Айкеԯӑт - Новости

Вән кєр тыӆӑщ сухӑнты еӆпийн Ёмвошн «Югра» нємуп айкеӆӑт ӑкӑтты хот йитн округев хўваттыйн вәнӆтӑты па айӆат ёх вєрӑт вантман тӑйты департамент кәща хә А. Дренин, увӑс мир вәнԯ­тӑты вєрӑт әхтыйн кәща нє Н. Костылева, щӑта рәпитты айӆат нє О. Албина, экономической наукайт доктор, «Югра ӆыӆӊуптӑты» оса тӑхи кәща ӆӑӊкӑр хә В. Куриков па Ас-угорской институт эвӑӆт айӆат научной рәпатнек А. Шиянова пиа вәйтантупсы вәс. 

Мирхотн Югра мўв шуши айӆат вәнӆтыйӆты ёха нётупсы вух оӆӑӊӑн путӑртсы. Вантэ, 2019-мит оӆ оӆӊитум юпийн тӑм поступсы йиӆпатсы. 

Увӑс шуши мир рәпатайт кӑншты пурайн «Поддержка занятости населения» нємпи поступсы хўват щимӑщ нётуп­сэт вәӆӆӑт:

– щи вєр тәты тӑхи ёх хӑннє­хә ӆўв саттаӆа рәпата кӑншты пурайн нётӆӑт;
– вошӑтн муй кәртӑтн кәщайт хӑннєхә ям рәпата вәйтты пура вәнты муӆты тыӆӑщ мӑра рә­па­та мӑӆӑт;
– рәпатайӆы ёх тәрум пӑта йи­ӆуп вєра вәнӆтыйӆты китӆыйт;
– рәпатайӆы ёх пиӆа нумӑс­ӆаӆ ӑн шӑкты пӑта тохтурӑт путӑртӆӑт.

Щи тумпи щимӑщ государ­ственной нётупсэт вәӆӆӑт:

Ас нопӑтты тыӆӑщ 7-мит хӑтӑӆн Ёмвош правительства хот йитн межведомственной комиссия тӑхи кәщайт мирхот вєрсӑт, мӑта ут мӑнум пурайн шуши мира ӆэщӑтум нётупсэт оӆӑӊӑн лупсӑт.

Сырыя видеоконференция щирн ияха ӑктӑщум арсыр шуши мир вєрӑт ямӑӆты кәщайт еӆ­пийн айкеӆ Сәрханӆ район увӑс мирӑт Совет кәща  юкана вәӆты нє Вера Кондратьева тәс. Ӆўв путӑртӑс, хуты ин 2018-мит оӆн ӆыв араттєӆн няӆ мирхот Угут, Сытомино, Ульт-Ягун па Лянтор вошӑтн ӆэщӑтсӑт. Тӑм оӆн – па кӑт мирхот Русскин­ской кәртӑн па Угут вошн вәсӊӑн. 

Ёмвошн образования департамент тӑхийн увӑс мир ясӊӑт па культура ӆавӑӆман тӑйты вєрӑт артаӆӑты научно-координационной со­вета ӆуӊты ёх мирхота ӑктӑщийӆсӑт. Ӆыв рәт ясӊӑта вәнӆтӑты вєрӑт наука щирн ӆэщӑтты па щи әхтыйн рәпитты ёха нётупсы щирӑт тәты оӆӑӊӑн путӑртсӑт.

Щи вєрӑт оӆӑӊӑн раз­вития образования инс­ти­тут хущи рәпитты кә­ща ӆӑӊкӑр ими Виктория Клюсова па Югорской уни­верситетн рәт ясӑӊа вәнӆ­тӑты доцент нє Софья Онина айт тәсӊӑн. 

Тӑм йисн округев ӆуватн Югра мўвев здра­воохранения Департамент тӑхи ар щирн шу­ши мирӑт мәш вєрӑт ямӑтӑ. 

Ёмвошн Югра мўв губерна­тор ӆӑӊкӑр хә Юрий Южаков йис тӑхет вәньӆьман тӑйты вєрӑт еӆӆы тәты оӆӑӊӑн мир­хот вєрантӑс. 

Тӑм хўрн Вуӆаӊ ӆаӆьн ӆаӆя­сум хә, Советской Союз Герой нєм тӑюм хә Ни­колай Сирин нєм­пи Ёмвошӑӊ хәтмит ӑшколайн 11-мит класс етшуптӑты хӑнты па вухаӆь пухӑт па эви – щит Алек­сандр Крав­ченко, Анастасия Мас­терских, Фёдор Меров па Пётр Молданов. 

Ӆыв ешавәӆ экзаме­нӑт мӑты питӆӑт, щирн интӑм щи вєра яма ӆэ­щӑтыйӆӆӑт. Мосӆ лупты, Ас нопӑтты тыӆӑщ 24-мит хӑтӆӑн 9-мит класс етшуптӑты няврємӑт па хон пєлӑк ясӊӑт хў­ват экзаменӑт мӑты оӆ­ӊитӆӑт. 27-митн 11 класс етшуптӑты эвет-пухӑт литература па геогра­фия хўват экзаменӑт хӑншты питӆӑт.

Рәпитты ёх емӑӊхӑтӆ Ёмвошн хӑтӆ кўтупн оӆӊитса. 

Арсыр тӑхетн рәпит­ты айӆат ёх, ӑшкола няврємӑт, «Открытие» нємуп тӑхийн рәпитты хуятӑт, пәӆьницайн кӑ­пӑртты ёх, вән нєпека вәнӆтыйӆты эвет, пухӑт па кӑсты вєрӑтн нух пи­тыӆум ветеранӑт вош хулэт хўват хәхӑӆсӑт. Иса 24 команда кӑсты щира ӑктӑщсӑт. Кашӑӊ хӑннєхә хәтсот мєтра кўт хәх­ӆӑс. Щӑӆта еӆӆы па хуят хәхӑӆмӑс, щиты кӑсум ёх хәӆум километра па няӆсот мєтра хәхӑӆсӑт. 

Вән кєр тыӆӑщ 25-мит хӑтӑӆн Ёмвош недропользования департамент хот йитн айкеӆӑт ӑкӑтты ёх Югра мўв вәнтӑтн тўт хәрӑтты тӑхет вантты кәща нє Виктория Четина па округев вой веӆпӑс вєрӑт артаӆӑты тӑхи кәща ӆӑӊкӑр хә Алексей Залибеков пиӆа вәйтантыйӆсӑт.

Вән кєр тыӆӑщ 17-18-мит хӑтӆӊӑнӑн Ёмвошн 13-мит пўш «Информационный мир Югры» нємпи вән мирхот вәс. Тыв айкеӆӑт ӑкӑтты 300 муӆтас хуят юхтыйӆсӑт. Тӑм оӆн мирхот «Цифра близко» нєм тӑйс.