Щи оӆӑӊӑн лупӑс Югра мўвев кәща хә Руслан Кухарук Послание ясӑӊ тәты пурайн, щит мӑнум оӆ ван хӑтӆуп тыӆӑщ 24-мит хӑтӆӑн ӆўв округ дума депутатӑт па мўӊ мўвевн вәӆты ёх пӑта путӑртӑс. 

Руслан Николаевич лупӑс, хутыса кәща ёх 2025-мит оӆн рәпитты питӆӑт, ӆәӆн округ мир вәӆупсы машӑка вєрты, ӆәӆн социально-экономической вєрӑт тўӊщирӑӊа ат мӑнсӑт. Мосӆ лупты, интӑм ӆўв мєт оӆӑӊ пўш округ мир пӑта Послание ясӑӊ тәс. Щӑта ӆўв путӑртӑс щи вєрӑт оӆӑӊӑн, мӑтайт ӆўӊ пурайн округ вошӑт па кәртӑт хўват ӊхман уша павтӑс. 
Тӑм хӑтӆӑн Руслан Кухарук 2025-мит оӆ йиӆуп нємн мӑс, Югра мўвевн щит «Год исторического наследия» питӆ. Вантэ, тӑм оӆн кӑт вуӆаӊ мӑӊхӑтӆ питӆ – Югра мўвев 95 оӆа йиӆ, Вуӆаӊ ӆаӆьн нух питум хӑтӆ вўш эвӑӆт 80 оӆа йиӆ.  

- Россия мўвев Президент поступсэт па округ мир ясӊӑт хә­ӆӑнтман ма 2025-мит оӆ щимӑщ нємн пунсєм. Щиты Югра мўвев па Отечества йис вєрӑт оӆӑӊӑн иса мир уша ат павӑтӆӑт, – лупӑс Руслан Кухарук.

Тӑм хӑтӆӑн ӆўв путрӑӆ пәмащипа ясӊӑт эвӑӆт оӆӊитсӑӆэ, хуты ӆўв Юг­ра мўвев кәщая павӑтсы, ӆәӆн щи­мӑщ ӆавӑрт пурайн тӑта вәӆты мир вәӆупсы мӑӆты па нух аӆумты. Ӆўв лупӑс:
 Ин щимӑщ пура юхтӑс, иса мирӑта иха катӆӑсман, кўтэвн нё­тӑсман еӆӆы вәӆты, еӆӆы рәпитты мосӆ. Иса хуятӑт, хуйтат шәк муй па нўшайт тӑйты мира нётты питӆӑт, ишӑкты питӆыйт. Ин ма лупӆум пирӑщ ёх, няврємӑт, айӆат ёх, мәшӑӊ муй па нўша тӑйты хуятӑт оӆӑӊӑн. Ӆывеӆа иса пурайн нётты мосӆ.

Руслан Николаевич лупӑс, 2025-мит оӆн округ вухӑт социальной вєрӑта ортӆыйт:

- Социальной вєрӑта тӑм оӆн 68% иса округ вухӑт эвӑӆт мӑӆўв. Югра мўвевн кашӑӊ хәӆмит хӑннєхә вухӑӊ нётупсыйн мӑӆы. Иса ай пушхиет интӑм хӑтӆ мӑр тӑйты хотӑта ӊхӆӑт. Вет оӆ вўш эвӑӆт 95% няврємӑт «дополнительное образование» щирн мосты вєрӑта вәнӆтыйӆӆӑт. Муй ӆывеӆа мосӆ, тӑта иса вәӆ. 30 щурӑс муӆтас айӆат хуят колледжӑтн вәнӆтыйӆӆӑт, 20 щурӑс муӆтас – университетӑтн. 

Тӑм мирхотн округ кәща лупӑс, хутыса округевн ар няврєм тӑйты ёх нётӆыйт:

- Йиӆуп оӆн щимӑщ семьяятн вәӆты няврємӑт рўтьщӑты ӊхтэӆн ӛш пӑта сухуптум вухӑт вәншӑка вєрӆыйт, сыры щит 7 щурӑс шойт вәс, интӑм – 20 щурӑс шойт вух кашӑӊ няврєм пӑта. 
Щӑӆта ӆўв лупӑс, хуты округевн катра хотӑтн вәӆты 38 щурӑс хӑннєхә тӑм оӆн йиӆуп хотӑта касӑӆӆӑт, щи вєр пӑта йиӆуп программа рәпитты питӆ. 

Ар ясӑӊ округ кәща хә шуши ми­рӑт оӆӑӊӑн лупӑс:

- Югра иса мўват хўваттыйн ма вәӆы, тӑта ӆухн хӑтӑтьӆяты, топщитты вєр әхтыйн, кина вєрты ёх кўтн па па арсыр вуӆаӊ кӑсупсэт па мирхотӑт вєрӑнтӆыйт. Тәп лупты ӆӑӊхаӆум, щи кўтн тыв юхтум мирӑта мєт әмӑщ шуши мирӑт вәӆупсы, йис вєрӑт оӆӑӊӑн уша павӑтты. Щирн шуши мирӑта иса мосты вєрӑтн нётты мосӆ, ӆәӆн ӆыв м тыӆӑщ вух ёша ат хоӆумсӑт. Ин лупӆум, вўӆы ӆавӑӆты ёх пӑта нюхи вўты тӑхет вєрӆўв, ӆәӆн ӆыв вєреӆ пӑта м вух ат хоӆумсӑт. Щӑӆта щи нюхи эвӑӆт арсыр мосты ӆєтутӑт ӆэщӑтты питӆўв, и «бренд» щирн щитӑт вєрты па еӆ тыныты питӆўв. Щиты вўӆы ӆавӑӆты ёха нётӑсты питӆўв.

Руслан Кухарук лупӑс, хуты шуши мирӑт па оса тӑхет ёх пиӆа ӆўв ар пўш вәйтантыӆӑс, щи пийн ӆўв нумса юхтӑс, ешавәӆ Югра мўвевн шуши мирӑт вєрӑт тўӊматман Уполномоченной хӑннєхә рәпитты питӆ, ӆәӆн шуши ёх шєӊк сора па мосты щирн нўшайт тўӊматты щир ат тӑйсӑт.
Округ кәща ясӊӑт пийн ма Ну­ви сӑӊхум район кәща хә Сергей Маненков пиӆа путӑртсум, ӆўв лупӑс:

- Округ кәща хә ясӊӑтн мӑнєма Нуви сӑӊхум па Сўмӑтвош районӊӑн оӆӑӊӑн әмӑщ хәӆӑнтты вәс. Мосӆ лупты, иса шуши хуятӑт эвӑӆт 10% мўӊ районэвн вәӆӆӑт. Әмӑщ, хуты ин шуши вєрӑт тўвман и хӑннєхә рәпитты питӆ, вўӆы ӆавӑӆты ёх ин ма нётты питӆыйт. Вән пәмащипа лупӆум, хуты Манстӑр районӑн Ас мухты нурум вєрӆы, вантэ, щи пийн Нуви сӑӊхум района оӆ мӑр кев ӛш питӆ, щит шєӊк м.

Россия мўвев сенатор хә Алек­сандр Новьюхов лупӑс, хуты округ кәща хә мєт ма па тәса вәятӆ, хутыса округевн вєрӑт мӑнӆӑт:

- Руслан Николаевич мєт ма путӑртӑс, муй вєрты мосӆ округ мир вәӆупсы ма вєрты щира. Округ мир щит шєӊк ӆавӑӆсӑт. «Креативная индустрия» вєр унтасн шуши мир вєрӑт машӑка йиӆӑт. Тӑмхӑтӆ мўӊ уша павӑтсўв, хуты округевн йиӆуп рәпитты тӑхет тывӆӑт. Ма щирємн, округ кәща хә ма лупӑс, хуты шуши мирӑт ин ма вантман па нётман тӑйты питӆыйт, – лупӑс А.В. Новьюхов.

Путӑр хӑншӑс: 
Надежда Рагимова