Айкеԯӑт - Новости

2019-мит о ООН нємуп Генеральной Ассамблея кәща ёх поступсы щирн иса шуши мир ясңӑт ӆєрамтты оа аӆьсы. Щит пӑта округев  кәщайт ӆӑӊхасӑт Югра мўв кашӑӊ ӑшколайтн оӆӑӊмит вәнӆтыйӆты хӑтӆ рәт ясӑӊ урокн оӆӊитты. Еӆӆы па ӑнтә тәп тӑм оӆ рәт ясӑӊ оӆа аӆьщӑты, еӆӆы оӆӑт ищиты ӑӊки ясӊев ӆєрамтман вәӆты питӆўв.

Щиты лыпӑт хойты тыӆӑщ кимит хӑтӑӆн Нях вошн 6-мит ӑшко­лайн иса хәтмит клас­сӑн вәнӆтыйӆты няврє­мӑт «Рәт ясӑӊ йиӆуп вәӆупсыйн» нємпи отк­рытой урока ӑктӑщ­сыйт. Иха ӆўӊӑтты ки, 150 няврєм урокн вәс.

Мєт оӆӑӊ хӑннєхә рәпатая вўтыйн сыры вантӆа, муй тӑхийн па муй иты рәпитӑс, муй арат оӆ кӑпӑртӑс, муй рәпата вєрн хошӆ ӆэщӑтты. Щи пӑта кӑпӑртты вўнтты нєпекн хуӆыева тӑм суртӑт аӆьты мосӆ. Вантэ, кашӑӊ кәща мєт сыры сора, тәса па ма рәпитты хуят кӑншӑӆ. Резюме нємуп нєпек хәӆум, нӆкєм хӑншты мосӆ. Щӑӆта щи нєпекӑт ар вўрн ӆэщӑтаӆн! Муй нын хошӆӑты вєрты – иса мсыева хӑншаӆн! 

Тӑм ванӑн «Откры­тый регион» нємуп тӑхийн айкеӆ хӑншты ёх пиӆа Югра мўвн оса вєрӑт тәты кәща ими Ирина Макси­мова па оса вєрӑт тә­ты департамент ху­ща кәща кана рәпит­ты ики Алек­сандр Демен­ко вәйтантыйӆсӑӊӑн.  

Югра мўв общест­венной тӑхи кәща ими И. Максимова лупӑс:

Лыпӑт хойты тыӑщ 11-мит хӑтӑн Югра ԯуваттыйн  мўв иӆпи питы вуй вўты па мўв-авӑт ӆавӑӆты вєрӑт тәты департамент тӑхи ёх округевн шуши мир вәӆупсы мӑӆты па тўӊматты кєши грант вух ёша павӑтты пӑта кӑсупсы эщӑтсӑт. Вантэ, увӑс мирӆўв вәӆупсэв щиты ӆэщӑтты мосӆ, ӆәӆн иса шуши хуятӆўв йис пурайн вәӆты рәт ёхӆаӆ щирн ат вәсӑт. Артаԯӑты хуятӑт әхтыйн тыв Александр Комиссаров пирисы.

Иха ԯўңӑтты ки, кӑ­супсыя 11 вохты нєпек китсы. Кӑсупсы оӆӊитум еӆпийн и вохты нєпек йира вўсы. Щит пӑта артаԯӑты ёх  ещаԯт тәп 10 хӑннєхә проект вєр ванԯтӑс. 

Щи оӆӑӊӑн нємасыя мирхотн нәмӑссўв, мӑта ут лыпӑт хойты тыӆӑщ 12-митн Ёмвошн вәс.

Тыв округев вошӑт па кәртӑт эвӑӆт 150 хуят юхтыӆӑс, щит кәщайт, культура вєрӑт тәты, оса рәпата вєрты па ай­кеӆӑт ӑкӑтты ёх.

Мєт сыры ӑкмум мир 2015-мит оӆн вєрум мєт м ай кина вантсӑт, щӑ­та «Скрэтч» нємпи ариты ёх «Память» ар арисӑт. 

Лыпӑт хойты тыӆӑщ 9-мит хӑтӆ вўш эвӑӆт ай тӑхет потты тыӆӑщ 4-мит хӑтӆ вәнты Ёмвошн мєт ма шӑкмӑтӆӑты ёх кўтэӆн кӑсӆӑт. «Кубок мира по шахматам 2019» нємпи кӑсупсы «Международная шахматная федерация» тӑхи ёх ӆэщӑтсӑт.

Кӑсупсыя 46 мўв эвӑӆт 128 хӑннєхә юхтӑс, ӆыв кўтэӆн 28 хуят Россия мўв эвӑӆт вәӆӆӑт. Кӑт хуят – Даниил Юффа па Максим Чигаев – Тю­мень вош эвӑӆт. 

Лыпӑт хойты тыӆӑщ 10-мит хӑтӆӑн Ёмвошн шуши мир общинайта нётты щира округ мўв иӆпи питы вуй вўты па мўв-авӑт ӆавӑӆты вєрӑт тәты департамент ёх нємасыя еӊта пӑсан вєрсӑт.

Тӑта кәщайт, шуши мир оса тӑхет, ӆыв сат­тэӆа вєр тәты 50-кєм хуят ӑктӑщсӑт.

Тӑм оӆ лыпӑт хойты тыӆӑщ 2-мит хӑтӆӑн Нуви сӑңхум район Ваньщавӑт кәртӑн мойң ёх ӑктӑщийӆсӑт. Щӑта вуӆаң ӆаӆьн ӆаӆясум ёх нәмӑӆмӑты щира йиӆуп кев хурас пўншсы.

Ваньщавӑта Нуви сӑң­хум район кәща хә Сер­гей Маненков, Поӆ­на­вӑт вош кәща нє Лариса Макеева па па мойң хуятӑт юхтыйӆсӑт.

Мӑнум тыӆӑщн Ёмвоша па хон пєлӑк Эстония мўв эвӑӆт Тарту вош эвӑӆт Эстонской нацио­нальной музей эвӑӆт кина вєрты хә Майдо Сельгмяэ, научной рәпатнек Светлана Карм па хур вўты хә Арп Карм юхтыйӆсӑт. 

Ёмвошн ӆыв «Окруж­ной Дом народного творчества» хота мойӊа юхтыйӆсӑт. Тӑта ӆыв вантсӑт, муй щирн ву­хаӆь хә Анатолий Вади­чупов арсыр нарӑсты утӑт вєрӆ, хутыса хӑн­ты имет Мария Эккерт, Людмила Зубакина па Валентина Швецова (Ер­ныхова) хурамӑӊа ёнт­ӆӑт. Имет па мўв эвӑӆт юхтум ёха хӑнты ар арисӑт.

Вәйт ӆор тыӆӑщ 28-мит хӑтӆӑн Нуви сӑӊхум район Поӆнавӑт вошн вән мӑӊхӑтӆ вәс. Щи хӑтӆӑн «Историко-краеведческий музей» нємпи хот пўншсы.