Мӑнум оӆн Мегион вош киникайт ӆўӊӑтты хотн мўвтєӆ финно-угорской мирӑт мӑӊхӑтӆӑт постӑты щира «Мўӊ ӆєрӆўв и х эвӑӆт» вәйтантупсы ӆэщӑтсы. Щи рәт мирӆўв 15 финно-угорской ясӑӊӑн путӑртӆӑт.

Вәйтантупсыя кол­ледж эвӑӆт айӆат ёх, ӑшколайн вәнӆтыйӆ­ты няврємӑт па «Югра ӆыӆ­ӊуптӑты» па «Россия мўв ӆуваттыйн арсыр мирӑт ассамблея» оса вєрӑт тәты тӑхеӊӑн эвӑӆт хәйт-нєӊӑт вохсыйт.

Мойӊа юхтум мира ки­никайӊ ванӆтупсы ванӆ­тӑсы па шуши мир йис вєрӑт тәса вәты ёх вєрум пурмӑсӆаӆ аӆьсыйт. Щӑӆта финно-угрӑт па шуши мирӆўв вәӆупсы оӆӑӊӑн кина ӆаращ хўват әмӑщ хўрӑӊ кина ванӆтӑсы. 
Щиты ӑктӑщум ёх хӑнты, вухаӆь, мари па мордва мирӑт йис вәӆупсы, ӆыв катра вєрӆаӆ па йис мӑӊ щирӑт оӆӑӊӑн айкеӆӑт тәсӑт.
Щи пийн мойӊ ёха шуши мир юнтутӑт оӆӑӊӑн путӑртсы па ванӆтӑсы, муй щирн «Ай акань нохӑр пиӆа» нємпи сувенирной пурмӑсые вєрты рӑхӆ. Ӑктӑщум хуятӑт имухты щит вєрты ӆӑӊхасӑт, еша­вәс щи хурамӑӊ пур­мӑсые щи тывӑс. Вәнӆтӑ­ты хӑрн рәпитум ёха ӆыв ёшӊӑӆаӆн вєрум утые юхи вўты єсӑӆсы. 

Щи пийн мойӊ мир мавӑӊ пӑсана вохсыйт. Лыптӑӊ шай яньщман, єпӆӑӊ воньщумутӑӊ нянь ӆєвман ӆыв мєт амтӑӊа па ӆәхсӑӊа йисӑт.
Щиты ӆәхсӑӊа, и вєрн па и нумӑсн мойӊа юх­тум мир мўвтєӆ финно-угорской мирӑт мӑӊхӑтӆ щи постӑсӑт. 

Анна Горлова, Мегион вош киникайт ӆўӊатты хотн рәпитты нє
Хӑнты ясӑӊа тулмащтӑс: Ирина Самсонова