Кашӑӊ мир, кашӑӊ хӑннєхә тӑм хӑтӆ мӑнты па хәнты вәӆум кан вәӆупсы тӑйӆ. Хӑтӆӑт сора мӑнӆӑт. Ма ӆӑӊхаӆум рәт ёхӆамн няврємӑт вәнӆтӑты вєр тәты оӆӑӊӑн хӑншты. Ма иса уша вєрсум, хуйтат хута рәпитсӑт, муйсӑр хотӑӊ ёхӆўв тӑм вєр тәсэӆ па ин тӑм вәнты тәӆӑт. 

Иса хотӑӊ ёхӆўв х ӆєр, мӑта хуя­тӑт няврємӑт вәнӆтӑты вєра катӆӑссӑт, нӆ поколения тӑйӆ, щит 16 учитель хуят. 
Мєт оӆӑӊ х сўвн Лидия Сидо­ровна Алфёрова вәӆ. Ӆўв 1941-мит оӆн лыпӑт тыӆӑщ 26-митн Сўмӑтвош районӑн Тўкъякӑӊ кәр­тӑн сєма пит­маӆ. 1958-мит оӆн Ёмвоша педагогичес­кой училищая вәнӆтыйӆты мӑнӑс. Щи тӑхеӆ ӆўв 1962-мит оӆн етшуптӑсӆэ, ай няврємӑт вәнӆтӑты нєӊа йис. Щи пийн Сәрханӆ района Чеускино кәрта ӑшкола-интерната рәпитты китсы. Тәп рәт мўвӆа сӑмӑӆн таӆсы, ӆўв еша вәс Сўмӑтвош района вәӆ­ты кєрӆӑс. 1973-мит оӆн Тэк кәрта юхтӑс, оӆӊӑӆн детский сад хущи воспитателя павӑтсы, ӛхӑт па кәща нєӊа щӑта йис. 1980-мит оӆн Лидия Сидоровна Тэк ӑшкола-интерната рәпитты мӑнӑс, воспитатель нєӊа щӑта йис. Ӆўв иса вәӆмаӆ мӑр, щит 40 тӑӆ, няврємӑт пиӆа рәпитӑс. Яӊ оӆ мӑр Тэк ӑшколайн хӑнты ясӑӊ урок тәс. Тэк кәртӑӊ хуятӑт нумсӑтн ӆўв рәпатаяӊ, м учителя, хӑннєхә пєӆы сӑмӑӊ па нявлӑк хуята вәс. Ӑшкола рәпатайӆ тумпи Лидия Сидоровна па оса рәпата ищи тәс. Ӆўв 1974-1980-мит оӆӑтн сельской совет депутата пирийӆсы, «Знание» оса тӑхия ӆуӊман вәс, народной за­седателя па хӑнты ясӑӊӑн лектора рәпитӑс. Тэк ӑшколайн родительс­кой комитет кәща нєӊа павтыйӆсы. Щи тумпи Лидия Сидоровна хӑнты арӑт хӑншӑс па арийс, Тэк кўлупн етнхотӑтн арийс. 
Икеӆ – Александр Иванович Ал­фёров (1944)–ищи Ёмвошн пе­дагогической училища етшуптӑс. Ӆўв ай няврємӑт вәнӆтӑты хәя йис, ӑшколайн 30 тӑӆ рәпитӑс. Светлый вошн воспитателя вәс. Хән щи хот лӑп тәхӑрсы, шәкащты няврємӑт хотн рәпитӑс, щӑӆта пенсияя мӑнӑс. Щӑта вәӆум пушхӑт нәмӆӑт, ӆўв хӑрщи, така иньщӑсты, рәпатаяӊ хәя вәс па няврємӑт ищи рәпата вєрӑта вәнӆтӑс. 
Ӆын Александр пухӑн (1964) 1993-мит оӆн Тәпӑӆ вошн педагогической институт етшуптӑс. Ӆўв Тэк кәртӑн история урокӑт тәс. Иса ӑшколайн 21 тӑӆ рәпитӑс, учителя – 15 тӑӆ па щи пийн завхоза – 6 тӑӆ. 2002-мит оӆн Москва хон вошн институт управления тӑхийн юрис­та вәнӆтыӆӑс. 

Кимит Владимир пухӑн (1967) 1988-мит оӆн ищи Тәпӑӆ вошн педагогической институт етшуптӑс. Ӆўв ищи вет оӆ мӑр Тэк ӑшколайн история урокӑт тәс. Ӑшкола кәщая павтыйӆсы, шєӊк апрӑӊ па нумсӑӊ хәя вәс.
Хәӆмит Юрий пухӑн (1977) – 1983-1992-мит оӆӑтн Тэк ӑшколайн вәнӆтыӆӑс, 10-11 классӊӑн Свет­лый кәртӑн етшуптӑсӆэ. Щӑӆта 1995-1998-мит оӆӑтн Тәпӑӆ вошн педагогической институтн вәнӆ­тыӆӑс, физкультура урокӑт тәты хәя йис. 1998-мит оӆн Российской Армияя служитты вохсы. Чеченской республикайн Моздок вошн вәс, щи пурайн щӑта ӆаӆясты вєрӑт вәсӑт. 1999-мит оӆн ван хӑтӆуп тыӆӑщн 31-мит хӑтӆӑн щи мўвн ухӑӆ пунсӑӆэ. М.Н. Табун щи хотӑӊ ёх оӆӑӊӑн хӑншӑс:  «Щи вән шәка питум ӑӊкие пухӑӆ хӑншум пищма эвӑӆт ясӊӑт путӑртӑс: «Ма ай пушхим, ма Юра ай пухим». Юра пухиеӆ тӑмӑщ ясӊӑтн ӑӊкеӆа пищмайт хӑншиӆӑс. Щи пищмайт ӑӊкеӆн сӑм вўшн тӑйсыйт. Ӆўв пӑтэӆа пухӆаӆ мєт мосты па сӑмӑӊ хуятӑт вәсӑт». 
2000-мит оӆн вәйт ӆор тыӆӑщн Юрий пухӑӆ шәӊӑт «Орден Му­жества» мевӆ посн (посмертно) мойӆӑсы. 
Александр вән пухӑн ими – Роза Николаевна ищи няврємӑт пиӆа рәпитӑс. Ӆўв Сәрханӆ вошн пе­дагогической институт етшуптӑс, ай пушхӑт вәнӆтӑты па ӆавӑӆты нєӊа йис. Тэк кәртӑн «Шоврие» садик хущи воспитателя, щӑӆта па кәща нєӊа рәпитӑс. Ищиты Поӆнавӑт ӑшколайн воспитателя вәс. Иса рәпата вєрӆ 33 оӆа йис.
Ӆын Александр пухӑн 2012-мит оӆн Ёмвошн Югорской университет етшуптӑс, физкультура урокӑт тәты хәя йис. Ӆўв рәпата вєрӆ яӊ тӑӆа йис, щит эвӑӆт ӑшколайн хәт тӑӆ рә­питӑс. Тэк ӑшколайн интернатн воспитателя вәс, щӑӆта Нягань вошн шәкащты няврємӑт тӑйты хотн воспитателя рәпитӑс. 2020-мит оӆн электромонтёра вәнӆтыӆӑс, ин «ЮРЭСК» тӑхийн рәпитӆ. Ӆўв хәӆум няврєм єнмӑӆтӑӆ. 

Александр Татьяна иимеӆ Москва хон вошн Шолохов нємпи гуманитарной университетн вәнӆтыӆӑс. 2004-2017-мит оӆӑтн Тэк вош садикн рәпитӑс. Щӑӆта 2017-2022-мит оӆӑтн Нягань вошн «Росинка» садикн па иса 18 тӑӆ рәпи­тӑс. Алек­сандр па Татьяна Елена эвӑн Ёмвошн технолого-педагогической колледж етшуптӑс. Воспитателя йис па ин Сўмӑтвошн «Хӑтӆые» садик хущи рәпитӆ, иса рәпата вєрӆ 8 оӆа йис. Ӆўв нӆ няврєм тӑйӆ. Кимит Алена эвӑн ищи Ёмвошн технолого-педагогической колледж етшуптӑс, ай няврємӑт вәнӆтӑты нєӊа йис. 2024-мит оӆ вўш эвӑӆт Сўмӑтвош начальной ӑшколайн рәпитӆ. Ӆўв рәпата вєрӆ тәп хәӆум тыӆща йис.
Ма шєӊк ӆӑӊхаӆум рәтӆам оӆӑӊӑн хӑншты, мӑта ёх няврємӑт вәнӆтуман рәпитсӑт па рәпитӆӑт. Иса рәт ёхӆам путрӑт нух хӑншсӑӆӆам. Ма нәмӑсӆум, щит мўӊ няврємӆўв па хиӆыӆўв пӑта әмӑщ питӆ хәнты рәт хуятӆаӆ оӆӑӊӑн уша вєрты. Тӑмхӑтӆ ма Алфёровӑт няврємӑт пиӆа рәпитты рәт оӆӑӊӑн хӑншсум. Па еӆӆы тӑм вєрєм па тәты питӆєм па па ёхӆам оӆӑӊӑн па хӑншӆум. 

Путӑр хӑншӑс:
Юлия Лапеко