Понавӑт вошн кашӑң о вәщ тыӑщ кимит рўтьщӑты хӑтӑн хў вепӑсӑты ёх емӑңхӑт вєрӑнты. Щӑта вәты хӑннєхуятӑт ясңӑт щирн, щит мєт әмӑщ ўң емӑңхӑт. Щит пӑта «Созвездие» нємуп культура тӑхийн вошӑң хуятӑт ияха ӑктӑщсӑт, ән ыв кўтєн сыр-сыр кӑсупсэт эщӑтты па вантупсэт пўншты. Тӑта мӑтты ки кашӑң вош хўыйн вән емӑңхӑта йис. Аӑң вўш эвӑт ям, тєвӑң ўң хӑтые вәс. Ас эвӑт ай вот рўвие пуӑс.

Понавӑт вош йис пурайн Ас нумпи пӑ рўвайн мўң хӑнты ёхўвн омӑссы. Мосӑң, щит пӑта кашӑң хә хуят тӑта хў вепӑсӑты вєрӑта вәты-хоты щирӑн катӑсыйман вәс. Понавӑт вош герб нємуп посн мухсӑң хў хурасые оюпн хӑншмӑн тӑйы. Щимӑщ утые мӑтты тӑхийн нын ки шиваӑты, щит, вантэ, тӑм вош пос.
Мос лупты, хуты тӑм емӑңхӑт оңиттыйн ай хопӑң кӑсупсы пўншсы. Тӑм кӑсты щирӑта кўтєн 30 вошӑң хӑннєхә катӑсӑс. Ямкєм арат айат хӑннєхә па вәна ювум хә ёх па нє ищиты кӑсупсы вєрӑта вўянтыйсӑт. Вән амтӑң вєрн щит оӑңӑн путӑртты рӑх, хуты вәнат ёхўв нємуты кӑсты хурас эвӑт юхы ӑн хӑщсӑт. ыв кашӑң тӑмӑщ емӑңхӑт эщӑтты пурайн иса арсыр вєрӑта катӑсыйӑт. Айат ёх па кўтєн тәса па сора хопн овӑман яңхӑт.
Ай хопӑң кӑсупсэт мӑнты кўтн, вошӑң нєңӑт, ащкама эщӑтум вош хӑры кўтупн, сыр-сыр хурамӑң па әмӑщ вантупсэт, тўтӑң рат хӑр вєрсӑт па вән хўӑң пўт кавӑртсӑт. Мос лупты, хуты иса тӑаң хӑт, емӑңхӑт мӑнум мӑр, вошӑң мир єпӑң хошум йиңкӑн па кавӑртум хўн Марина Петровна Капустайн яньщтӑсыйт па апӑтсыйт.
Хӑт шәпн, вошӑң мир рўтьщӑты хотн рәпитты хӑннєхуятӑт нємасыя әмӑщ якты-ариты хӑрӑт эщӑтсӑт. Якты муй ариты хот пўншты епийн Понавӑт кәща нє Лариса Макеева ям вўща ясңӑт хӑннєхуятӑта тәс па хў вепӑсӑты ёх емӑңхӑт пӑта вещката рәпитум ёхўв па муртӑң вошӑң нєңўв сыр-сыр ишӑкты нєпекӑтн катуптӑсэ. Нуви сӑңхум район кәща эвӑт ишӑкты нєпекӑтн Паштӑр кәртӑң ух хә Олег Лельхов па крестьянско-фермерской тӑхи кәща Игорь Завьялов мойӑсыйт. Югра муниципальной образования Совет тӑхи эвӑт шуши мирӑт вәупсы щирӑт еы тәты па ар о мӑр тўңщирӑңа па яма рәпитты пӑта Людмила Васильевна Туполева па Гульнара Нетунаева ишӑкты нєпекӑтн мӑсыйңӑн. Хў вепӑсӑты ёх емӑңхӑт вўраңӑн Понавӑт вошӑң кәща нє нєм эвӑт ишӑкты нєпекӑтн Геннадий Никишкин па Владимир Лельхов катуптӑсыйңӑн. «Единая Россия» партия эвӑт ар о мӑр яма рәпитты вєра эщӑтме пӑта Виктор Барышников па Алексей Бикеев ишӑкты нєпекӑтн юкантсыйңӑн. Щи тумпийн, тӑм емӑңхӑтӑн ищиты ар о мӑр иса хў вепӑс хущи вещката па тўңщирӑңа рәпитум хәйңӑн Григорий Суетин па Геннадий Буторин вән кәщаитн ӑн юрємӑсыйңӑн па ищиты ишӑкты нєпекӑтн мӑсыйңӑн. Нєңӑт эвӑт ищи ям арат о мӑр хў вўты тӑхетн сыр-сыр авӑртӑң рәпатайт вєрум нє Людмила Смердева кәща ёхўвн ишӑкты нєпекӑн мойӑсы. Щӑта хў вепӑсӑты ёх емӑңхӑт пурайн, Понавӑт вош хӑннєхуятӑт «Хоттє ёх яма па тўңщирӑңа тӑйты хӑт» па постӑсӑт. Александр Александрович па Галина Васильевна Михайловңӑн араттєн 50 о ияха вәты-хоты щира постӑсыйңӑн.
Тӑм хў вепӑсӑты ёх емӑңхӑт мӑнум пурайн вошӑң якты-ариты тӑхийн шєңк әмща па сӑмӑңа мир епийн айат хӑннєхуятӑт яксӑт па арисат, щит Денис Данилов, Маша Глухова, Илья Чешков, Игорь Алехин, Мила Кузнецова па Женя Сухарко. Якты щирӑт вантӑты «Каблучок» па «Креатив» нємуп тӑхєңӑн хурамӑң якӑт вошӑң ёхўва-нєңўва вантӑсӑт. Щӑта кӑт нєңңӑн, Валентина Сухарко «Сорнең хўые» па Людмила Молокова «Вотӑң хӑтые», рўщ мир арңӑн әмӑщ турсыйн арисӑңӑн. Хӑнты имеңӑн Людмила Туполева па Раиса Афанасьева мўң миревн ямсыева ар тӑхи хущи яма вәйтты «Петәщ, Петәщ, кумие» ар ищиты арисӑңӑн. Тӑмӑщ емӑңхӑтӑн вәум, якты-ариты хот вантум па хәӑнтум хӑннєхуятӑта кашӑң вєр тӑта шєңк әмӑщ вәс.
Емӑңхӑт мӑнум мӑр вош кўтуп хӑрыйн сыр-сыр хӑнты мир вєрӑнтты хәйт па нєңӑт ёшн вєрум муй па ёнтум пурмӑс вантупсы пўншсы. Тӑта вәум нє хуятӑт арсыр шуши мир єтутӑң анӑт-сәнӑт вантӑсӑт па кӑсты щирӑт ыв кўтєн вєрсӑт, муйсӑр єтут щи утӑт эвӑт шєңк яма па єпӑңа кавӑртсы. Щӑта ёш вєрӑт тәса вєрты нєңӑт сӑк эвӑт турлопсӑт кӑрӑтты щирӑт аьсӑт. Иса ыв щирєн рәпата тӑйты хӑннєхуятңӑн Виктор Барышников па Марина Дьяченко тынєсты тӑхет вєрсӑңӑн, ән вошӑң мир єтутӑт па пурмӑсӑт ат әтсӑт.
Щӑта рӑх лупты, хуты ай хопӑң кӑсупсыйн мєт оңа нєңӑт эвӑт Елена Величко па Галина Братцева юхӑтсӑңӑн. Хә ёх кўтн мєт оӑң тӑхєңӑн Николай Долгушин па Анатолий Туполев ёша павӑтсӑңӑн. Оӑң, кимит па хәмит тӑхия питум хуятӑт мойӑсыйт. Тӑмиты хў вепӑсӑты ёх емӑңхӑт Понавӑт вошн тӑм пўш мӑнӑс.

Людмила ТУПОЛЕВА, 
Понавӑт вош нє
Хӑнты ясӑңа тулмащтӑс 
Владимир ЕНОВ