Айкеԯӑт - Новости

Ёмвошн шуши мир пиӆа Россияйн рәпит­­ты Венгрия мўв Посол ики Норберт Конкой «Торум Маа» йис пур­мӑсӑт шавиман тӑйты тӑхийн вәйтантыӆӑс. 

«Торум Маа» тӑхийн рәпитты хәйӊӑн Вячес­лав Кондин па Анатолий Брусницин ай павӑрт хотӑӊ, нянь кәрӑӊ, ӆу­пасӑӊ ай кәртые ванӆ­тӑсӊӑн. Еӆӆы Венгрия мўв Посол ики Норберт Конкой нянь кәр эвӑӆт каврум нянь сӑрн нух таӆӑс. 

Тӑм ванӑн Югра мўв кәща ими Наталья Комарова арсыр мир оса тӑхет кәщайт пиӆа вәйтантыӆӑс. Ёмвош округ сыр-сыр айӆат ёх тӑхи кәща нє Юлия Трушкова путӑртсӑӆэ, муй­сӑр әмӑщ етнхотӑт ӆыв ӆэщӑтыйӆсӑт. 

Ван хӑтӆуп тыӆӑщн 2018-мит оӆн иса рәт ясӊӑт мӑӊхӑтӆ вєрты ӆпн «Рәт ясӑӊ – ан ху­ӆӑты юхан» нємуп әмӑщ вәйтантупсэт ӆэщӑтсӑт. Щирн рәт ясӊӑтн арсыр мир эвӑӆт няврємӑт арӑт па ӆўӊӑӆтупӑт ванӆтӑ­сӑт. Щи тумпи вән хуя­тӑт ищи ӆыв ясӑӊӆаӆн путрӑт ӆўӊӑтсӑт.

Ас нопӑтты тыӆӑщн 24-25-мит хӑтӆӊӑнӑн Санкт-Петербург вошн вуӆаӊ мирхот вәс, хута Россия мўвевн вәӆты арсыр ясӊӑт ӆєрамтты вєрӑт оӆӑӊӑн учёнойт путӑртсӑт. Мирхот Увӑс мўв, Сибирь па Дальний Восток шуши мирӑт Ассоциация па шу­ши мирӑт благотворительной фонд ёх ӆэщӑтсӑт. 

Тӑм товийн Увӑс мўвева мәшӑӊ васэт юхӑтсӑт. Щи мәш рўщ щирн саркоцистоз нємӆ. Вой веӆпӑсӆӑты хуятӑта щи оӆӑӊӑн иса вәты мосӆ.

Щи мәш оӆӑӊӑн ма рәт хәем эвӑӆт уша па­вӑтсум. Ӆўв Нуви сӑӊ­хум районӑн вәӆ. Тӑм ванӑн васы веӆпӑсӆӑты мӑнӑс. Кӑт шош веӆӑс. Имеӆ пиӆа юӆн щитӊӑн сәхӑтты питсӑӊӑн. И васы ям вәс, кимит ут кєшийн эвтӑс, ӆыпийн нуви нярвойт шиваӆӑс. Уша павтӑс, щи шош саркоцистоз утн мәш­мӑӆсы. 

Саркоцистоз – щит войт па тухӆӑӊ войт мәш, мәшӑӊ войт пӑрӆӑт. Нярвойт ӆонӑн сєма питыйӆӆӑт, щӑта вәӆӆӑт, єнумӆӑт. 

«Спасти и сохранить» нємпи мўв-авӑт ӆавӑӆты акция Югра мўвевн 17 оӆ юхӆы оӆӊитсы. Щит вєрӆы, ӆәӆн мўӊ мирев мўвӑт, вәнтӑт, автӑт, йиӊкӑт ӆавӑӆман ат тӑйсӑт. Акция мӑнты пурайн округ хўваттыйн арсыр мирхотӑт вєрӑнтӆыйт, мўвӑт сыстамтӆыйт, вәнтӑтн юхӑт омӑсӆыйт.

Тӑта мосванӑн Ас нопӑтты тыӆӑщ яртъяӊмит хӑтӑӆн Ёмвошн Вуӆаӊ ӆаӆьн нух питум ёх емӑӊхӑтӆ вәс. Тӑм емӑӊхӑтӆ округев вән кәщаитн нємасыя КТЦ «Югра-Классик» хот еӆпийн вәӆты вош хӑрыйн ӆэщӑтсы. 

Әмӑщ вантты вәс

Сырыя вошӑӊ хӑннє­хуя­тӑта тәс па хурамӑӊ военной парад ванӆ­тупсы вєрсы, хута итн-итн арсыр военизи­ро­ванной тӑхетн рәпитты ёх,  Росгвардия, полиция, МЧС, юнармейцӑт муй кадетӑт шәшсӑт. Щи вєр хущи мєт вән кәщая генерал-майор Василий Романица тӑм пуӆяӊ вәс. 

Вән кєр тыӆӑщ сухӑнты еӆпийн Ёмвошн «Югра» нємуп айкеӆӑт ӑкӑтты хот йитн округев хўваттыйн вәнӆтӑты па айӆат ёх вєрӑт вантман тӑйты департамент кәща хә А. Дренин, увӑс мир вәнԯ­тӑты вєрӑт әхтыйн кәща нє Н. Костылева, щӑта рәпитты айӆат нє О. Албина, экономической наукайт доктор, «Югра ӆыӆӊуптӑты» оса тӑхи кәща ӆӑӊкӑр хә В. Куриков па Ас-угорской институт эвӑӆт айӆат научной рәпатнек А. Шиянова пиа вәйтантупсы вәс. 

Мирхотн Югра мўв шуши айӆат вәнӆтыйӆты ёха нётупсы вух оӆӑӊӑн путӑртсы. Вантэ, 2019-мит оӆ оӆӊитум юпийн тӑм поступсы йиӆпатсы. 

Увӑс шуши мир рәпатайт кӑншты пурайн «Поддержка занятости населения» нємпи поступсы хўват щимӑщ нётуп­сэт вәӆӆӑт:

– щи вєр тәты тӑхи ёх хӑннє­хә ӆўв саттаӆа рәпата кӑншты пурайн нётӆӑт;
– вошӑтн муй кәртӑтн кәщайт хӑннєхә ям рәпата вәйтты пура вәнты муӆты тыӆӑщ мӑра рә­па­та мӑӆӑт;
– рәпатайӆы ёх тәрум пӑта йи­ӆуп вєра вәнӆтыйӆты китӆыйт;
– рәпатайӆы ёх пиӆа нумӑс­ӆаӆ ӑн шӑкты пӑта тохтурӑт путӑртӆӑт.

Щи тумпи щимӑщ государ­ственной нётупсэт вәӆӆӑт:

Ас нопӑтты тыӆӑщ 7-мит хӑтӑӆн Ёмвош правительства хот йитн межведомственной комиссия тӑхи кәщайт мирхот вєрсӑт, мӑта ут мӑнум пурайн шуши мира ӆэщӑтум нётупсэт оӆӑӊӑн лупсӑт.

Сырыя видеоконференция щирн ияха ӑктӑщум арсыр шуши мир вєрӑт ямӑӆты кәщайт еӆ­пийн айкеӆ Сәрханӆ район увӑс мирӑт Совет кәща  юкана вәӆты нє Вера Кондратьева тәс. Ӆўв путӑртӑс, хуты ин 2018-мит оӆн ӆыв араттєӆн няӆ мирхот Угут, Сытомино, Ульт-Ягун па Лянтор вошӑтн ӆэщӑтсӑт. Тӑм оӆн – па кӑт мирхот Русскин­ской кәртӑн па Угут вошн вәсӊӑн. 

Ёмвошн образования департамент тӑхийн увӑс мир ясӊӑт па культура ӆавӑӆман тӑйты вєрӑт артаӆӑты научно-координационной со­вета ӆуӊты ёх мирхота ӑктӑщийӆсӑт. Ӆыв рәт ясӊӑта вәнӆтӑты вєрӑт наука щирн ӆэщӑтты па щи әхтыйн рәпитты ёха нётупсы щирӑт тәты оӆӑӊӑн путӑртсӑт.

Щи вєрӑт оӆӑӊӑн раз­вития образования инс­ти­тут хущи рәпитты кә­ща ӆӑӊкӑр ими Виктория Клюсова па Югорской уни­верситетн рәт ясӑӊа вәнӆ­тӑты доцент нє Софья Онина айт тәсӊӑн.