Юхан хонӑңӑн ай парщан хотые вєрсумн. Щӑта икєм резина ай хопӑ нух пусӑэ, хопӑ нух эщӑтӑс. Хопємн омсум мӑр етн оӑңая йис, шай яньщсумн па иы усумн. Юхан йиңк хонӑңӑн тёв-тёвӑт карӑң хумалха кӑншман яңхсӑт па ыв кўтэн еша ювийсӑт: «тёв, тёв, тёв».

Аӑң хӑт тәп нух єтӑс, ма няшты юхєм вўсум па ай сорт веты оьсум юхан питарн. Щиты и сортые па сортые ёша павӑтман, хәєм юхан па пелак ай ор хуща хутңат увты сый сащмӑс. Ма па хутңат ўвты щирн ўвты питсум:

– Ху-ху-ху-ху…!

Ин хутңыеам мєт щи сыящты питсӑт: ху-ху-ху-ху!

Еша вәман ин воиеам, хәум нуви хутаң, ма нумпємн ӑриты питсӑт, иы йиңка атты тӑхи кӑншсӑт. ӑрисат, ӑрисат, ищи ай ореа иы щи атсӑт ўвман: ху-ху-ху-ху!

Ма тәп тумаеңа, ыв иы атум тӑхе пеа вантыйсум.

Хәпиемн йиңкӑн омсум мӑр, муйсӑр вәнт мўв войлэңкет сый хәсум. Хумалха тыяң нюн кӑншум тёв-тёвам хӑннэхә эвӑт ӑнт па пӑӑт, тыв ма хонңєма ванашӑк латумӑт па тывет-тухет щи шәшийӑт. ыв пеаа вантты шєңк әмӑщ.

Юхан йиңк нумпийн па карнёрңӑт нэмӑн иы йиңк сўх пеа вантман ӑриӑт. Щиты ӑритэ кўтн ищи ўвийӑт. И карнёрӑң и лотн ӑрийс, щӑта роман йиңк сух вәнта иы щетӑс. Нух пәруман ню тыйн ай нялак хўые тӑйс. Еша вәман па и карнёрӑң иы йиңк сух вәнта щетӑс. Нух пәруман ню тыйн ищи ай хўые катман тӑйс. Щиты щи хӑт мӑр итн-итн иы йиңк вәнта щетыйӑт па ай нялак хўые катӑӑт. Тӑм воиет вепӑсӑты тӑхи пеа вантты ищи шєңк әмӑщ вәс.

Щи ювпийн па ай сортыет пеа вантты питсум. Ма няшєм йиңка ешӑк вущкӑєм па айтыева юхан питӑр вәнта таєм. Вантыйум няш ювпийн мӑттакєм ай сортыет йиңкӑн вәщӑт, ыв кўтэн нух йиңк эвӑт єсумтыйӑт. Няшєм имутыйн йиңка щи сәхтӑсы, ма щи кємн нух вущкӑєм, ай сортые няша тәхумман тёий. Щиты и сорт хўые, па сорт хўые нух катман пўтєм и шәпӑ вўша щи юхтӑс. Икєм па щи мӑр хопӑ вантты резина хопн яңхӑс: сортӑт, мевтэт, маӑң хўӑт ёша павӑтма.

Ма няштєм кўтн вәнт мўв пеа вантыйум. Тәрмев сўс пеа кєрума: тӑта-тута каӑт вущума хоюм лыптӑң сумтӑт. Юхан шәпи васы пактӑт тывет-тухет пәруман яңхӑт. Щиты вән васэт матты ыв йиуп тухаа питум васы пушаха тухан яңхты вәнтӑӑт. Хән щи васэт яма пәрӑтяты питӑт па васы пактӑт пиа ияха актӑщӑт, щи ювпийн морты мўва щи мӑнӑт.

Нумса питты утат оаңӑн нәмӑсты па ям, и сўс хӑт мӑр щи арат вәнт войт вантсум. Мўң вәты йиңкевн, мўвевн хуна тӑйўв тәрум партум тащ, тәп ыватты авӑман тӑйты мос. Мўң хӑнты мир вәупсэв ыв такэ-а мӑрєма йи.