- Хантыйский
- Русский
Дума мирхот вәс
Ас нопӑтты тыӑщ юхи хӑщум хӑтӑтн Ёмвошн округ дума депутатӑт мирхота ӑктӑщийсӑт. Щӑта ыв 20 мутас вєр нух вантсӑт.
В. Дюдина путӑртӑс, муй щирн 2013-мит он па 2014-мит о оӑң квартал мӑр округ бюджет тӑруптӑсы.
2013-мит оа бюджет 152,2 миллиард шойт вух аратн вўйясы. О сухантты пурайн доходӑт вух 136 миллиард шойт арат, расходӑт – 172 миллиард шойта питсӑт. Дефицит вух 36 миллиард шойта хойс. Мєт ар вух социальной вєрӑта мӑнӑс.
2014-мит о оӑң кварталн бюджет 18,2 процента тӑруптӑсы. Тӑта ищи аршӑк вух социальной вєрӑт пӑта мӑсы.
Щи тумпи депутатӑт Жилищной па Бюджетной кодексңӑн йипӑтты пӑта, Государственной думая кӑт законодательной инициатива китты ӑңхаӑт.
Еы ыв поступсэт йипӑтты пӑта шәкащты пушхӑт нётты оӑңӑн, рәпата вєр нух вантты, транспортной налог, вошӑтн хотӑт омӑсты оӑңӑн вєрӑт нух вантсӑт па вўсӑт.
Щи хӑтӑн депутатӑт «правительственной щос» вєрӑнтсӑт. Мирхота ыв губернатор ӑңкӑр ёх па арсыр департаментӑт кәщайт вохӑнтсӑт. Мирхот округ дума ӑңкӑр хә А. Сальников тәс.
Хотӑт омӑсты департамент кәща Н. Дроняев пәьница хотӑт омӑсты оӑңӑн ай тәс. ўв лупӑс, хуты округевн тӑм ванӑн 18 арат лекщитты тӑхи вєры. Щит Нижневартовск вошн вән пәьница, Сәрханян па Ёмвошн няврємӑт тӑйты па лекщитты хотӑт па па утӑт.
Природной ресурсӑт департамент кәща хә Е. Платонов вой-хў єнмӑты па вәнтӑн ӑкӑтты єтутӑт еы эщӑтты оӑңӑн путӑртӑс. ўв лупӑс, хуты 2013-мит он округевн вой тӑйты ёх аршӑк нюхи па єсум йинк эщӑтсӑт. Тӑмхӑт Югра мўвн 611 фермерской тӑхи вә, 38 арат 2013-мит он тывсӑт. Хў вепӑсӑты па еы эщӑтты пӑта 154 тӑхи пўншсы. Щитӑт эвӑт 131 тӑхи – хў вепӑсӑӑт, 23 тӑхи – хўӑң єтутӑт вєрӑт. Щи тумпи Е. Платонов вәнт юхӑт эщӑтты вєр оӑңӑн па путӑртӑс. 2014-мит он щи вєра миллиард мутас шойт вух єсӑы па 300 мутас рәпата тӑхи тыв.
Дорожной хозяйства па транспорт департамент кәща К. Масраков ай тәс, муй щирн округевн мир машинайн, тўтӑң хопн, карты ӛш хўват муй тухӑң хопн яңхты вєр мӑн. Хӑннєхә пӑта муй арат тына щит хой.
Щи нух вантум вєрӑт оӑңӑн депутатӑт мосты нєпек хӑншӑт па еы щит округ правительствая па департаментӑта рәпата тўңщирӑңа эщӑтты пӑта китӑт.
Надежда Вах
Состоялось 34 заседание Думы Ханты-Мансийского автономного округа – Югры
|
Депутаты рассмотрели более 20 вопросов, в том числе, отчёты об исполнении бюджета Югры за 2013 год и за первый квартал 2014 года. В повестке дня наиболее значимых вопросов – две законодательные инициативы в Государственную Думу Российской Федерации о внесении изменений в Жилищный и Бюджетный кодексы. Также обсуждались изменения в законы о дополнительных гарантиях и мерах социальной поддержки детей-сирот, о градостроительной деятельности, о транспортном налоге, о регулировании жилищных отношений. В этот же день прошёл «правительственный час», на котором участники обсудили строительство объектов здравоохранения, эффективность развития транспортной отрасли, лесной и аграрной промышленности Югры. Надежда ВАХ |
Рубрика:
Номер Ханты Ясанг:
№ 11 (3407) 4.06.2014
