Айкеԯӑт - Новости

Щи оӆӑӊӑн ӊта пӑсан пурайн путӑртсўв, мӑта ут лыпӑт хойты тыӆӑщ 30-мит хӑтӆӑн «Хӑнты ясӑӊ» газетаев 65 оӆ постӑты пӑта «Торум Маа» нємпи йис пурмӑсӑт ӆавӑӆты хотн ӆэщӑтсўв. 

Вўща ясӊӑт лупсӑт: округ оса, айӆат ёх вєрӑт тәты департамент кәща нє Елена Шумакова, округ дума кәща ӆӑӊкӑр хә Еремей Айпин, 30 муӆтас оӆ редакцияевн кәщая вәӆум ими Мария Волди­на па па хуятӑт.

Лыпӑт хойты тыӆӑщ 6-мит хӑтӆӑн Москва хон вошн Россия мўв наукайт Академия хот хуща вәӆты арсыр ясӊӑт ӆєрамтты институтн хӑнты учёной нє Софья Владимировна Онина (Талигина) филологической наукайт доктор нєм хоӆумтӑс. Ӆўв «Способы выражения побуждения в хантыйском языке» нємпи докторской диссертация хӑншӑс. 

Тӑм ванӑн Сўмӑтвошӑӊ киникайт хӑншты хә Леонид Бабанин Донбасс оӆӑӊӑн ӆэщӑтум «Ёмвош эвӑӆт ӆаӆясты Донбасс хуща. 2015-мит оӆ» нємуп киника єсӑӆсы. Йиӆуп киника кӑт ясӑӊӊӑнӑн хӑншман вәӆ, щит рўщ па английской щирн. Иха ӆўӊӑтты ки, «Ёмвош эвӑӆт ӆаӆясты Донбасс хуща. 2015-мит оӆ» нємуп киника 2 000 арат єсӑӆман вәӆ.

Тӑм оӆ оӆӊитум вўш эвӑӆт Россия мўвн вәӆ­ты кӑт мил­лион хӑн­нєхә рәпа­та оӆӑ­ӊӑн нєпек элект­ронной щирн ӆэ­щӑтсӑт. Щи вўрн ка­шӑӊ хуят мосты пу-райн рәпата нєпекӆ вантты вєритӆ. Интӑм ӑн мосӆ ка­шӑӊ пурайн рәпата тӑхийн нєпек хӑншты па ӆавӑӆты, ӆәӆн щи нєпек ёша вўты. 

Округ мирев, хуйтат льготной категория тӑйӆăт, интăм рўтьщă­ты хотăта ӊхты питӆăт. 

Ешавәӆ Ас потты па ван хăтӆуп тылăщӊӑнӑн округевн вәӆты мир кăт тӑхия, щит Ялуторовск во­ша «Берёзовая роща» нємпи тӑхия па Омск мў­ва «Колос» тӑхия ӊхӆăт. Щӑта леккарăт кӑӆы ӆєрăт, щӑӆта ёш-кўр па нервной па эндокринной система кӑщи-мәшăт лекщитӆӑт.

Хоньщупсы мәш (грипп) – щит инфек­ционной кӑши-мәш, вирусӑт эвӑӆт тывӆ. Хӑннєхә ӆыӆ шив мухты щи кӑшийн юхӑтӆа, хән мәшӑӊ хуят пиӆа и тӑхийн вәӆӆяӆ. Хән хӑннєхә кӑшаӊа йиӆ, ӆапӑт хӑтӆ мӑр ӆўв эвӑӆтэӆа па хуят хоньщупсы мәшн питты вєритӆа.

Мӑта щирн уша вєрты рӑхӆ: 

- Мәша йиты пурайн єӆ сух каврум;

 - ух кӑши;

Тӑм ванӑн Камчатка мўвн Российской айӆат ёх «Экосистема. Заповедный край» нємпи вән мирхота ӑкӑтсыйт. Иха ӆуӊӑтты ки, 450 муӆтас айӆат хуят вәйтантупсыйн вәс. Щӑта ӆыв мўвев-йиӊкев ӆавӑӆты щирӑт оӆӑӊӑн путӑртсӑт. Сырыя айкеӆ вєрсӑт, муй щирн ӆыв мўвӆаӆн щи вєрӑт ӆэщӑтӆӑт, хутыса хиет, ваншиет па иса єнумты утӑт шавиӆӑт па ӆавӑӆӆӑт. Щи тумпийн кўтэӆн путӑртсӑт, муй вєрты, ӆәӆн еӆӆы єнумты айӆат ёх рәт мўвиеӆ ищиты мосман па сӑмӑӊа ат тӑйсӑт.

Кашӑӊ оӆ лыпӑт хойты тыӆӑщн 18-мит хӑтӑӆн мўвӑт-йиӊкӑт, вәнтӑт вантман тӑйты ёх мӑӊхӑтӆ постӑӆӑт. Щи вєр вўраӊӑн Ёмвошн «Югра-Экспо» хуща «Югорский лесной фо­рум» нємуп вән мирхот мӑнӑс. Тӑм мирхот округ правительства кәщайт, округ мўв-авӑт ԯавӑԯман тӑйты вєрӑт тәты департамент па Югра мўв вәнтӑт вантман тӑйты тӑхи ёх ԯэщӑтсӑт.

Москва вошн нӆ хӑтӆ мӑр Югра мўвев оӆӑӊӑн ванӆ­тупсыя 20 щурӑс муӆтас хуят юхтыӆӑс. Ӆыв ӑнтә тәп сыр-сыр пурмӑсӑт вантсӑт, кашӑӊ хуят муӆты әмӑщ ут вєрты па єпӆӑӊ ӆєтут ӆавємӑты вєритӑс. 

Кӑсупсыйн Югра мў­вев оӆӑӊ тӑхия питӑс, кимӑт тӑхи – Ямал мўв ёх вўсӑт, хәӆмит тӑхийн – Камчатка мўв хуятӑт. Мєт вән Гран-при мойӆупсы Сахалин мўв хуятӑт ёша павӑтсӑт. 
Кашӑӊ щив юхтыӆум оса тӑхи муй па ӆўв саттэӆа вәӆум хуят ищи мойӆӑсыйт па ишӑк нєпекӑтн мӑсыйт. 

Югра мўв тәса вє­рӑнтты хӑннє­хуя­тӑт лыпӑт хойты ты­ӆӑщ 14-мит хӑтӆ вўш эвӑӆт па 18-мит хӑтӆ вәнта Москва хон вошн Мўвтєӆ мир «Сокровища Се­ве­ра» XVII-мит ванӆтупсыйн рә­питсӑт. 

Югра мўвев делега­ция тӑхия ӆуӊум вєрӑнтты ёх мєт ар хӑн­нєхә тӑйс.