Ар оӆ мӑр Советской вошн вухаӆь апрӑӊ нєӊие Оксана Се­ребрякова вәӆ па рәпитӆ. 2012-мит оӆ вўш эвӑӆт ӆўв «Югра ӆыӆ­ӊуптӑты» тӑхийн оса рәпата тәты питӑс. Нумсӑӊ нєӊие имухты шиваӆӑсы па тӑм оса тӑхи Советской район ӆуваттыйн секретаря пирисы. Щӑӆта 2016-мит оӆн ван хӑтӆуп тыӆӑщн вән мирхотн вухаӆь хӑннєхә кәщая павӑтсы. 

 Ар няврємӑӊ хоттєӆ ёхн єн­мум хӑннєхә нўша вєрӑт ма вәӆӆэ. Щит пӑты ипўша мира нётты ӆӑӊхаӆ. Советской вошн па ва­нӑн омӑсты кәртӑтн, щит Таёж­ной, Малиновской, Пионерской, Алябьевской 400-кєм шуши хот­тєӆ вәӆ. Каркам нєӊие ӆыв ма вәӆэӆ, муйсӑр иньщӑсупсы тывӆ, имухты Оксана Дмитриевная карты кеӆ хўват кувлємӑӆӑт. Мир пєӆа сӑмӑӊ хӑннєхә кўш ясӑӊӑн, кўш вєрн шуши хуятӆўва нётӆ. Ванкўтӆы кәщайт пиӆа вәйтан­тыйӆ, ӆәӆн вошӑӊ увӑс мир ӆавӑрт суртӑт тәса нух вантты па уша павӑтты хутыса щитӑт тўӊматты.

Оса рәпата тәты имие ясӊӑт щирн мєт ар нўшайт социальной па вәӆты-хоӆты хотӑт оӆӑӊӑн. Щӑӆта юридической щирӑт, айӆат ёх вәнӆтӑты вєрӑт ищи тўӊмат­ты мосӆ. Ар пєлӑк шуши мирӆўв нюмшайт, Оксана Дмитриевна ӆыв пиӆаӆа кәщайт хуща ӊхӑӆ, путӑртӑӆ, ӆәӆн иха сорашӑк ты­вум нўшӑйт оӆӑӊӑн путӑртты.

Щи тумпийн Оксана Сереб­рякова Советской вош, район па округ ӆуваттыйн кәща хотн ӆэщӑтум Общественной тӑхия ӆуӊман вәӆ. Щӑӆта «Берегиня» нємуп шәкащты няврємӑт тӑйты хот хуща пушхӑт вантман рәпитӆ. Муй щирн тёпиет пӑтап вєрӑт эвӑт авӑыйт, муйсӑр вєрӑт эщӑтыйт, ән няврємӑт ма па вантман ат тӑйсыйт, хутыса шәкӑң пушхиет пиа социальной, мӑты па па тӑхетн рәпатнекӑт нётӆӑт, муй щирн ӑңки-ащи кана хоттє ёх шәкӑң няврє­мӑт єнмӑӑт.
И нўшаяӊ хоттєӆ ёх вәупсы оса рәпата тәты нє мєт авӑ­ман тӑйӆ. Тӑм ёхӆаӆ нюр рәт­ная йисӑт. Сыр-сыр ӆавӑрт суртӑт тўӊматты вєр тумпийн ӆыв хущеӆа мойӊа ӊхӑӆ. Иха сєма питум хӑтӆӑт постӑӆӑт па мӑӊхӑтӆӑта ӑктӑщӆӑт.

Ма Оксана Дмитриевна инь­щӑссум: «Тӑм нўшайӊ хоттєӆ ёх нӑӊ нємасыя пирисӑн?». Ӆўв юхӆы лупӑс: «Тӑм хоттєӆ ёх нўша ма сӑмєма вєра хойс. Муйкєм вєрит­ӆум, щитн нётӆум. Ма, вантэ, ищиты айӆат пурам шєӊк ӆавӑрт вәс. 8 класс тәп ет­шуптӑсєм, ӑӊкєм кӑшаӊа йис, Тюмень вош пәӆьницая тәсы. Ма пємн па 12 па 7 оӆ ӆу­ват апщеӊӑн вәсӊӑн. Ӆынан єн­мӑӆты мосӑс. Щӑӆта яртьяӊ класс вечерней щирн етшуптӑсєм па ӆапкая хотхӑр люхитты нєӊа рәпитты мӑнсум. Тәп ӛхӑтшӑк Тюмень вошн арсыр ӆәмӑтсух ёнтӑсты хуята вәнӆтыйӆсум. Щит пӑты ма вәӆєм, ӆавӑрт шәкӑӊ пу­райн сӑмӑӊ хӑннєхә ванӑн ӑн­тәм ки, щит пӑӆтап вєр. Вантэ, итәх пурайн ӑӆ ясӑӊ ӛр па еӆӆы вәӆ­ты щир мӑӆ. Щиты пириюм нў­шаяӊ хоттєӆ ёх — щит ма тә­пӑӊ ёхӆам!»

Оксана Серебрякова пиӆа вә­таӊа вмєм пурайн имухты нумӑсн юхӑтсаюм, аӆмәнты тӑм хӑннєхә ма ар оӆ мӑр ма вә­ӆєм. Щи пура вўш эвӑӆт ӆәх­сӑ­ӊа вәӆӆумн.

Оксана Дмитриевна Кондин­ской мўвн ар няврємӑӊ хоттєӆ ёх хуща сєма питӑс. Ӑӊкеӆ — Ка­рым мўв Кутмаровӑт ёх эвӑӆт, ӆєтут кавӑртты нєӊа вәс. Ащеӆ – Левдино кәртӑӊ хә, ӆапкайн ты­нєсты хуята рәпитӑс. Тӑм кӑтӊӑн 9 няврєм єнмӑӆсӑӊӑн. 
Айтєӆн Оксана киникайт ӆў­ӊӑтты вєр сӑмӑӊа тӑйӆ. Щи пу­райн радива хўват вухаӆь мир моньщӑт хәӆӑнтӑс, ипўша щитӑт ӆавӑӆман карты щўӊк пўӊӑӆн омсӑс. Нумсӑӊ эвия єнмӑс. Ка­шӑӊ няврємие иты культура хотн муй па ӑшколайн якты-ариты вєра, ёнтӑсты па тыйты щира вәнӆтыйӆты ӊхӑс.
Щи тумпи айӆат пурайн апщи­ӆаӆ єнмӑӆты хӑщӑс. 9 класс вўш эвӑӆт рәпитты мӑнӑс, апщиӆаӆ ӆєтутн ӆапӑтты, ӆәмӑтсухн ӆә­мӑтты мосӑс.
Вәӆупсэӆ мӑр Оксана Сереб­рякова няӆ эви єнмӑӆтӑс. Кӑт эвиеӊӑӆ ищипа хоттєӆ ёхӑӊа йисӊӑн. Юлия Советской вошн пушхӑт єнмӑӆтман вәӆ. Надежда Ёмвошн вәӆ па Сбербанк нємуп вух мӑты тӑхийн рәпитӆ. Лена Советс­кой вош ӑшколайн нивӑӆ клас­са мӑнӆ. Мєт ай Лера пушхие тәп-тәп ӑшкола вўша йис. Ар няврємӑӊ Оксана Дмитриевна уяӊ хӑннєхә, ӆўв няӆ хиӆы тӑйӆ. Ванттєнӑн нюр хурасӑӊ айӆат вухаӆь нєӊие!

Ёнтӑсты вєр тумпйн Оксана пиркащека вәнӆтыӆӑс, ӆапкайн ӆєтутӑт па сыр-сыр пур­мӑсӑт тынєсты хуята рәпитӑс. Еӆӆы Оксана Серебрякова ӆўв саттэӆа вєр ӆэщӑтты ӆӑӊхаӆ. Па муй ӑн­тә? Округевн ванкўтӆы щи вє­ра вәнӆтӑты хӑрӑт ӆэщӑтӆыйт. Щикєм м, шуши ёхӆўв эвӑӆт и ӆўв саттэ­ӆа вєр тӑйты хуята ар­шӑ­ка йиӆ.
Ёнтӑсты вєр така вәты нє хот шовӑр сух эвӑӆт сӑхӑт, ван сӑхӑт, милӑт па иса хошум ӆәмӑтсухӑт ӆэщӑтты нәмӑсӆ. Мосӆ ястӑты, увӑс мўвевн сєма питум хӑннєхә айтєӆн мўвев-йиӊкев шавиман тӑйты питӆ, Оксана Серебряко­ва ищиты. Воньщумутӑт, тулхӑт ӑкӑтты па няшты вєр сӑмӑӊа тӑйӆ. Няш тӑм хӑтӆ вәнты вухаӆь нє­ӊие имухты ӆэщӑтты вєритӑӆ. Конда мўв вухаӆь имия м вўща ясӊӑт ӆупӆўв!