Кашӑӊ оӆ етшӑты еӆпийн Югра мўв губернатор ими Наталья Комарова округ хўваттыйн айкеӑт эщӑтты ёх пиӆа вәйтантыйӆ, ән мўӊ иньщӑсты ясӑӊӆўв юхы лупты. Тӑм оӆн ищиты Ас потты тыӑщ 12-мит хӑтӑн «Югра» нємуп телерадиокомпания хотн Ёмвошӑӊ мўвевн вәӆты газета, телевидения, радива па интернет хўват айт ӆэщӑтты 50 муӆтас тӑхи ёх вәйтантупсыя ӑктӑщийсӑт. Иха ӆўӊӑтты ки, тӑта соткєм хӑннєхә вәс.

Мирхотн арсыр мосты вєрӑт оӑ­ңӑн путӑртсы. Щит округ бюджет эвӑӆт єсӑӆты вухӑт, омӑсты хо­­тӑт, вәнтӑты па ай­ат ёх вєрӑт, мӑты па лекщитты щирӑт, карты ӛш па машинайтн ңх­ты-мӑнты ӛшӑт, Мўв­тєӆ топщитты кӑсупсы, мӑта ут 2020-мит оӆн питӆ, Ёмвош округ герб посэв па па утӑт ӆэщӑт­ты оӑңӑн кәщаев эвӑт иньщӑссўв.

Арсыр вәйтантуп­сэт иты мєт ву­аң иньщӑсупсы – щит хотӑт омӑсты вєр оӑңӑн вәс. Мўӊ, «Хӑнты ясӑӊ» па «Луима сэрипос» газетайӊӑнӑн рәпитты ёх иньщӑссўв, мӑта пу­райн Сўмӑтвош район Хулимсунт вошн йи­ӆуп ӑшкола пўншӆы? Няврємӑт пӑты ӑшкола 2015-мит оӆн омӑсты питсы, 2016-мит оӆ ван хӑтӆуп тыӆӑщн ет­шуп­тӑты ӆӑӊхасы. Тәп тӑмхӑтӆ вәнты айӆат ёх катра хотн вәнӆ­тыйӆӆӑт. Югра мўв гу­бернаторэв юхӆы щи­ты ястӑс: «Хулимсунт вошн вәӆты мира ма вўнавӑт ясӊӑт лупӆум. Сўмӑтвош район кәщайт тӑм мосты вєр вантман ӑн тӑйсӑт, хотӑт омӑсты тӑхи ёх пиӆа тәса мосты пурайн ӑн путӑртсӑт. Ӛхӑт щиты тывӑс. Сў­мӑтвош район интӑм кәща арсыр кәщайт пиӆа вәйтантыйӆ па путӑртӑӆ, муй щирн тӑм ӆавӑрт вєр тўӊматты. Иха кәщайт нумса юхӑтсӑт, вух мӑты тӑхи ёх пиӆа путрємӑты, ӆәӆн ӑшкола етшӑты кєша вух вєрӑт тўӊматты. Щиты тывӆ ки, аӆпа, тӑм ванӑн Хулимсунт кәртӑӊ няврємӑт йиӆуп ӑшколайн вәнӆтыйӆты питӆӑт». 

Мосӆ ястӑты, тӑм нў­ша вєр ӑнтә тәп Ху­лимсунт хуща вәӆ, Тэк кәртӑн мєт ар оӆ юхӆы ӑшкола омӑсты питсы, камн хотӑт омӑсты тӑ­хет тӑта тәп ӑн рәпит­­сӑт, тәп тӑмхӑтӆ вән­ты Тэкӑӊ няврємӑт йи­ӆуп ӑшколая ӑн па ӆўӊ­тыйӆсӑт…

Еӆӆы йиӆуп оӆ ок­руг бюджет вух оӆӑ­ӊӑн путӑртсы. Кәща­ев ясӊӑт эвӑӆт уша йис, хуты юхи хӑщум оӆӑт иты 70 муӆтас процент арат вух мир мӑты па лекщитты, социальной щирӑта, щӑӆта няврє­мӑт па айӆат ёх вәнӆтӑ­ты вєрӑта єсӑӆӆы. 

2020-мит оӆн Ёмвошн Мўвтєӆ топщиты кӑсуп­сы вєрӆы. Тәп тӑм ва­нӑн ёх кўтэӆн путӑрт­ты питсӑт, хуты тӑм Мўвтєӆ вәйтантупсы Москва вошн ӆэщӑт­ӆы. Губернаторэв юх­ӆы лупӑс, хуты Мўвтєӆ шахматной олимпиада Ёмвошн па Москва вош­ӊӑнӑн мӑнӆ. Ёмвошн вән кӑсупсы пўншӆы. Щӑӆта мўӊ мўвевн мєт оӆӑӊӑн Паралимпиада вєрӆы. Щи тумпийн ФИДЕ нємуп тӑхи ёх Конгресса ӑктӑщийӆ­ӆӑт. Москва хон вошн ар пєлӑк топщитты кӑ­супсэт ӆэщӑтӆыйт па тӑм вән арсыр мўвӑт эвӑӆт юхтум мирӑт пӑта кӑсты хӑр лӑп тәхӑрӆы. Югра мўв кәща нє лупӑс, хуты округевн Мўвтєӆ шахматной кӑсупсы ӆэщӑтты щира иса муй мосӆ, щит вантман па тўӊматман тӑйӆы. Арсыр мўвӑт эвӑӆт мойӊа юхтум кӑсты ёх пӑты йиӆуп кәртые омӑсӆы. Щит пӑта ка­шӑӊ хӑннєхә муйсӑр нум­сӑт тӑйс, щи вєрӑт Мўвтєӆ топщитты кӑ­суп­сыйн тәса вантты рӑхӆ.

Еӆӆы Ёмвош округев тӑйты герб посэв оӆӑӊӑн путӑртсы. Россия мўв хон хуща рәпитты ге­ральдической совет ёхн ӑн єсӑӆса еӆӆы тӑйты. Щи пӑта Югра мўв кәща ёх хўв мӑр ӆыв пиӆэӆа па оса тӑхетн кӑпӑртты хуятӑт пиӆа йиӆуп пос вєр әхтыйн рәпитсӑт. Ин веӆщи йиӆуп герб геральдической тӑхи щирн ӆэщӑтсӑт. Тӑм ут Югра мўвн вәӆты ка­шӑӊ хӑннєхәя мәстӑӆ. Вантэ, йиӆуп пос ӆэщӑ­тум хуятӑт мсыева тарнӑӊ йис вўш эвӑӆт мўвев па тӑта вәӆты мир вәӆупсы вәнӆтӑсэӆ. Щи кўтн ин Югра мўв вошӑтн арсыр мир герб оӆӑӊӑн мирхотӑтн па путӑртӆӑт. Аӆпа, тӑм ва­нӑн и нумӑса юхӑтӆўв.

Щи тумпи инь­щӑссы, Ёмвошн хәнты пурайн омӑсӆы муй ӑнтә карты ӛш? Юхӆы кәщаев ястӑс, хәӆум-вет оӆа еӆӆы нєпекн Ёмвошн карты ӛрш омӑсты вєр ӑн хӑншман. Щи мӑрн па Российской Федерация ӆуваттыйн карты ӛш вєрӑт әхтыйн Ёмвошэв оӆӑӊӑн вохты нєпек вәӆ. Омӑсӆы муй ӑнтә, ӑн вәӆы. Вантэ, мўӊ вошевн тухӆӑӊ хопӑтн пәрӆяты Мўвтєӆ тӑхи вәӆ, щӑӆта карты әхӑӆн ӊхты-мӑнты ӛшев иса м, мӑта воша мосӆ, щи тӑхи вәнты кєна мӑнты рӑхӆ.