«Практики личной филантропии и альт­руизма» Потанин фонд нємпи тӑхи ёх унтасн Манстӑр мўв Шӑншвош йис пурмӑсӑт ӑкӑтты па шавиты хотн рәпит­ты хуятӑт 2024-мит оӆн «Увӑс моньщӑт» (рўщ щирн «Северные рассказки») нємуп вєр ӆэщӑтман вәсӑт.

Тӑм әмӑщ етнхот вант­ты щира театр хота мӑнты ӑн мосӆ, вантэ, щи ущхўль па әмӑщ ванӆтӑты етнхот нын хущана мойӊа юхӑтты вєритӑӆ. 
Шӑншвош музей хуща рәпитты нєӊӑт «Увӑс монь­щӑт» нємпи вєр шуши мир моньщӑт хўват кукольной спектакль иты ӆэщӑтсӑт. Вантэ, ай пушхӑта щиты мєт ущхўӆь вантты.
Щиты вєрӑӊ нєӊӊӑн Валентина Пащанина па Лидия Старкова моньщӑт ванӆтӑты пӑта ай хотые, ампар, ай хопиет, тунты хушапӑт, ай нянь кәр па па шуши мир утыет вєр­сӑт. Щӑӆта хурамӑӊ, єӆ­пӑӊ хӑнты ӆәмӑтсухӑт ӆәмӑтман па шуши мир йис пурмӑсӑт ванӆтуман нєӊӊӑн ай тёпиета тӑӆаӊ спектаклят ванӆтӑсӑт.

Пушхӑта мєт әмӑщ хӑнты мир поэтесса ими Мария Вагатова хӑншум «Няние» нємуп моньщ хўват вєрум етнхот вантты вәс. Тӑм моньщ щирн няврємиет айтєлн вәнӆтӑӆыйт, хуты няние шавиман тӑйты мосӆ, ӆєваса вущкӑты, юнтты нянь пиӆа иса ӑн рӑхӆ. 
Вєрӑӊ нєӊӑт ясӊӑт щирн, етнхот етшум пурайн няв­рємӑт иньщӑсты ӑн мосӆ, мәстӑс муй ӑнтә ущхўӆя ӆэщӑтум моньщ – пушхӑт вєншӑт хўват имухты уша йиӆ, тӑм моньщӑӊ хӑр ӆывела шєӊк әмӑщ!
Щи пийн няврємӑт єп­ӆӑӊ лыптӑӊ шайн яньщ­тӑӆыйт па нянь кәрн вєрум няниенӑн ӆапӑтӆыйт.
Хурамӑӊа вєрум шуши мир пурмӑсыет ёша вў­ты па ма вантты ищи рӑхӆ. Ӆывеӆа, нюр, әмӑщ, тӑм ванӑн щи пурмӑсӑт моньщӑӊ театр хуща вант­сӑт, ин па ёшн катӑӆты щир вәӆ. Тёпиет вантум театр оӆӑӊӑн юӆн ӑӊкета-ащета, ӆәхӑс ёха путӑрт­ӆӑт ки, лынана, нюр, әмӑщ вәс, щирн еӆӆы ищи саты рәпитты мосӆ.

Вән классӑтн вәнӆтыйӆ­ты айӆат ёх, кәртӑӊ мир пӑта шӑнш вошӑӊ нєӊӊӑн «Шитам рәт мўвим» нємпи ванӆтупсы ӆэщӑтсӑт. Па щитӆ пӑнӑн тәтьӆюман вән ёха щи аӆьӆӑт.
Тӑм ванӆтупсы хурӑт хӑншты хӑнты ики Мит­рофан Тебетев шәӊӑт оӆӑ­ӊӑн вәӆ. Вантэ, тӑм оӆн ӆўв 100 оӆ сєма питум хӑтӆ вўш эвӑӆт ӆәӆн постӑс.
Тӑта нарӑсты хӑт па па хӑнты мир пурмӑсӑт вантты рӑхӆ.
Валентина Пащанина па Лидия Старкова ар ӛр пунӆӑт, ӆәӆн няврємӑта па вән хуятӑта ӆыв ӆэщӑтум вєреӆ әмӑщ вәс, ӆәӆн ка­шӑӊ хӑннєхә хӑнты мир йис вәӆупсы оӆӑӊӑн уша ат вєрсӑт па вєккеши сӑм ӆыпийн ат хӑщӑс. 
Щиты лын Манстӑр, Ну­ви сӑӊхум па Сўмӑтвош районӑтн, щит: Шӑншвош, Манстӑр вош, Приобье, Анд­ра, Сергино, Ным Няръ­ёх, Нх, Нуви сӑӊхум во­шӑт па Игрим кәртӑн ми­ра әмща вєрум моньщӑӊ етнхот па ванӆтупсы аӆьсӑӊӑн.

Валентина Пащанина
Хӑнты ясӑӊа тулмащтӑс: Ирина Самсонова