Ас нопӑтты тыӑщ 7-11-мит хӑтӑтн Москва хон вошевн «Сокровища Севера – 2013» нємпи VIII-мит тынєсты хӑр па арӑң-якӑң вантупсы мӑнӑс. Югра мўв губернатор ӑңкӑр хәя нётты ими Людмила Алферова щи вәйтантупсыйн артащты хуятӑт кўтн ищи рәпитӑс. ўв мўңева айке тәс, муйсӑр ёх тӑм пўш округев эвӑт щив яңхсӑт па муйсӑр пурмӑсӑт, єтутӑт, арӑт, якӑт мира аьсӑт. Сокровища Севера – 2013» нємпи вантупсыя Алтай, Калмыкия, Бурятия, Якутия, Тыва, Алтайской, Забайкальской, Камчатской, Хабаровской, Ямало-Ненецкой округ, Ёмвош округ, Тюменской, Иркутской, Амурской, Кемеровской, Великобритания, Киргизия, Боливия, Перу, Белоруссия па па мўват эвӑт арӑң-якӑң па вєрӑң хӑннєхуятӑт юхтыйсӑт. Югра мўв природной ресурсӑт, культура вєрӑт тәты департамент па «Югра ыңуптӑты» тӑхет кәщайт щив мир ӑкӑтсӑт па вантупсэт эщӑтсӑт. Людмила Алферова ясңӑт эвӑт уша йис, хуты округев эвӑт хәт община ёх щив яңхсӑт. Щит Ёмвош район эвӑт «Колмодай», «Росомаха», «Обь», Нижневартовской район эвӑт «Верхне-Вахская», Мастар район эвӑт «аңки» па Кондинской район эвӑт «Регион-К» нємпи общинайт вәсӑт. ыв щӑта мойң хуятата арсыр єтутӑт: сыр-сыр няр, - вўы, кўрӑң вой, пўпи вуй; нохӑр сєм; сыр-сыр вой сух - нюхӑс, аңки, кӑти вәнш, вәнтӑр, вухсар, вўы сухӑт; арсыр сорӑтум па панка щирн эщӑтум тулхӑт вантасӑт па тынысӑт. Ияха ўңӑтты ки, община ёх тынытум пурмасӑт па єтутӑт пата 150-400 щурӑс шойт арат вух ёша павӑтсӑт. Щи тухапи Ёмвош рехоп вантты. Хоп ыпийн сухта эвӑт йис щирн вєрум ан-сәнӑт аьман вәсӑт. Нягань вошн вәты народной мастер России па сухта вєр яма вәты ими Лариса Пастернак ӑктащум ёха вантӑс, хутыса йис щирн сухта эвӑт кев хурӑсӑт якты мос. Нижневартовской район Корлики па Аган кәртңӑн хущи вәты нєңңӑн Ж.А. Хохлянкина па Т.С. Уколова Вах юхан мир тунты эвӑт сыр-сыр пурмӑсӑт аьсӑңӑн. Ёмвош ремёслайт хотн рәпитты ики И.А. Кошкарёв йис щирн юх эвӑт вєрум ан-сәнӑт па сыр-сыр пурмӑса мойң ёха вантӑс. Урай вошн рәпитты ими Р.И. Козло-ва тыюм сэвӑң вейт ван-тупсыя тәс, щи вошн вә-ты нє Г.И. Клятенко сӑк эвӑт эщӑтум йис посӑт па кўр әмӑтсухӑт аяс. Ияха пунты ки, Югра мўв ремёслайт хотн рәпитты хуятӑт кӑтсот мутас сухта, сӑк, сух, тунты, карты, юх, пун эвӑт вєрум пурмӑсӑт ӑктащум мира вантӑсӑт. Тынєсты хӑр етшум пурайн округев эвӑт юхтум хуятӑт ишӑк нєпекӑтн па мойупсэтн катуптӑсыйт. ыв кўтэн Нижневартовской район Аган кәртӑн вәты ими Т.С. Уколова юх ухты пурмаса пӑты оӑңмит степень диплом па кубок вўс. Урай вошн рәпитты ими Г.М. Клятенко увӑс мир ёнтум әмӑтсуха пӑты кимит степень диплом па кубок ёша павтӑс. Р.И. Козлова ищи вєр пӑты лауреат нєм хоумтӑс. Ёмвошн вәты ими Э.П. Митрофановна шуши мир культура вєрӑт ыңуптӑты пӑты ишӑк нєпекн па мойупсыйн мӑсы. Нягань вош эвӑт сухта пиа рәпитты нє Л.П. Пастернак диплом па кубок ёша вўс.