпитум ёх оӆӑӊӑн кина вєрӆӑт.

Тӑм ванӑн Ёмвошн мўв-авӑт ӆавӑӆман тӑйты департамент хуща кәща ӆӑӊкӑр хәя рәпитты Егор Збродов па Югра Природнадзор тӑхийн кәща кана вәӆты ики Александр Бирюков ай­кеӆ хӑншты ёх пиӆа вәйтантыйӆсӑӊӑн. Ӆын тә­рум тўтӑт оӆӑӊӑн ай павӑтсӑӊӑн.

Тӑта мосванӑн лыпӑт тыӆӑщ 18-мит хӑтӑӆн Ёмвошн айӆат ёх ӆўӊ мӑр рўтьщӑты тӑхийн вәсум. Щи тӑхи «Юнармеец» нєм тӑйӆ, вантэ, ар пєлӑк вошӑӊ пухӑт па эвет сыр-сыр военно-патриотической вєрӑта иса вәнӆтуман тӑйӆыйт. Ёмвош кәщайт кашӑӊ ӆўӊ пурайн нәмасыя щимӑщ рўтьщӑты тӑхет вєрӆӑт, хута 12-мит оӆ вўш эвӑӆт па 14-мит оӆ  вәнта юхтум айӆат ёх арсыр мосты вєрӑта катӆӑсыйӆӆӑт. Тӑта пухӑт па эвет пиӆа хӑтӆ мӑр вән хуятӑт рәпитӆӑт па сыр-сыр әмӑщ вєрӑта ай ёх вәнӆтӑӆӑт. 
 

Россия мўвевн вәӆты мир поступсы щирн рә­пата кӑншты вєрн тәрум пӑты нётӆыйт. Щирн рәпата кӑншты хӑннєхәя мосӆ «Служба занятос­ти населения» тӑхия иса мосты нєпекӑт пиӆа юхӑтты. 
 

Ас-угорской институтн рәпитты ёх тӑм оӆ няврємӑт кўтн «Югра литературная» нємпи кӑсупсы вєрӑнтсӑт. Щит вєрӆы, ӆәӆн айӆат ёх па няврємӑт округевн вәӆты путрӑт па стихӑт хӑншты ёх оӆӑӊӑн уша ат павӑтсӑт.
 

1997-мит оӆн, хән оӆӑӊ пўш шуши мирӑт яӊ оӆ постӑсы, Объединённой Нацияйт тӑхи ёх нємасыя вәнӆтыйӆты хӑрӑт ӆэщӑтсӑт. Щӑта арсыр шуши мирӑт ООН тӑхи оӆӑӊӑн уша вєрсӑт, вәнӆтыйӆсӑт, муй щирн рӑхӆ вәӆты щирӆаӆ артаӆӑты.