- Хантыйский
- Русский
Щўняң хӑннєхәйт Увӑс мўвн вәӑт
Тӑмиты нәмӑс Владимир Четкович, щит серб, Сремчица вошн Сербия мўвн вә. ўв емӑң сохӑт, пєрна посӑт вєрты хәя рәпит. Тӑм пўш щи хә Сәрхан воша VIII-мит Мўвтє вєртут вєрты ёх фестиваля юхтыӑс, хута ўв пиаа вәйтантыйсум.
Мєт оӑңӑн Владимир мўң мўвевн 2012-мит он вәс, щи пурайн Ёмвош «Природы и человека» музейн ўв пурмӑса «Иконы-миниатюры Владимира
Четковича» нємуп вантупсыйн
мира аьсыйт. Лыпӑт тыӑщн щита эвӑт «Катра Сәрхан» кәртӑн омӑсты Тәрум хотн вантупсы вєрӑнтсы.
Владимир Четкович Белград вошн искусствайт институт етшуптӑс па художник-график рәпӑтнека йис. ўв вєрум емӑң сохат па пєрнайт Сербия, Черногория, Словакия, Кипр, Греция, Италия, Англия па Россия Тәрум хотӑтн вәӑт, щӑта арсыр хӑннєхәйт щитӑт юн тӑйӑт. Хурамӑңа щитӑт вєрта пӑты Сербияйн па па мўватн ар пўш ишӑкты мойупсэтн мийясы. Әмӑщ вәс ўв оңӑн уша вєрты па иньщӑсты, муй мўң мўвев оӑңӑн нәмӑс.
– Мєт оӑңӑн тыв мӑнтєм вәнты иса Увӑс мўв оӑңӑн нємӑт ӑн вәсум, муйсӑр мирӑт тӑта вәӑт, ищки муй ӑнтә? Щи пура вәнты Ф. Достоевский па А. Солженицин киникайт ўңӑтсум па ГУЛАГ, Сталин оӑңӑн вәсум. Щӑта муй
щирн сыры вәум мўв уватн мирӑт шәкӑтсыйт, хута щи йисн вән «касна» хот вәс. Ёмвоша юхӑтмємн шиваӑсум, нєш щит европейской хурасуп воша вә. Тухӑң хопн Ёмвош мухты ки мӑнсум, ән иса ӑн вәсєм, Европа муй Финляндия хущи щи вош омӑс. Ӛхӑт «Природы и человека» музейн пурмӑсӑт вантмєм юпийн уша вєрсум, муйсӑр мўва юхӑтсум па хуйтӑт тӑта вәӑт.
Мєт сыры Ёмвошн ван хӑтуп тыӑщн вәсум, щи пурайн камн 40-кєм градус ищки вәс па вєра ищкийн потсыюм. Нємхәнты щимӑщ ищки ӑн вантсум. Вантэ, Сербиямўвн тӑн тәп 15-20-кєм градус ищки вәя.
Тӑм мўва йиты вәнты хӑнтэт иса ӑн вантсум, Русскинская кәрта юхӑтмємн уша вєрсум, щит ям ёх, ыв хӑннєхәйт пєы сӑмӑңӑт па няхмўӑңӑт. Сербияйн па мўң питрэвн вәты мўвӑтн щимӑщ мир ӑнтәм. Мухат Русскинская хущи шиваӑсум, хӑнтэт мурта амӑтсӑт, хән мойң ёх ыв хущеа юхӑтсӑт. ыв нємасыя мўңева арисӑт па яксӑт. Лўк-Яун вўт кәртӑн хурамӑң вўы оңӑтн мойӑсыюм, ыпєма щи ям вәс. Ма щирємн, хӑнтэт аен па вәнэн – щўняң ёх, ыв кашӑң хӑт щўняңӑт, кўш тащӑңа ӑн вәӑт.
Вўт кәртӑн питы йиңкуп юхан шиваӑсум, вәтєм нәпӑт нємхута щимӑщ юхан ӑн вантсум. Вәнтӑн сыры ищи ӑн вәясум, Сербияйн вўр хущи иса пасыр юхӑт єнумӑт. Тӑта хурамӑң мўв, мўң мўвев киньщи иса па хурасуп. Щӑта ар хур вєрсум па әхӑсама Интернет хўват вантӑсам. ыв ищи әмщӑӑсӑт па лупсӑт, хуты щит хурасӑң мўв. Щӑта вәнт кәртӑн хў хошум йиңкӑн па воньщўмутн апӑтсыюв, ма
мўвємн тӑмӑщ єтут ӑнтәм
па ищи әмӑщ вәс щит єты.
Реональда Ользина
Хурн: Владимир Четкович Сәрхан вош Тәрум хотн
На Севере живут счастливые люди
К этому выводу пришёл гость из Сербии, мастер по изготовлению икон, крестов Владимир Четкович. С ним мне удалось встретиться и пообщаться на очередном VIII международном фестивале мастеров. Владимир закончил Белградский институт искусств, получив специальность художника-графика.
Побывав на нашем Обском Севере во второй раз, он лишь ещё сильнее убедился, что живут здесь сильные духом люди, поскольку климат очень суровый. Но это суровость не откладывает свой отпечаток на характер хантыйского народа – здесь живут истинно духовные, гостеприимные, мастеровые люди.
Реональда ОЛЬЗИНА
Номер Ханты Ясанг:
№ 15 (3411) 8.08.2014
- ВКонтакте
- РћРТвЂВВВВВВВВнокласснРСвЂВВВВВВВВРєРСвЂВВВВВВВВ
- Telegram
- Viber
- Blogger
