Кимит хӑтӑн йипа мойң ёх тўтӑң хопн юхӑтсӑт, ыв ищи намн кәртӑң мирн авӑсыйт па вўща ясңӑтн лупсыйт. Щи хӑтӑн каш вєрты хот пўңӑн «Тугиянские узоры» нємуп тынєсты хӑр па вантупсы пўншсы, щӑта кәртӑң нєңӑт вєрум пурмӑсӑт вантӑсыйт па е тынысыйт. Римма Слепенкова Елена Себурова ортнєңӑ пиа хурӑң диск вєрӑс, щи утн кәртӑң мир хурӑт па Тўкъякӑңӑн омӑсты хотӑт вәӑт. Ар хуят щит әтсӑт, ән рәт мўве па кәртӑң мире щит унтасн юн компьютер хущи вантты. 

Хӑт кўтўпн аен-вәнэн хуыева кўлуп пўңӑн якты-ариты хӑра ӑктӑщсӑт. Нуви сӑңхум кәща хотн рәпитты хә Степан Молданов мира лупӑс: «Вўща вәаты, хә ёх, имет, пухӑт па эвет! Тӑм хӑт тӑта вән емӑңхӑт пориы. Мўң мўвев кәща Сергей Маненков щит вўраңӑн нынӑна вән вўща ясӑң кит. ўв лупӑс: «Нын яма, хўӑңа вәаты па вой тӑйяты!  Ма ӑңхаум лупты - тӑаң кўр па тӑаң ёш нынана! Уяңа-йисӑңа вәаты, аршӑк хў па вәнт вой веаты! ән нынана кәртӑнӑн мєт ямшӑк вәты ат вәс, районной кәща хот эвӑт кўлупа ноутбук мойӑўв». Щи юпийн Степан Николаевич йисӑң-нәптӑң хӑннєхәйңӑна, щит Матвей Романович Гришкин па Пелагея Алексеевна Гришкина, ишӑкты нєпек, мойупсы па хурамӑң лыптӑт мойӑс. Ищимӑщ мойупсы Тўкъякӑң кәщая Георгий Матвеевич Гришкина катуптӑс.  Понавӑт кәрт ух нє Лариса Макеева ищи вўща ясӑң Тўкъякӑң мира лупӑс па Юрий Лельхов, Альбина Лельхова, Августа Себурова, Анна Себурова па Валентина Тользина нє-хәя каркама рәпиттэ пӑты ишӑкты нєпекӑт мӑс. Щӑта кўлуп хота арӑт ариты щўңк мойӑс. Тӑм вєрӑт юпийн сӑран хоп кӑсупсыйн нух питум хуятӑт па оща хурамтум нєңӑт мойупсы вухн мӑсыйт. 

Ӛхӑт кәртӑң мира вўща ясӑң лупсӑт па вошӑтн, кәртӑтн вәты нєңӑт. Щит Ольга Филиппова, Людмила Тюленева, Таисья Себурова, Людмила Зубакина, Людмила Хомляк па Римма Слепенкова. Агриппина Коротаева Сўмӑтвош эвӑт вўща ясӑң Нина Федоровна Головина па Лидия Григорьевна Лельхова эвӑт тәс. ын Сўри кәртӑн сєма питсаңӑн, кәртӑң емӑңхӑта шєңк юхтыйты ӑңхасңӑн, тәп вәна пєлка йисңӑн па интум кӑши-мәш пӑты хўв тӑхия яңхты ӛр ӑн тӑйаңӑн. Етнӑн каш вєрты хотн якты хӑр вәс, вәншӑк хуятӑт па айат ёх мурта яксӑт. Мосл лупты, кәртӑң емӑңхӑт шєңк яма мӑнӑс, Тўкъякӑңӑн вәты мир па есаты юхтыум ёх вән пәмащипа лупсӑт кәщайта па щи ёха, хуйтат щит эщатсӑт.

Реональда Ользина