«А.А. Дунин-Горкавич шәшиум ӛш хәриет хўват» — щимӑщ вєр Нуви сӑңхум вош «Югра ыңуптӑты» тӑхи ух тәты нє А.И. Ледкова ӆэщӑтӑс.

Ям єтӑр сўс хӑтыенӑн Сўмӑтню йис кәртӑн, хута соткєм о юхы вән ух сащаң рәпатай вєрман Дунин-Горкавич хә шәшиӑс, хәум хопн Понавӑт па Ваньщавӑт ёх юхӑтсӑт.
Мўвев-йиңкев тәса артаум вән нєпекӑң хә щуртум карта вантсўв: щив хуыева йис кәртыет, пусӑт, мӑңӑт хӑншман вәӑт.  Щи тумпи Дунин-Горкавич хӑншум «Тобольский Север» киника эвӑт әмӑщ путрӑт хәӑнтсўв.
Уша вєрсўв, муй щирн 1923-мит он Сўмӑтню Юмин хӑнты кӑт хоттє ёх, Кәщта па Марпа кӑт о уват эвиян пиа па Иван па Татьяна онтпӑң няврємӑн пила, Москва воша Всесоюзной сельскохозяйственной вантупсыя тәтьясыйт.
Пӑнӑн нюки хот, вепӑс пурмӑсӑт, ана-сәна тәсӑт.
Шай яньщман, путрємуман вухаь па хӑнты ясӑңӑн кӑсупсы вєрсўв: муй щирн хў вепӑсӑты вєр вәйтўв — Понавӑт кәрт эвӑт Раиса Афанасьева нух питӑс.  
Кӑт хӑт Сўмӑтнюн вәмев мӑр хәум вєр вәс: пурмӑс ёнтты пӑты паннє па сорт сух лэщӑтсўв, шаншке сэвты вєр уша вєрсўв, воньщты яңхмевн шай яньщты тунты эвӑт щумпал вєрсўв.
Хў сух пиа рәпитты хә ёхўв па вўянтсӑт, кєшийн хӑщум хў пулыет мєт яма Анатолий Романович Туполев вошмӑс. Лын Юрий Воронов пиа тӑнӑсты па вәнсӑтн — щи вєрӑн щомӑң ёш мос.
Имиеўва па щи мурта шаншке сэвты вєр сӑма рӑхӑс: Ас кимӑн рўтьщӑты ўң хотые хуща рымтумты вәнты щи рәпитсӑт — пєңа, ищки пєы вура ӑнтәмӑт.
Алӑң па, хәт щосн нух кимємӑн — пинєңам уум хотэвн па щи шаншкеа пиа омӑсӑт. Юхи амтӑтюман етшум хурамӑң шаншкеӑт тәсӑт. 
Кимит хӑт вәнтыев валємӑты яңхсўв: вўрты воньщумут, сэвупсы, тохтӑңвә воньщсўв, тулӑх  ӑкӑтсўв, кўшмӑты ут сўмтӑт эвӑт сэӊксўв. Рат хӑр кимӑн шай яньщман, омӑсман кӑмн йис путӑр нәмӑмӑсўв, щумпал вєрсўв.
Аємӑсўв вепӑсӑты, щи такы хән! Няшах, ай супи хў, шаритум хўые єсўв.
Мєт утаң вєр, кӑт кәртӑң ёх вәйтантсўв, әхсӑңа йисўв. Юлия Петровна Гындышева (Сайнахова) па Надежда Ивановна Слинкина (Хозумова) щи эвӑт и мўвӑң нєңиеңӑн — Саранпауль эвӑт. Муй арат амӑт хән нәмӑмӑсӑн Ясунт, Щекурья сєма питум кәртыеӑн, кӑт вещкат имеңӑн мурта рәт вухаь ясңиеӑн путрємӑстӑн.
Маргарита Владимировна Туева (Юмина) тӑта, Сўмӑтнюн сєма питӑс. Щи пурайн еккара Лидия Кузьминична Ользина рәпитӑс. «Лыпєм щи мурта ям, шәшийсум ай пурайн хәхӑтюм ӛшиеам хўват, яңх-сум хот вуєма, хуыева рәтам нәмӑмӑсам, рәт мўвиемн няврємам, хиыам щомн, ям вәупсыйн ат китыйт», — путӑртӑ Маргарита.
Анна Валерьевна Кондина (Стольникова) айат оа ищи тӑта мӑнсӑт, шим хән амтӑң муй па шәкӑң вєр вәс.
Ара єумтэв епийн Роман Ругин, Юван Шесталов, Владимир Волдин хӑншум стихӑт рәт мўвев оӑңӑн ўңӑтсўв.
Хуыева юхтыум ёхўв вән пәмащипа ясӑң Валентина Дмитриевна Ирган лупӑт ям рўтьщупсэв пӑты, па нумӑс вєрўв, хән па вәйтантты питўв тӑм няр хӑншӑң сыстам кәртыевн.