Ас потты тыӆӑщ 7-мит хӑтӆӑн Югра ремёслайт хот хуща ӑк­тупсы вәс, щит округ ӆуват «Йис ёхӆўв хурамӑӊ пурмӑсӑт: йис щирӑт па тӑмхӑтӆ пищӑт» нємпи мирхот. Тӑм ӑктупсы йис вєрӑт шавиман тӑйты оӆ пӑта па мўӊ округев 95 оӆа йиты пӑта вєрса. 

Тӑм ӑктупсыйн тыв хтум ёх па карты щўӊк мухты путӑртум хуятӑт арсыр вєрӑт оӆӑ­ӊӑн путӑр тәсӑт. Иса 22 хӑннєхә путӑр тӑйсӑт – щит мўӊ округев арсыр мўв сўӊӑт эвӑӆт па Тюмень, Пуӆӊавăт вошӊӑн эвӑӆт мир вәсӑт. Тәс ёшуп ёх, наука щира вәӆты хуятӑт па хурамӑӊ вєрӑт вєрты хӑннєхәйт путӑртсӑт, муй вўрн ӆыв рәпитӆӑт, муй йиӆуп вєрӑт ӆыв уша вєр­сӑт па муйсӑр шәкӑӊ вєрӑта ӆыв хойӆӑсӑт йис хурамӑӊ пурмӑсӑт тӑм хӑтӆӑтн вєртэӆн.
Мєт оӆӑӊ путӑр Югра ремёслайт хот кәща ими Марина Кабакова тӑйс. Ӆўв ӑкмум мирева м вўща ясӑӊ китӑс, еӆӆы па путӑртӑс, муй пӑта тӑмӑщ ӑктупсы, тӑмӑщ йиӆуп пищӑт вєрсайт, муйсӑр нумӑс еӆӆы тӑйӆӑт: 

 Йис хурамӑӊ вєрӑт оӆӑӊӑн путӑртты мўӊ мєт оӆӑӊ пўш ӑктӑщсўв. Мўӊ вєра ӆӑӊхасўв, тӑм ӑктупсэв сӑмӑӊа, ма ат мӑнӑс. Кашӑӊ хӑннєхә ӆўв вєрӆаӆ, ӆўв нумӑсӆаӆ ат путӑртӑӆ, мўӊ нумсэвн тӑм ӑктупсэв щиты ат мӑнӆ, шӑӊкап мўӊ и тўтӑӊ рат хонӑӊӑн омӑсӆўв, шӑӊ­кап мўӊ и хотӑӊ ёх, и нумӑсн вәӆты ёх, па тӑмхӑтӆ вәӆупсыйн муй вўрн еӆӆы вәӆты питӆўв, муй вўрн мўӊ хурамӑӊ пурмӑсӆўв вєрӑт еӆӆы ӆэ­щӑтӆўв, муй вєрты питӆўв, щи вєрӑт оӆӑӊӑн миева ат путӑртӆўв. Тӑмхӑтӆ тыв йис ёхӆўв хурамӑӊ вєрӑт нумӑсн вәӆты мирев ӑкум­сӑт: ма шиваӆӑсум йиӆпа тӑм вєрӑт пєӆа кєрӆум мирев, ма шиваӆӑсум щи ёх, мӑ­та хуятӆўв пиӆа ма ван кўтн арсыр вәйтан­тупсэтн вәйтантыйӆсум.
Тӑм ӑктупсэв хуӆаты пийн ёх путӑртум путрӑт, нумсӑт иха ӑкӑтӆӑӆўв па еӆӆы хурамӑӊ вєрӆўв тәты пӑта м резолюция нємуп нєпек хӑншӆўв. Па оӆ па щи нєпекев ёша вўйман вантӆэв, муй тывӑс, муй мўӊ вєрсэв, муев ӑн тывӑс па муйсӑр пӑнт хўват еӆ­ӆы шәшты. Ма щирємн, тӑмӑщ ӑктупсэт мўӊ еӆӆы па вєрты питӆўв, еӆӆы па ӑктӑщты питӆўв. Мўӊ нумсӑт тӑйӆўв, муй вўрн тӑмӑщ ӑктупсэт еӆӆы тәты. Па и вєр лупты вўтьщӑӆум, тӑта путӑртум докладӑт экспертӆўвн вантты пийн мўӊ «РИНЦ» жур­на­лăта китӆӑӆўв, щӑта па ӆыв наука ёх ӆўӊӑтты щира хӑншӆайт. Щиты тӑта ӆўӊтум докладӑт нау­ка щира мӑнӆӑт, щи­мӑщ вєр мосӆ, мӑта хуят­ӆўв аспирантурайн вәнӆ­тыйӆты каш тӑйӆӑт.

Пленарной ӑктупсыйн хәӆум хуятэв путӑр тӑйсӑт. Надежда Анатольевна Богордаева-Молданова ясӑӊ тӑйс, муй вўрн Югра хуща тӑйты йис хурамӑӊ вєрӑт па пурмӑсӑт, тә­са наука щира аӆьщӑты. Наталья Анатольевна Туч­кова йис хурамӑӊ вє­рӑт па искусство вєрӑт оӆӑ­ӊӑн путӑртӑс. Муй вўрн щитăт ӑӆ вәӆупсыйн кашӑӊ хӑтӆ тӑйӆайт па муй вўрн щи оӆӑӊӑн нау­ка мир путӑртӆӑт. Ак­са­на Александровна Бо­гордаева ӆәмӑтӆяты су­хӑт оӆӑӊӑн путӑртӑс. Пу­тӑрмаӆн ӆўв ванӆтӑсӆэ, муй вўрн йис ӆәмӑтӆяты су­хӑт тӑмхӑтӆ вєрӆайт, муй щира па еӆӆы вєрты пит­ӆайт.

Иса хәӆум секция вәс: «Традиционное на­род­ное искусство: жи­вая преемственность мастерства» (Н.А. Мол­данова тәс); «Ху­до­жественная реконст­рукция в контексте ар­хеологических и му­зейных коллекций» (О.И. Белогой тәс); «Народ­ные художественные промыслы и ремёсла в творчестве индиви­дуальных художников» (Е.П. Новьюхова тәс).

Кашӑӊ секцияйн ёх ма вәты вєрӆаӆ оӆӑӊӑн кўтӆаӆн путӑртсӑт. Пу­тӑртсӑт, муй вўрн кашӑӊ йис хурамӑӊ вєр аӆьщӑ­ты. Тӑйты нумӑсӆаӆ мир ещаӆт путӑртсӑт, муй вўрн йис щира вєрты вєрӑт ӑн вәтшӑты, щит пӑта па муйсӑр нумсӑтн еӆӆы вәӆты мосӆ па щира йис вєрӑт ӑн кєрӑтты пӑта.
Конференция хуӆам пийн резолюция нєпекн иса путрӑт ха ӆэщӑтсайт па щи нєпек пєӆа вант­ман еӆӆы йис хурамӑӊ вєрӑт тәты питӆайт. Тӑм ӑктупсыйн ма кӑӆӑс: йис вєрӑт миревн нумӑсн ма шавиман тӑйӆайт, щи вєрӑт вәнӆтӑӆыйт па йиӆпа єнумты айӆат ёх ёша еӆӆы тәты пӑта катӆуптӑӆыйт. 

Путӑр хӑншӑс: 
Пётр Молданов