Ёмвошн ван хӑтӆуп тыӆӑщн 24-мит хӑтӆӑн «Югра-Классик» хуща культура, искусства па литература тӑхетн нух питум ёха Югра кәща премия мойӆупсэтн мӑты щира мӑӊхӑтӆ вәс. 2024-мит оӆн тӑм тӑхетн Югра хуща вәӆты 112 хӑннєхә нух питсӑт. Щи премияйт ёша павӑтты щира 600 хӑннєхә нєпекӑт хӑншийӆсӑт.

Югра народной ху­дожественной про­мыслӑт хуща вухӑӊ мой­ӆупсы ёша павтӑс Мария Игишева, ӆўв Нуви сӑӊхум районӑн Касум вошн вәӆ, мойӆупсы ӆўвеӆа кан­тӑс Югра кәща ӆӑӊкӑр нє Елена Майер. 
Культура департамент кәща нє Маргарита Коз­лова «Ок­руг мир творчества хот» хуща рәпитты нєӊа Вера Кондратьевая ишӑк нє­пек мойӆӑс, ӆўв Югра культура хуща тарма па ма рәпитмаӆ пӑта.
Елена Майер мойӆупсы мӑты тӑхийн лупӑс: 

- 2024-мит оӆн Югра кә­ща эвӑӆт 112 хӑннєхә премия ёша павӑтсӑт, араӆ пєлӑк мойӆупсэт мўӊ сырышӑк мойӆӑсўв. Тӑм оӆн Югра кәща поступсы хӑншӑс, щит йиӆуп пре­мияйт мойӆӑты пӑта. Тӑм оӆ хур хӑншты хәев Ген­надий Райшев 90 оӆа вум оӆ, щи пӑта Геннадий Райшев нємуп мойӆупсы вєрса. Щи премия вет вєр пӑта мӑӆы. Культура хуща тӑм оӆ округ хуща мўӊ ар м вєрӑт вєрсўв, мўӊ мирев ар тӑхетн нух питсӑт, мойӆупсэт ёша павӑтсӑт, арсыр проектӑт хӑншсӑт. Йиӆпа йиты оӆн мўӊ арсыр вуӆаӊ хӑтӆӑт тӑйӆўв, Югра мўвев 95 оӆа йиӆ. 80 оӆа йиӆ, хән мўӊ Вуӆаӊ ӆаӆь хуща нух питсўв. Ма нумсємн, тӑм йиты оӆн мўӊ округев ар тӑхетн нух питты питӆ.

Путӑр хӑншӑс: 
Пётр Молданов