Айкеԯӑт - Новости

Тӑм ванӑн Ёмвошн «Русской географической общество» хотн хӑнты хә Руслан Богордаев па вухаӆь нє Галина Эдин (Яптина) пиӆа вәйтантупсы вәс. Ӆын тӑм ӆўӊӑн Москва хон вошн па па хон пєлӑк Швейцария мўвн Женева вошн шуши мир правайт вәньӆьты вєра вәнӆтыйӆсӑӊӑн. 

Окружной пәӆьницайн вошӑӊ мир ӆавӑӆӆыйт, ӆәӆн мєт ӆавӑрт рак атум мәшн мәшитум ёх пӑты арсыр мосты мирхотӑт ӆэщӑтты. Вантэ, м нумӑсн ӆывеӆ щи мәш эвӑӆт лекщитты кєншӑк питӆ.

Щи оӆӑӊӑн округ пәӆьница кәща ёх, Юг­ра мўв Обществен­ной палата, «Центр граж­данских и социальных инициатив Югры» тӑхи, Югра мўв киникайт ӆўӊӑтты хот ёх мирхотн путӑртсӑт. 

Вәйт ӆор тыӑщ 16-мит хӑтӑӆн Ёмвош «Юг­ра» нємуп айт ӑкӑтты хот йитн айке хӑншты ёх «Вершина Регули» нємпи вєр щирн Кева ңхум хуятӑт пиа вәйтантыйсӑт.

Щи оӆӑӊӑн мирхотн уша йис, мӑта ут «Югра» нємпи айт ӑкӑтты тӑхетн вәйт ӆор тыӆӑщ 15-митн вәс. Тӑмхӑтӆ округ кәща грант вухӑӊ кӑсупсы оӆӑӊӑн путӑр мӑнӑс.

Югра мўвевн тәп итәх вошӑт па кәртӑт «Перечень мест традиционного проживания коренных малочисленных народов Севера» поступсыя хӑншман вәӆӆӑт. Интӑм кәща ёхӆўв щи поступсы йиӆпатты ӆӑӊхаӆӑт, щи нєпека итәх вошӑт па кәртӑт ищи хӑншты мосӆ. 

Яӊ муӆтас оӆ «Торум Маа» тӑхи ёх «Хоттєӆ ёх вәӆупсы рәт мўвев вәӆупсыйн» нємпи вєр тәӆӑт, хута шуши мир рәтӑт нух хӑншӆыйт па ванӆтӑӆыйт. 

Казамкинӑт хоттєӆ ёх Россия мўвтєӆ «Кәртӑӊ хоттєӆ ёх» нємпи кӑсупсыйн нух питсӑт.

Тӑм йисн юӆн ай тёпиет пиӆа хәӆум оӆ вўш вәнта омӑсты нєӊӑт вәнӆтыйӆты вєритӆӑт. Ван­тэ, ай няврємиет пиӆа вулкємӑты хәӆум оӆ мӑр арсыр йиӆуп па ищи кємн ушӑӊа-сащӑӊа мӑн­ты рәпатайт тывӆӑт. Щитӑт пиӆа рәпитты итәх нєӊӑта шєӊк ӆавӑрта йиӆ. Хӑщум оӆӑтн арсыр рәпата вєрӑт йиӆпатӆыйт. Щит пӑта кашӑӊ ай муй вән вєр мсыева ӆэщӑтты пӑта хӑннєхәя пура-пурайн вәнӆтыйӆты мосӆ.

Вәйт ӆор тыӆӑщ 7-митн «Югра» нємпи ай­кеӆӑт ӑкӑтты хотн округ мир мӑӆты вєр тәты департамент кәща хә Алексей Добровольский пиӆа вәйтантупсы вәс. Ӆўв айкеӆ тәс, хутыса ок­ругев ӆуваттыйн мир мӑӆты вєр ӆэщӑтман вәӆ.

Россия мўвевн «Мир мӑӆты вєр» нємпи нац­проект хўват нивӑӆ вән вєр ӆэщӑтӆы. Щи эвӑӆт мўӊ округевн ӆапӑт вєр тәӆы — щит мир ма-тәса мӑӆты вєр; сӑм, пўвӆупсы мәшӑт тӑйты ёха тӑм йис щўӊкӑтн ма лекщитты; няврємӑт мӑӆты вєр. Щи тумпи айӆат тохтурӑт вәнӆтӑ­ты, тӑм йис щирн ин­тернет хўват мир лек­щитты па па вєрӑт.

Вўнш тыӆӑщ 15-мит хӑтӑӆн мўӊ айкеӆ хӑншты ёх «Хӑнты ясӑӊ», «Луима сэрипос» газетайӊӑнӑн па телерадиокомпания «Югра» хуща рәпитты хуятӑт пиӆа няврємӑт ӆўӊ мӑр рўтьщӑты тӑхия мӑнсўв. Щи тумпи мўӊ пиӆава айкеӆ кӑншты вєра вәнӆтыйӆты эвєӊӑн Олеся Т. па Станислава К. яӊхсӑӊӑн.