- Хантыйский
- Русский
Вўтвошн йис вєрӑт еӆӆы тәӆыйт
Катра вәӆум йис вєрӆўв иса щи айӆтыева хӑщты питсӑт. Ин тӑм вәӆты йиӆуп вәӆупсэвн, муй па мосӆ, муйсӑр пурмӑс, иса ӆапкайтн вәӆ. Щит я-а щиты, па сыры вәӆум вәӆупсэв иса нәмман щи тӑйтыя мосӆ. Щи йис вєрӑт, йис вәӆупсы ай вошӑт хуща хуӆна яма нәмӆайт. Тӑм оӆ вотас тыӆӑщ хуӆамн Вўтвош кәртыев хуща семинар оӆӊитса, юрн хоп вєртыя. Вош кәщая рәпитты нєӊиев Прасковья Константиновна Гарипова Ёмвош округ правительства грант вух ӛша павтӑс, па щи ӛрн хоп вєрсӑт.
Ин Вўтвош хуща вән хӑнтыӆаӆ иса ӑнтәма щи йисӑт. Еӆ памтўпсы, юв памтўпсы иньщӑсты ушӑӊ хуят ӆєваса ӑн па вәйтӆа. Ин тәп вәна пєлӑка ювум хәйӊӑн, щит Геннадий Павлович Сенгепов па Николай Дмитриевич Сопочин, ӆын тәп вәӆӑн ин тӑм хӑтӆа, хутыса тәса, яма юрн хоп вєрты мосӆ.
Вўтвоша яӊхум тӑхємн ма еша Николай Дмитриевич Сопочин, Геннадий Павлович Сенгепов па кәща нє Прасковья Константиновна пиӆа путӑртсум. Ӆыв ар ям ясӑӊ лупсӑт, щитӑт еша тыв хӑншсӑӆам.
– Николай Дмитриевич, еша путӑртэ, нӑӊ хуйтэт эвӑӆт вәнӆсӑн юрн хоп вєртыя?
– Ма тӑм юрн хоп вєрты вєр Мӑӆӑӊ Кәщта (Константин Тихонович Молданов) эвӑӆт вантсум. Ӆўв катра Вўтвошэв хуща вәс. Тӑм ики хўвн ӑнтәма йис. Имуӆты артӑн 2001-мит оӆн ма ӆўв пиӆӑӆа кәртӑӆа товийн вәнта мӑнсум вар вєрты нётты. Па щи тови сора ӆуӆас, па юханӆӑн пєлка питсӑт. Мӑнты ӛшємн Щўнь юхан мухты щив юхӑтсумн, юханємн пєлка питмаӆ. Щӑӆта ин хәем лупийӆ: «Ин тӑӆта мин сӑр юрн хоп вєрӆумн». Ма па лупӆум: «Па муй вўрн, мӑтта хӑтӆ щит етшӑтаӆ». Ин хәем, хўв нәмӑсты хән сӑр питӑс. Лупийӆ: «Мӑнӆумн, ям, тәс хоп вєрты юх кӑншӆумн. Ма нӑӊӑты сӑр вәнӆтӑӆєм, муй вўрн мосӆ оӆӑӊӑн нохӑр юх пириты: тўӊ ат вәс, апӑӆӆаӆ муй арат мосӆ, нохӑр юхен, нўвӆаӆ па ӆєпсӑӆ хўв ат вәӆӆӑт, щимӑщ юх мосӆ. Щимӑщ нохӑр юх йиӊкупсы питрӑтн, ӆос лотӑт кимӑӆн кӑнша».
Щиты щи вәйтсумн ям тўӊ нохӑр юх. Иӆӆы павӑтсємн, нўвӆаӆ-муйӆаӆ вәлӑксємн, воӊхсємн. Ӛхӑт па ванӆтӑсӆэ, муй вўрн мосӆ катӑӆты кєрӑн, муй вўрн щитн рәпитты. Мӑнєма щирн ӑн тывӆ, ӆўв щит муй арат вєрӆ, иса тәӆта щи мӑнӆ. Вантэ, сӑмӑӊ вєр, щи вәнӆтӑсыюм. Щиты щи щӑӆта, хәӆмит хӑтӆ па ӆыпеӆ нух щи пўншсємн. Щиты хоп вєрсумн, па щитӆ мӑнєма мӑсӆэ, яӊ оӆ муӆтас щи тӑйсєм. Вєра яма памтум вєрӆ, щит, лупийӆ, хопэн нюӆӑӆ яма, тәса ат тывӆ, щит мєт мосты вєр. Юврая ки мӑнӆ нюӆӑӆ, яӊхты ӆавӑрт питӆ, кєрӆыйӆты атум. Щӑӆта па щи тәса вєрты мосӆ, муй вўрн ӆўӊкӆаӆ мосӆӑт тәса щив павӑтты. Ӆўӊкӆаӆ щєранька хот кєма ӆавӑӆтыя мосӆ, щирн веӆщи хопэн яма пўншаньщӑӆ. Ин ма щи артӑн хутыса вәнӆтӑсыюм па тӑм айӆат ёхӆам щиты щи вәнӆтӑты питӆӑӆам. Мӑнєма вєра ям, Прасковья Константиновна мӑнты айӆат ёх вәнӆтӑты вохсӑӆэ.
Геннадий Павлович путӑртты щирн, юрн хоп муй вўрн вєрты мосӆ, ӆўв ащеӆ эвӑӆт вантыӆӑс. Ай вўш эвӑӆт иса ащеӆ пиӆа, ёш пиӆа вәс. Муй па ащеӆ вєрӑс, пухӆ иса вәнӆтӑсӆэ щит вєртыя. Муй арат иса хошӆ вєрты: әхӑӆ, вўӆєӊ кєӆ, пән сэвты, хӑнты, юрн хоп па па утӑт.
Хопӆ вєрты оӆӊитсэӆ катра ӑшкола хотэӆ хуща, камн, вантэ, ищки хуӆна, тӑӆ тәрум. Имухты оӆӊитсӑт кӑт хоп вєрты.
Нємасыя вєрум хопеӆ Николай Сопочин па Геннадий Сенгепов ясӑӊ щирн иса памӑтман вєрсэӆ. Ӆын ванӆтуман, памӑтман, муй щирн мосӆ вєртыя. Па кимӑт хопеӆ ӑӆ вәнӆтыйӆты щира оӆӊитсэӆ. Щит Вячеслав Сенгепов, Радион Гарипов па Александр Чепитов хәйӊӑн пєӆа вантман кимӑт хоп вєрсӑт. Вошӑӊ мир кашӑӊ хӑтӆ хоп вєрты тӑхи пєӆа вантты щи яӊхсӑт. Хопэӆ ӑӆ тәп хўвшӑк вєрсэӆ, ӑн тєрмаӆуман, айӆтыева. Геннадий Павлович тӑйӆ юкан вўӆэт, ӆўвэӆа мосӆ ванкўтӆы кәртӑӆа яӊхийӆты вўӆыӆаӆ ванттыя, па Николай Дмитриевич пӑнӑн иса тӑйӆӑӆэ, нётӑсты пиӆа. Щи пӑта хопӊӑӆ тыӆӑщ мӑр щи вєрсэӆ.
Ин Геннадий Павлович, Николай Дмитриевич па Прасковья Константиновна лупты щирэӆн, ӆўӊа йиӆ, айӆат мир юрн хопн яӊхты питӆӑт. Щит мєт ям вєр, мосӑӊ, па мӑтта Вўтвош хуят эвӑӆт мир кӑсты тӑхета яӊхты питӆӑт.
Вош кәща нєӊиеӆ Прасковья Константиновна ар ям вєр щи вєрӆ. Муй арат йис вєр әхтыйн ӆўв вән хуятӑт пиӆа вәтьща путрємуман щи вәнӆтӑӆӆаӆ ай нартуп ёхӆаӆ. Ӆўв яма, тәса лупӆ: «Мосӆ и вош ӆыпийн мира вәтьща таӆӑсман вәӆтыя, щирн веӆщи вәӆупсэв кєна мӑнты питӆ». Муй арат вән емӑӊхӑтӆӑтн кўлуп хотэӆа яха ӑктӑщийӆӆӑт, яха шай яньщӆӑт, арсыр путӑр путӑртӆӑт, ариӆӑт, якӆӑт. Па товийн, Касум юханыеӆ пєлка питтыйн, иса кашӑӊ оӆ щи яӊхӆӑт, Яньщут Акэӆ икия порєсӆӑт.
Вўтвош хуща вәна ювум имие Галина Даниловна Молданова вәӆ. Ӆўв ищи ай нартуп мира ям йис путрӑт путӑртӑӆ. Тӑм еӆӆы пєӆа вәӆтыйн, ай вошн вәӆты мириев яма, вәтьща нётӑсман ат вәӆӆӑт. Йис ёхӆўв вєрӑнтум ар пурмӑс аӆ юрємӑӆэӆ, иса нәмман ат тӑйӆэӆ, ат вєрӆӑт, ёнтты ут ки вәс, ат ёнтӑсты вәнӑӆӆӑт. Муй арат ар вєр иса ат хошӆӑт, ат нәмӆэӆ йис рәтэв вєрӑнтум ар ям пурмӑс, мўӊ па щит вєрты ат хошсэв.
Семинар по изготовлению лодки-обласа
В Белоярском районе в деревне Юильске при поддержке окружного департамента культуры прошёл семинар по изготовлению лодки-обласа.
В мероприятии приняли участие самобытные мастера Геннадий Павлович Сенгепов, Николай Дмитриевич Сопочин. Они владеют технологией изготовления лодки-обласа. Мне удалось пообщаться с мастерами и организатором семинара.
– Николай Дмитриевич, расскажите от кого вы научились изготовливать обласа?
– В Юильске жил Константин Тихонович Молданов, который славился мастерством всё умел делать своими руками. Я видел, как он делал облас. Однажды в 2001 году я поехал к нему на стойбище. В тот год весна была очень ранней, и реки рано открылись. Мы дошли до реки Щунь юган, а река открыта и что делать? Константин Тихонович сказал: «Сейчас мы с тобой сделаем облас, для этого найдём подходящее дерево. Лодку-облас всегда делают из кедра. Ствол дерева должен быть прямым, шириной в два обхвата, ветви и иголки длинными без повреждений. Кедр, подходящий для изготовления лодки-обласа, обычно растёт рядом с водоёмами». Так мы с Константином Тихоновичем нашли нужное нам дерево. Срубили кедр, аккуратно очистили ствол от веток, сняли кору. Затем он показал, как работать с теслом. У меня сразу не получалось, но под его чутким руководством на третий день наша лодка-облас была готова. Эту лодку он мне подарил, я её больше десяти лет держал. В изготовлении лодки-обласа один из важных моментов – это правильно сделать нос лодки. Если нос обласа неправильно получится, то такую лодку будет крутить на воде. На этом семинаре я показал молодёжи, как нужно мастерить лодку-облас.
Геннадий Павлович Сенгепов – самобытный мастер, навыки изготовления хантыйского обласа перенял у отца. В детстве не раз наблюдал, как его отец делал лодки. Геннадий Павлович проживает на родовом стойбище, ежедневно мастерит нарты, мордушки для ловли рыбы, лодки-обласа и другие предметы, необходимые в быту.
На семинаре мастера Геннадий Павлович Сенгепов и Николай Дмитриевич Сопочин сначала показали молодёжи, как сделать облас. Затем Вячеслав Сенгепов, Родион Гарипов и Александр Чепитов под руководством знатоков своего дела сами смастерили лодку-облас. Изготовлением лодки ребята занимались месяц. Теперь молодые юльчане сами умеют делать лодку-облас. В летнее время опробуют облас на воде.
Староста деревни Юильск Прасковья Гарипова отметила:
– Сегодня уходят те люди, которые хорошо умеют изготавливать предметы традиционного промысла. Поэтому важно успеть передать их знания молодому поколению. Таким образом мы сохраняем уникальные технологии изготовления обласа из цельного дерева. На семинаре приняли участие активная молодёжь. Это радует.
Евдокия Каксина, п. Казым
Перевод на русский язык Ульяна Данило
