Варьёган кәртӑн Нижневартовской районӑн вәӆмємн нємасыя кўтуп  ӑшколая ӊхсум па айӆат ёх пиӆа рәпитты нєӊӑт пиӆа вәйтантыйӆсум па путрємӑсум, муй щирн тӑм юхи хӑщум оӆӑтн ӆыв вєрӆаӆ ӆэщӑтӆӑт. Ӆыв ӑшкола хотэӆн хўв кўт эвӑӆт кӑт шуши мирӊӑн – хӑнтэт па юрнӑт няврємӆаӆ вәнӆтуман тӑйӆӑт. 

Щи пӑта Тамара Гор­деевна Казам­кина пиӆа вәйтантыйӆсум па ӆўвеӆ иньщӑссум, хутыса тӑм йисн щи ӑшколая ӊх­ты няврємӑт пиӆа рәпитӆ.
Мосӆ лупты, хуты тӑм нєӊев юхи хӑщум оӆӑтн Варьёган кәртӑӊ кў­туп ӑшкола хот хуща до­полнительной образо­вания педагог щирн рә­питӆ па шуши мирӊӑн няврємӑт хӑнты ясӑӊа па путрупсыя вәнӆтуман вәӆ.
Ӆўв ясӑӊӆаӆ эвӑӆт уша вєрсум, хуты 2002-мит оӆн Тамара Гордеевна Ёмвошн педагогической училища етшуптӑс па кәртӑӊ ӑш­кола хотӆа юхӆы пєӆы рәпитты юхтӑс. Щи киньща рәпата тӑта ӆўвеӆа щи пурайн ӑнтәм вәс. Щи пӑта Тамара ӑшколайн вәӆты интернат хуща няврємӑт аттые ӆавӑӆты нє щира рәпитты кашащӑс. Айӆат хӑннєхәев щи тӑхийн кӑт оӆ мӑр вәс. Ӛхӑт катра кўтуп ӑшкола хотӑӆн со­циальной педагог нє щирн рәпатайн мӑсы па оӆ мӑр щӑта рәпитӑс.

Имуӆтыйн Варьёган кәртӑӆн йиӆуп, ӆăщкам па хурамӑӊ кўтуп ӑш­кола интернат хотӆ пи­ӆа омӑссы. Щи вўш эвӑӆт кәщаитн Тамара Гор­деевна воспитатель нє щирн интерната рәпитты вохсы. мкєм хўв оӆ мӑр ӆўв хӑнты па юрн мирӊӑн няврємӑт пиӆа вулкємӑс. Щи киньща хӑнты нє   ӑшкола кәщаитн йиӆуп вуӆаӊ вєрн мӑсы. Щиты ӆўв дополнительной образования педагог па шуши мир пухӑт па эвет рәт ясӊеӆа вәнӆтӑты хӑннєхәя йис. Щи вєрӆ пӑта мин иха м хўв мсыева путрємӑсмӑн.

- Тамара Гордеевна, муй щирн ин нӑӊ няврємӑт рәт ясӑӊа вәнӆтӑӆӑн?

- Тӑм оӆэвн ма хӑнты пухӑт па эвет иса оӆӑӊмит класс вўш эвӑӆт па ӆа­пӑтмит классӑт вәнты ӑш­колайн, урок вєрӆаӆ тум­пийн, атэӆт щирн хӑнты ясӑӊӑн хӑнш­ты па тәса путрємӑты вәнӆтӑӆум.
Щӑӆта нивӑӆмит па ртъяӊмит классӑтн вәӆты айӆат ёхӆам ищиты ма кружок щирн рәт ясӑӊа па путрупсыя вәнӆтӑӆум. Вантэ, ӑшколайн вєрум программа щирн рәт ясӑӊ вәнӆтӑты пӑта юхи хӑщум оӆӑтн щос иса ӑн па мӑӆы. Щи пӑта, рўщ щирн ки лупты, внеурочной хурасн мўӊ рәт ясӊевн хӑншты па ӆўӊӑтты муй путӑртты няврємӑт вәнӆтӑӆўв.

Щит шєӊк щухӆăсӑӊ вєр. Вантэ, тӑм йисн, катра иты, айӆат пух па эви ӑшколаев хуща шимӆ. Итәх вәншӑк классӑтн нивӑӆ няврєм, кимит тӑхийн – тәп кӑт ай пух па щи. Ма щирємн, тӑмхӑтӆ ӑшкола хотэвн ар пєлӑк хӑнты няврєм Казамкинӑт рәт ёх эвӑӆт вәӆ, щӑӆта юрн эвӑӆт – Айваседа рәт ёх, ӆыв пеӆн Сардаковӑт, Иуси па рәт ёх па ӆикумӆӑт. 
Мосӆ лупты, хуты ӑӊ­киӆаӆ-ащиӆаӆ кашащты нєпекӑт хӑншӆӑт, ӆәӆн няврємӆаӆ рәт ясăӊа еӆӆы ищиты вәнӆтӑты мосӆ. Щимӑщ нєпек такӆы мўӊ ищиты хӑнты пухӑт па эвет ӆыв ясӊеӆа еӆӆы вәнӆтӑты щирӑт тӑм йисн ӑн па тӑйӆўв. Хӑнты няврємӑт ӆыв рәт ясӊеӆа ма вәнӆтӑӆум, юрн мир пухӑт па эвет атэӆт щирн – па нєӊӑтн. 

- Муйсӑр мӑӊхӑтӆӑт ӑш­кола ӆыпийн ӆэщӑтӆӑты, мӑта утӑт пурайн няврє­мӑт ӆыв кўтэӆн путӑртты, ариты па стихӑт ӆўӊӑтты вєритӆӑт?

- Ван хӑтӆуп тыӆӑщн «Рәт щирӑт» мӑӊхӑтӆ кашӑӊ оӆ вєрӆўв, хута ай пухӑт па эвет ӆыв рәт ёхӆаӆ оӆӑӊӑн айкеӆӑт тәӆӑт. Итәх пурайн арсыр арӑт ариӆӑт, тәс айкеӆ хӑнты ясӊеӆн ӆэщӑтӆӑт. Щӑӆта па фронтальной нємуп диктантӑт кашӑӊ оӆ хӑншӆўв. «Щеӆ вухӑӊ йинтуп» нємуп кӑсупсы вәнӆтӑты эвиӆўв кўтн вєрӆўв па вантӆўв, муйсӑр эвет ёнтӑсты щирӑт ушӑӊа-сашӑӊа тӑм йисн тӑйӆӑт.  

- Аӆпа, юхи хӑщум пурайн ӑшколайн щимӑщ пухӑт па эвет вәӆӆӑт, мӑта хуятӑт шєӊк ма ӆыв рәт миреӆ ясӑӊ тӑйӆӑт?  

- Ӑнтә. Тӑм йисн щимӑщ няврєм мўӊ хущева ӑнтәм. Тәп ай пухлэӊкие тӑта мосванӑн оӆӑӊмит класса веӆщи юхтӑс. Ма вәйтӆєм, хуты шєӊк ма ясӊӑӆ тӑй­ӆӑӆэ. Тәп ӆўв иса елємӆ мўӊ пиӆэва путӑртты. Щиты ин тӑта мўӊ вәӆӆўв па шуши мир няврємӑт пиӆа рәпитӆўв.

Путӑр хӑншӑс: 
Владимир Носкин