Финно-угорской писателят кимит вән мирхот пурайн Ас-угорской институт киникайт ӆўӊӑтты хотн Ямал мўв эвӑӆт юхтум писателят пиӆа вәйтантупсы вәс. Тӑмхӑтӆ мўӊ нынана, «Хӑнты ясӑӊ» газетаев ӆўӊӑтты ёха, Юлия Николаевна Накова (Сязи) оӆӑӊӑн хӑншӆўв.

Щимӑщ нєм Юлия Николаевна Нако­вайн хӑншум киника нєм тӑйӆ. Тӑм хӑнты ими ар оӆ Ямал мўв Пуӆӊавӑт вошн хӑнты мир ради­вайн па телевиденияйн передачайт вєрӆ, щи тум­пи мўӊ хӑнты вәӆупсэв оӆӑӊӑн путрӑт па ӆўӊӑтты арӑт хӑншӑӆ. 
Ю.Н. Накова пиӆа вәй­тантупсы ӆўв апщеӆ, институтн рәпитты ай­ӆат литературовед нє Вик­тория Сязи тәс. Ӆўв мєт сыры мойӊ нєӊа ясӑӊ мӑс, Ю. Накова лупӑс:

- Вўща вәӆаты, тынӑӊ ӆәхсӑт, хӑнты щирн хӑнш­ты ёх! Ин Ёмвоша тӑм вән мирхота Пуӆӊавӑт вош эвӑӆт Москва хон вошев мухты юхӑтсум па Ямал мўв мир эвӑӆт вән вўща ясӑӊ тәсум. 
Ма вўӆы тащ ӆавӑӆты, хўӆ веӆпӑсӆӑты хӑнты хоттєӆ ёх хуща сєма пит­сум. Мўӊ семьяевн ар няврєм вәс, ма – мєт ай. Яйӆам, упиӆам вўӆы тащн сєма питсӑт. Ма сєма питум пурамн ӑӊкєм-ащєм Катравошн вәӆты па рәпитты питсӑӊӑн. Щӑта ма Ас хӑӆты тыӆӑщ 12-мит хӑтӆӑн 1968-мит оӆн сєма питсум. 
Ма рәт мўвєм – щит Асэв пусӆ – Суп юхан, щит Увӑс Кев хуща мўв, щит Ямал мўв Приуральской район. Щӑта тӑм йис пура вәнты вўӆєӊ ёх тащӆаӆ пиӆа Кев хуща касӑӆӆӑт. Сєма питум пурайн Юлия нємн мӑсыюм, хӑнты нємєм – Воснє (касум щирн Вошнє). Йина ма вәӆупсєм хўват вән Пуӆӊавӑт вошн вәӆӆум. Айтєӆн ӑӊкєм-ащєм пиӆа касӑӆмємн па ванкўтӆы нәмӑссум, муй ӆампа хурамӑӊ Увӑс мўвим. Ӆўӊ пурайн хўӆ веӆпӑсӆуман вәсўв. Щиты Ас пєлӑк эвӑӆт вўт кәртӑн омӑсты вет тунты хот шиваӆӑсум ки, имухты нәмӑссум – щит вет хутӑӊ вой иты. 
«Век партум вәӆупсы» киникайн Ю.Н. Накова ӆўв вәӆупсэӆ оӆӑӊӑн хӑншӑс – тӑм киника ӆўӊӑтты ёх Юӊ вос (Еӊк вош) хӑнты рәт, Кев йиры вәрт, мӑӊ наӊк, Нуви ӆов вәрт па па приуральской хӑнтэт йис вәӆупсы оӆӑӊӑн уша вєрӆӑт.

Тӑм вәйтантупсыйн Юлия Накова рәт хӑнты ясӑӊӑн «Нави ӆоньщ» (ка­сум щирн «Нуви ӆоньщ») ӆўӊтарӑӆ ӆўӊӑтсӑӆэ:

Йиӆап нави ӆоньщ мўв эӆты сыйияӆ,
Нави йиӆап ӆоньщ мўвев иӆ питӆаӆы,
Нэӊхэт, хотӑт, воят аса навет, навет
Порха, милэм тэӆна ӆоньщ хрӑсна питӑс.

Моӆщаӊием посӑт, 
ӆоньщӑт пеӆа вантман,
Ищи тоӊха лытӆӑт нави храс тӑйты
Эвтам, храм вайна мўвем хўват ӊхӆам,
Ӆоньщӆы ущман тӑйӆэм сэӊк марэмӑсаят.

Йиӆап щирна ӆоньщем ным мўвевна ёхтӑс
Турмев паӆ паӆатӑӆ, мўвӆаӆ еӆ ныӆаят
Ӆоньщем пиӆна ха мин па амтӑтӆиӆман,
Нави ӆоньщем пиӆна и храс тӑйӆаман.

Ӆоньщем пеӆа вантӆам, хоты ӆўв сыйияӆ,
Нави ӆоньщем хрпи ищи ӆытӆам йиты.
Ӆоньщем иты сыйӆы мўвна ёхӑттыи,
Храм ӆоньщем пиӆна янман апӑӆтыты.

Тӑӆаӊ ӆўӊӑн, сўсн па тови прайна
Ащем, омем, яем па пием пиӆна
Нярув ӆоньщев юрна нмӑс ёӆатыйи,
Ӆоньщем юкты пра арсвна пнтыйи.

Нмсэмна ма ӆытӆам, ӆоньщем пиӆна юкты,
Мўвна уӆам йисэм парта ӑнт кӑстыйи
Пукнӑӆ, эвтам нэӊхы хй па, мосӑӊ, ищи,
Йиӆап ӆоньщем пра еӆащӆаяӆаӆы!

Юлия Накова – шєӊк әмӑщ хӑннєхә, ӆўв хӑнты йис вәӆупсы оӆӑӊӑн уша вєрӆ, нєпекӑт хӑншӑӆ. Ӆўв ястӑс, хӑнты арӆўв эвӑӆт мўӊ йис вәӆупсэв оӆӑӊӑн уша вєрты вєритӆўв. Щи пийн рәт приуральской хӑнты ясӑӊӑн ар арийс.

Тӑм етнхот тәты нє Вик­тория Сязи мойӊ нєӊа м ясӑӊ лупӑс, ӆәӆн еӆ­ӆы ӆўӊӑтты арӆаӆ пиӆа киникайӆ ат єтӆ.

Путӑр хӑншӑс: 
Людмила Гурьева