Мӑнум оӆ юхи хӑщум хӑтӆӑтн Ёмвошн округ дума 41-мит мирхот вәс. Депутатӑт щи мирхотн арсыр мосты вєрӑт оӆӑӊӑн путӑртсӑт па мосты поступсэт вўсӑт. 

Тӑм мирхотн «О взаи­модействии ор­ганов государственной власти Ханты-Мансийского ав­тономного округа – Юг­ры с Ассоциацией «Со­вет муниципальных образований Ханты-Мансийского автоном­ного округа – Югры» поступсы вўсы. Щит ок­руг правительства за­конодательной ини­циа­тива щирн тывӑс. Округ кәща хә Руслан Кухарук щи оӆӑӊӑн лупӑс:

- Мўӊ ар пўш путӑр­тыйӆсўв, хуты федераль­ной, региональ­ной па му­ниципаль­ной кәща тӑхет ёха и щирн, ха катӆӑс­ман рәпитты мосӆ. Щит Российской Федерация Конституция хущи хӑнш­ман вәӆ. Па Россия пре­зидент партупсы щирн, тӑм поступсы вєр ӑнтә тәп федеральной, ре­гиональной щирн ищи тўӊщирӑӊа ӆэщӑтты мосӆ. Щи пӑта мўӊ тӑм закон вєр дума мирхота китсўв, ӆәӆн депутатӑт щит нух ат вантсӑт. Мосӆ лупты, депутатӑт тӑм поступсы вўсӑт. Ма Послание пу­тӑрн лупсум, хуты тӑм­хӑтӆ региональной па муниципальной тӑхета йиӆуп щирн рәпитты мосӆ. Тӑмхӑтӆ губерна­тор пиӆа нємасыя Совет тӑхи рә­питӆ, хуӆта му­ниципалитетӑт кәщайт ӆуӊӆӑт. Па ма нәмӑсӆум щи Совет тӑхийн нємасыя профильной Комиссия тӑхет ӆэщӑтты, хута мосты вєрӑт нух вантты питӆыйт.  

Ищиты тӑм дума мир­хотн Нефтеюганской район кәща нє Алла Боч­ко хәӆум оӆ мӑр вєрты рәпатайӆ оӆӑӊӑн путӑр­тӑс па хутыса районӑн вєрӑт мӑнӆӑт. 

Тӑмхӑтӆ Нефтеюганс­кой районӑн 47486 хӑн­нєхә вәӆ, тӑта округев ӆуваттыйн мєт шимӆ ӑн рәпитты хуят вәӆ, 0,02% арат. Иса рәпата вєрӑт кўтн район экономика мўв иӆпи тащ вєрӑт щирн рәпитӆ, щит па вєрӑт эвӑӆт 99% питӆ. Щи пӑта тыв ар инвестиция вух юхӑтӆ. 

Ар нётупсы районӑн СВО тӑхийн ӆаӆясты хуятӑта па ӆыв хоттєӆ ёх­ӆаӆа ӆэщӑтӆы, щит 146 хоттєӆ ёх пӑта. Ӆыв пӑтэ­ӆа нємасыя социальной паспортӑт вєрсыйт. 39 се­мья йиӆуп хотӑтн мӑсыйт. Хәӆум оӆ мӑр 70 тон­на арат гуманитарной нё­туп­сы ӑкӑтсы. 

Районӑн ар вєр ӆэщӑтӆы, ӆәӆн айӆат ёх па няврємӑт мосты щирн єнмӑӆты.  Айӆат ёх пӑта районӑн няврємӑт вәнӆтӑты 26 хот вәӆ, щит иса йиӆуп, тўӊщирӑӊа вєрум хотӑт. 2020-мит оӆн районӑн «Точка роста» ӆапӑт тӑхи пўншсы, хуӆта няврємӑт тӑм йис йиӆуп вєрӑта вәнӆтыйӆты ӊхӆӑт.

Па щи тумпи щӑта вәӆты хӑннєхуятӑт пӑта арсыр мосты вєрӑт ӆэщӑтӆыйт.

Нын вәйтӆӑты, ван хӑт­ӆуп тыӆӑщн округ кәща хәев Р. Кухарук Послание ясӑӊ тәс, хута округев еӆӆы вәӆты щирӑт оӆӑӊӑн путӑртӑс. Шуши мирӑт Ассамблея кәща, округ дума депутат хә Е.Д. Айпин щи оӆӑӊӑн щиты лупӑс:

- Округ кәща хәев путрӑӆн ар вуӆаӊ вєр оӆӑӊӑн путӑртӑс, мӑта утӑт мўӊева еӆӆы вєрты мосӆ, щит экономической, социальной, культурной па па мосты вєрӑт. 
Шуши мирӑт оӆӑӊӑн ӆўв лупӑс, хуты округевн йис­тєӆн шуши мирӑт вәӆӆӑт, щит хӑнтэт, вухаӆят па вәнт юрнӑт. Па ӆыв вәӆупсэӆ туӊщирӑӊа вєрты пӑта, ар вєр мосты щирн ӆэ­щӑтты мосӆ. Щи пӑта ок­руг Правительства хущи шуши мирӑт вєрӑт әхтыйн нємасыя Уполномоченной хӑннєхә рәпитты питӆ. Тӑмхӑтӆ шуши мир вєрӑт 9 департамент хущи тә­ӆыйт па Уполномоченной хӑннєхә щит нух вантты па мосты щирн тўӊматты питӆ. Щит, ма щирємн, шєӊк м вєр!

Путӑр хӑншӑс: 
Надежда Вах