Васы мӑнты тыӆӑщ 5-мит хӑтӑӆн мўв мўхӑӆ мир няврєм вәнӆтӑты ёх мӑӊхӑтӆ постӑсӑт. Ёмвош округн ар хӑннєхә ай тёпиет рәт ясӊӑта вәнӆтуман рәпитӆӑт. Тӑм вуӆаӊ мӑӊхӑтӆ ӆєпн эвет па пухӑт хӑнты, рўщ ясӊӑта вәнӆтӑты нє Олеся Вячеславовна Хандыбина оӆӑӊӑн хӑншӆум. 

Югра мўв увӑс пєлӑкн Cўмӑт­вош районӑн ай Ас хонӑӊӑн Тэк кәрт вәӆ. Тӑм вошн хўв йистєӆн Ас хӑнты мир вәӆӆӑт. Тэк кәртӑӊ ёх ӆыв рәт ясӊеӆн ариӆӑт, кўтэӆн путӑртӆӑт. Няврємӑт хӑтӆ мӑр тӑйты хотн ай тёпиет хӑнты ясӑӊа вәнӆтӑӆыйт. Щӑӆта ӑш­колайн няврємӑт рәт ясӑӊ ищи уша вєрӆӑт. 

Айӆат Ас хӑнты нєӊие Олеся Вя­чеславовна Хандыбина 2007-мит оӆн Ёмвошн Югорской университет етшуптӑс. Ӆўв нємасыя рәт ясӑӊ ӑшколайн няв­рємӑта вәнӆтӑты вєр әхтыйн вән нєпек ёша павтӑс. Щӑӆта нӆ оӆ мӑр хӑнты ясӑӊ наука щирн уша вєрман рәпитӑс. Ӆўв арсыр киникайт хӑншӑс. Щиты 2011-мит оӆн «Щащєм моньщӑт» нємуп моньщӑӊ нєпек єтӑс. Ӆўв щив Тэк кәр­тӑӊ нәпӑтӆаӆ вәна вум хӑнты мир йис путрӑт, моньщӑт ӑктӑс. Тӑм кар­кам эви 2013-мит оӆн «Словарь синонимов хантыйского языка» нє­муп киника вєрӑс. Тӑм нєпекӑн ӆўв иха арсыр хӑнты ясӊӑт ӑк­тӑс. Щи тумпи Олеся Вячеславовна м арат оӆ мӑр няврємӑт пиӆа рәпитман ма вәӆӆэ, ай ёх вәнӆтӑты киника рәт ясӑӊӑн шєӊк ӑн тӑрмӑӆ. Щи пӑта 2013-мит оӆн «Сборник твор­ческих ра­бот по лите­ратуре: пособие для учителя» нє­муп ут хӑншӑс. Нын щи вәӆӑн, катра хўв йисн хуӆыева хӑнты пуш­хиет рәт ясӊеӆ ма тӑйсэӆ. Ин нюр па щира питсўв. Ай няв­рємиет иса рўщ ясӑӊӑн путӑртӆӑт. Ӆывты хӑн­ты щирн путӑртты вәнӆ­тӑты ӆавӑрта йис. Олеся Вячеславовна ай эвет па пухӑт рәт ясӑӊа кєна питтэӆ кєша 2013-мит оӆн ай киникайт хӑншӑс. Вусты па вўрты хӑрєп әмӑщ ай киникаеӊӑн «Мўӊ куртэв мир вєрӑт па рәпатайт» па «Сэ­мӑн вантум вєр», тӑта мсыева хӑншман, муй­сӑр рәпатнекӑт кәртэӆн вәӆӆӑт. Аӆпа, тӑмиты няврємӑт рәт ясӑӊӑӊа йиӆӑт.

Тӑм айӆат Ас хӑн­ты нєӊие вән нє­пекӑӊа вмаӆ пийн юхи єнмум кәртыеӆа рәпитты юхтӑс. Ӆўв яс­ӊӑӆ эвӑӆт уша йис, Тэк кәрт ӑшколайн няврє­мӑт рәт ясӊеӆ оӆӑӊмит класс вўш эвӑӆт 11-мит класс вәнта вәнӆтӑӆэӆ. Ай тёпиет 1-мит па 5-мит класс вәнта хӑнты ясӑ­ӊа Ирина Дмитриевна Енова вәнӆтӑӆ. Ай эве­та па пухӑта ясӑӊ әмӑщ вәнӆтӑты. Ӆыв хуӆы­ева рәт ясӑӊ уша вєрты ӊхӆӑт. Олеся Вячес­лавовна лупӑс: 
– Рәт ясӑӊа 5-мит па 11-мит класс вәнта няврємӑт вәнӆтуман вәӆӆум. Ма ванттємн, итәх рўщ па сӑран няв­рємӑта хӑнты ясӑӊӑн путӑртты тәса тывӆ. Эвет па пухӑт пиӆа мўӊ ар вўрн ясӑӊ вәнӆтӑӆўв.

ха моньщӑт, йис пут­рӑт ӆўӊӑтӆўв. Арсыр хӑнты мир юнтӑтн юнтӆўв. Арсыр кӑсупсэтн кӑс­ӆўв. Рәт ясӑӊ әхтыйн олимпиадая ӊхийӆӆўв. Щӑӆта интернет хўват няврємӑт кӑсты тӑхета рәпатайт китыйӆӆум. Лыпӑт єнумты тыӆӑщн Кира С. «Северное сия­ние» кӑсупсыйн оӆӑӊ тӑхия питӑс. Щи тум­пи ма ищи нємасыя учи­телят вәнӆтӑты тӑ­хета ӊхийӆӆум. Ма нә­мӑстємн, няврємӑт юӆн рәт ясӑӊӑн путӑртӆӑт ки, веӆщи ма ясӊеӆ тӑйты питӆэӆ. Щӑӆта «Северяночка» нємуп тўн­ты ёнтты тӑхи тӑй­ӆўв. Щӑта ай ёха пу­тӑртӆўв, муй иты йис­тєӆн Тэк кәртӑӊ хуятӑт тунты эвӑӆт хурамӑӊ хинтӑт, воньщпӑт па йиӊӆӑт вєрӑнтсӑт. 

Иса мўвӑтн няврєм вәнӆтӑты хӑтӆ ӆєпн тӑм каркам хӑнты нєӊа вән вўща ясӑӊ китӆум. Еӆӆы пєӆа Тэк кәртӑӊ ай тёпиет итӑ­миты вещкат нумӑсн хӑнты ясӑӊа вәнӆтӑ­ӆыйт. Нӑӊ щи вәӆӆэн, рәт ясӑӊ тӑйман мўӊ арсыр мир кўтн ӆәхия ка­риӆўв. 

Айӆат Ас нє О. Хан­дыбина хӑнты ёх хотн єнмӑс. Ӆўв ащеӆ – Вя­чеслав Васильевич Хан­дыбин – хўӆ веӆпӑсӆӑты хӑрщи ики. Ӑӊкеӆ – Ели­завета Отшамова – ар оӆ мӑр няврємӑт хӑтӆ мӑр тӑйты хотн рәпитӑс. 

Вантэ, ӆыв рәтэӆ хўв йистєӆӑн хўӆ тухӆыман ай Асн вәсӑт.