Владимир па Эльвира Кечимовӊӑн Сәрхан район Когалым вош питӑрн 70-кєм вєрста вўшн вәӆӆӑӊӑн. Владимир ащеӆ – Иосиф Никитич Кечимов шәӊӑт, ӑӊкеӆ – Светлана Никитична (опращ нємӆ Русскина) – вўӆэт ӆавӑӆты кӑтӊӑн. Щи пӑта Владимир айтєӆн вўт кәртӑн ӑӊкеӆа-ащеӆа нётӑсман вәс. Юхи хӑщум оӆӑтн ащеӆ хўв пӑнта мӑнӑс, Светлана Никитична пухӆ хоттєӆ ёх пиӆа айкємн вўт кәртӑн вәӆ. 

Владимир Кечимов кимит пўш ими тәс. Эльвира имеӆ, опращ нємӆ Паньшина, Ниж­невартовской мўв и пєлӑк хӑнты, кимит пє­лӑк цыган мир эвӑӆт вәӆты нє. Вўт вошн вәӆты айӆат хоттєӆ ёх хуща пушхие єнмӑӆ. 

Сыры оӆӑтн, хән вәнт шуше тўтн єсы, щи пӑта интӑм Кечимовӑт тӑ вәнт шушия ӑн касӑсӑт. Щи тумпи па и нўша тӑйӑт – вәнтӑн пурвойт ӊхӑт. Ин щӑта вәты хӑнтэт ӑн вәӑт, муй щирн пурвой эвӑт вўэт авӑты. 

Владимир мўв иӆпи питы вуй па газ вўты тӑхийн рәпитӆ. Ащеӆ вәӆты пурайн «Лукойл» тӑхи пиа кашащты нєпека ёш пос пунсӑт, щирн мосты вєрӑт пӑта вухн нёты. Хӑнты хә ясӊӑт щирн, тәса нє­пек ӆэщӑтты ки, вәнт шушийн вәӆты рӑхӆ. Муй мосӆ, мўв иӆпи питы вуй па газ вўты ёх пиӆа иса пурайн путрємӑты щир вәӆ. 

Кашӑӊ увӑс хӑннєхә иты Владимир Кечимов шуши мир ӛращты вєрӑт әмӑщ, вўԯєң мир мӑңхӑтԯӑтн, Югра мўв губернатор Кубок ёша хоумты пӑта хопӑтн Мўвтєӆ мир кӑсупсэтн кӑсӆ. Щи тумпи Кога­лым вошӑӊ ӛращты вє­рӑт тәты ёх ма вәӆ. Ванкўтӆы ӆыв пиӆэӆа вәйтантыйӆ, мосӆ ки, имухты ха ӑкӑтӆӑӆэ па кӑ­супсыя тәӆӆэ. 

Апрӑӊ хӑнты хәева вўща ясӊӑт китӆўв, йис ёх хӑюм щи мурт тащ –вўӆы ӆавӑӆты вєр ищи саты тәса еӆӆы тәты па айӆат ёх щи вєра вәнӆтӑты.