Ван хӑтӆуп тыӆӑщ 15-мит хӑтӆӑн Мегион вош киникайт ӆўӊӑтты хотн мєт оӆӑӊ пўш «Югра мўвев – ма вәӆупсєм» вәйтантупсы вәс. Тыв вәнӆата вум хуятӑт па айӆат ёх иха ӑкӑтсыйт, ӆәӆн кўтэӆн сӑмӑӊа путӑртты, арӑт ариты, ӆўӊӑтты арӑт хурамӑӊа лупты, сыр-сыр партупсэт тўӊматты, әмӑщ юнтупсыйн кӑсты па єпӆӑӊ шай яньщты. 

Етнхот оӆӊитумн «Рос­сия мўв истокӑт» нємпи оса тӑхи кәща ими Надежда Ткаченко ӑктӑщум ёх ещаӆт «Ма Югра мўвєм» нємпи хӑн­шум арӆ «Родные напевы» арӑӊ-якӑӊ ёх пиӆа мойӆӑс.
Щи пийн ӑктӑщум имет-икет, эвет па пухӑт пӑта «Югра мўвев сӑмӑӊа тӑе!» юнтупсы вєрсы. Тӑта шуши мир йис вәӆупсы, катра щирӑт, шўкщӑты вєрӑт оӆӑӊӑн иньщӑсуп­сэт вәсӑт.
Еӆӆы Н.В. Ткаченко хӑн­шум «Хутыса Йоська хӑнты хә ими кӑншӑс» нємпи моньщ хўват Ме­гион вош ӆуваттыйн «Юг­ра ӆыӆӊуптӑты» оса тӑ­хи кәща нє Анна Горлова ёнтум хурамӑӊ аканят пиӆа тӑм әмӑщ моньщ мойӊ мира ванӆтӑс.
Щӑӆта ӑктӑщум мира «Нәптӑӊ Югра» киникайт ӆўӊӑтты пре­зидентской тӑхийн вәӆты Югра мўв путрӑт па ӆў­ӊӑтты арӑт хӑншты ёх нєпекӑт ванӆтӑсыйт па имухты мєт сӑмӑӊа тӑй­ты ӆўӊӑтты ар путӑртты питсӑт.
Сыр-сыр юнтӑӊ пар­тупсэт пийн мойӊа юх­тум мир мавӑӊ пӑсана омӑссыйт па єпӆӑӊ шайн ньщӆтӑсыйт. Тӑм етн хот шєӊк ӆәхсӑӊа, әмща па сӑмӑӊа тывӑс. Вантэ, ай ёх вәнӆата вум хуятӑт пиӆа и вєрн, и нумӑсн, и унтасн арсыр партупсэт вєрсӑт, кўтэӆн кӑссӑт, арӑт арисӑт, ӆўӊӑтты арӑт ӆўӊӑтсӑт па мєт ӆәхсӑӊа йисӑт. 
Мосӆ лупты, мавӑӊ-хўӆӑӊ пӑсан «Единая Россия» партия ёх ӆэщӑтты нётсӑт.

Анна Горлова, Мегион вош
Хӑнты ясӑӊа тулмащтӑс: Ирина Пословская