Мӑнум оӆ «Хоттєӆ ёх оӆ» нємн пунсы, щирн мўӊ редакцияев «Югра ӆыӆӊуптӑты» оса тӑхев ёх пиӆа «И рәт – и рәпата» нємпи кӑсупсы ӆэщӑтсўв. Кӑсум ёха хӑнты, вухаӆь ясӑӊӊӑнӑн и рәпата тўвум рәтӆан оӆӑӊӑн путрӑт хӑншты па рўщ ясӑӊа тулмащтӑты мосӑс. 

Ван хӑтӆуп тыӆӑщ мўӊ кӑсупсэв сухнӑс. Мўӊ редакцияева 17 рәпата юхтӑс, щи кўтн 9 – хӑнты ясӑӊӑн, 8 – вухаӆь ясӑӊӑн. Щит Сўмӑтвош район Тэк, Шайтанка, Хулимсунт, Ӆэв, Саранпауль кәртӑт эвӑӆт, Нуви сӑӊхум район Касум кәрт эвӑӆт, Сәрханӆ район Русскинской кәрт эвӑӆт, Нуви сӑӊхум па Ёмвош эвӑӆт. Артаӆӑты ёх путрӑт ӆўӊӑтсӑт, вантсӑт па уша вєрсӑт нух питум ёх.

6-13 оӆӑт ӆуват няв­рємӑт:
- 1-мит тӑхи – Данил Бел­кин (11 оӆ), «Хӑрсурт рәт ёх – вєрӑӊ ёх», Нуви сӑӊхум район, Касум кәрт;
- 2-мит тӑхи – иха хӑн­шум рәпата: Анастасия Слепцова (9 оӆ), Татьяна Николаевна Волкова (ӑӊ­кеӆ), «Ай па вун хў­ӆыет, хоӆпева хояты!», Сўмӑтвош район, Тэк кәрт.

14-18 оӆӑт ӆуват няв­рємӑт:
- 1-мит тӑхи Татьяна Пос­пелова (15 оӆ), «Мўӊ рут хятэв», Сўмӑтвош район, Тэк кәрт;
- 2-мит тӑхи – Варвара Табун (19 оӆ), «Ма рутӆам рупитты вер», Ёмвош.

19 оӆ ӆуват па вәншӑк ёх:
- 1-мит тӑхи – Анжелика Орехова (55 оӆ), «Тэвли­нӑт хоттєӆ ёх – няврємӑт вәнӆтӑты хуятӑт»; «Тэв­линӑт хоттєӆ ёх – мир лекщитты ёх», Сәрханӆ район, Русскинской кәрт;
- 2-мит тӑхи – Юлия Ла­пеко (60 оӆ), «Алфёро­вӑт – няврємӑт вәнӆтӑты ёх», Сўмӑтвош район, Шайтанка кәрт;
- 3-мит тӑхи – Инга Новью­хова (41 оӆ), «Кини­кайт ӆўӊӑтты хотн рәпитты вєр мўӊ сӑмӆўвн», Ёмвош;

Нємасыя мойӆупсы:

– Иха хӑншум рәпата: Наталья Мешалкина (эви), (39 оӆ), Альбина Гришкина (ӑӊкеӆ), (67 лет), «Ма рәтєм хўӆ веӆпӑсӆӑты ёх», Ём­вош-Нуви сӑӊхум вош.

Нух питум няврємӑт па вән хуятӑт, мўӊ нынана рәпитум па ин рәпитты рәтӆан оӆӑӊӑн хӑншум па китум м путрӑт пӑта вән пәмащипа ясӊӑт лупӆўв. Шєӊк м, итәх хуятӑт оп­ращӑт вєрӑт еӆӆы тәӆӑт. Ӑӊкета-ащета, вәнӆтӑты ёха ищи вән пәмащипа путӑртӆўв – нын няврємӑта м путрӑт хӑншты нётсӑты. 
Кӑсупсэвн нух питум ёх, еӆӆы ищиты щи арсыр кӑсупэтн кӑсӆаты!

Ешавәӆ нух питум няв­рємӑт па вән хуятӑт ишӑкты нєпекӑт па ты­нӑӊ мойӆупсэт ёша хо­ӆумӆӑт. Щитӑт ӆәтты щира вухн нётсӑт «Югра ӆыӆӊуптӑты» шуши мир оса тӑхи ёх, ӆывеӆа вән пәмащипа ясӑӊ лупӆўв.

Путӑр хӑншӑс: 
Людмила Гурьева