Шуши мирев вәԯупсы - Жизнь хантыйского народа

Тӑм оӆ Ас нопӑтты тыӆӑщ 10-митн культурология вєрн учёной, Ём­вошн вәӆты хӑнты нє Наталья Величко сєма питум хӑтӆӑӆ вўш эвӑӆт 50 оӆ постӑс. Ӆўв хәс вет муӆтас оӆ научной рәпата тәӆ, округ ӆуваттыйн ӑшколайтн рәт ясӑӊа па литература вєрӑта вәнӆтӑты хуятӑт пиӆа рәпитӆ, кўш ясӑӊӑн, кўш нумсӑӊ нєпекӑтн нётӆ.

Касум вошн вўӆєӊ ёх мӑӊхӑтӆ пурайн арсыр ванӆтупсэт рәпитӆӑт. Щи пурайн вошӑӊ мир ёнтум ӆәмӑтсухӑт, ар­сыр пурмӑсӑт ванӆтӑ­ӆӑт па тыныӆӑт. Щиты мойӊ хуятӑт шуши мир йис вєрӑт оӆӑӊӑн уша павӑтӆӑт.

Тӑм оӆн щи мӑӊхӑт­ӆӑн ма Касум няврємӑт вәтаӊа вєрсум, ӆыв щи пурайн арсыр мосты пурмӑсӑт тынысӑт. Ин щи няврємӑт оӆӑӊӑн еша хӑншӆум.

Вәс ки Артанзеев хӑнты мир кӑнащ хә, хуты хәнты ӆўв рәтэӆ хуща учёной нє питӆ – щит Софья Владимировна Онина. Вантэ, ӆўв аӊкаӊкеӆ Анас­тасия Захаровна Пырысева, эвеӆ опращнємӆ Ар­танзеева вәс. Щит Кунавӑтской мўвев хӑнты кӑнащ рәт. Тӑм ванӑн С.В. Онина 50 оӆа йис.

Угут кәрта яӊхмємн ма хурамӑӊ кӑрӑщ кирмӑщ хот шиваӆӑсум, щи хот пўӊӑӆн няврємӑт юнтсӑт, щирн ма имухты уша вєрсєм, щит хӑнты няврємӑт вәӆты-хоӆты хот. Щив ӆуӊмємн ма няврємӑт вантман тӑйты нє Мария Анатоль­евна Дмитриева пиӆа вәтаӊа йисум. Ӆўв тӑм хот аӆяс па имухты айкеӆ тәс.

М.А. Дмитриева кӑт нєпек тӑйӆ, и щирн ӆўв хӑтӆ мӑр ай няв­рємӑт вантман тӑйты нє, кимит нєпек щирн – математика па инфор­матика урокӊӑн тәты нє. Ӆўв 18 оӆ Угут кәртӑн интернат хуща рәпитӆ. 

Тӑм оӆ вән кєр тыӆӑщ 22-митн Марина Андреевна Кане­ва (Ерныхова) ветъяӊ оӆа йис. Ӆўв Нуви сӑӊхум район Касум вошн вәӆ, ар оӆ мӑр ӆап­кайн рәпитӆ.

Щимӑщ нєм Тўкъя­кӑӊ кәртӑн єнмум хӑн­нєхуятӑт рәт ӆєр ванӆтупсы тӑйс. Щит вән кєр тыӆӑщ 30-митн «Торум Маа» нємпи кат­ра пурмӑсӑт ӆавӑӆты хотн вәс. Тыв Лельхо­вӑт, Пятниковӑт, Гриш­кинӑт, Юминӑт, Себу­ровӑт юхтыйӆсӑт.

Музей кәща ӆӑӊкӑр хә Евгения Касатова ванӆ­туп­сы пўншумн лупӑс:

Йистєӆн Югра ёх Россия мўвев пӑта арсыр тынӑӊ войт сухӑтн нётӑс тарум, вуӆаӊ мўва йиты. Россия мўвев вуракӑт эвӑӆт тәрийӆты пӑта па хон пєлӑк мўвӑт эвӑӆт арсыр пушканӑт ӆәтты щира тынӑӊ вой сухӑтн сухуптӑсыйт. Кашӑӊ оӆ Ёмвош округ сєма питум хӑтӆ постум пурайн хўӆ па вой, арсыр воньщумутӑт па сыр-сыр ӆєтутӑт ванӆтупсэт вәӆӆяӆӑт. И щимӑщ ванӆтупсыйн ма «Охтеурской» нємпи питы вухсар єнмӑӆты тӑхи кәща нє Татьяна Скокова пиӆа вәйтантыйӆсум па путӑртсум.

Тӑта ма хӑншӆум Хосyм курт оӆӑӊӑн. Щи куртые омсӑс Вощрэӊ пусӆ ӆыпийн. Муя Хосyм курта ястӑса? Щӑта, мӑттэ, ар хос энммaӆ. Хос – щит питы потaӆыет, ӆыв ӆэр хщи энмӆӑт. Ӆыпийн нви нохӑр сэм хрпи эпӆӑӊ ӆэтт тӑйӆӑт. Хосyм курт онтасн вуӆты посӑӆн ар хос вуӆмаӆ – энммaӆ. Щи вурӑӊӑн щи курт Хосyм курта опрaщӆӑвн ястӑ­са. Хос, вун ёхӆӑв ясӑӊ щирн, мӑттэ, хўӆн яма ӆэты т. Мўӊ па ай прайн щимӑщ эпӆӑӊ поталыет йиӊк онтасн кӑнш­сўв па ӆавемийӆсўв. 

Тӑм оӆ ямкєм арат нєпекӑӊ шуши хуятӑт сєма питум вуӆаӊ хӑтӆӑт пориӆӑӆӑт. Итәх хуятӑт 50 тӑӆа йисӑт, итәх ёх 55, 60 оӆ сєма питум хӑтӆ вўш эвӑӆт постӑӆӑт. Щи хӑннєхуятӑт кўтн Елена Павловна Степанова (Рябчикова) оӆӑӊӑн хӑншты ӆӑӊхаӆум, ӆўв тӑм пўш Ас нопӑтты тыӆӑщ 22-мит хӑтӆӑн ищи 55 оӆа йис. 

Ая вәӆмємн мӑнєма ванкўтӆы путӑртыйӆса, мӑтты Вўтвош и оӆӑӊӑн пирӑщ па вән вәнши вәс па ӆаӆя мӑнум ёх щӑта воӊхєпӑн нємӆаӆ ӆаюмн сэвӑрсӑт. Ма ӆӑӊхаӆум и хӑннєхә оӆӑӊӑн путӑртты, ӆўв ищи щи вән вәншийн ӆаӆя мӑнмаӆн воӊхєп хуща нємӆ вєрӑс. Щит ма аӊщащєм Александр Иванович Молданов.