Тӑм йисн нәмты питсы, муй щирн советской лащ пурайн веӆщи рәпитты оӆ­ӊитум айӆат ёх вән хуятӑт вәнӆтӑсӑт па нётсӑт. Ма щи­рємн, щит вєра вуӆаӊ па мосты вєр.

Васы мӑнты тыӆӑщ юхи хӑщум хӑтӆӑтн Ёмвошн округ мир творчества хотн хәӆмит пўш йис вәӆупсы вєрӑт еӆ тәты щира он­лайн щирн нємасыя «Наставничества ăшкола» рәпитӑс. 
Округ культура вєрӑт тәты де­партамент кәща нє Маргарита Козлова вўща вєрӑс:

- Ёмвош округ мир творчества хот рәпатнекӑт ар оӆ йис вәӆупсэв ӆавӑӆман арсыр мосты рәпатайт вєрӆӑт. Щиты округ шуши мирӑт Пўпи ӑшкола, нарӑс хӑт вєрты па юнтты ӑшкола, ариты-якты тӑхет па па тӑхет тывсӑт.

Щӑӆта кәща нє округ творчества хотн рәпитты икета Анатолия Вадичупова, Алексея Рещикова па Пётра Молданова м рәпата пӑта ишӑкты нєпекӑт мӑс. М. Коз­лова округ «Реестр объектов не­материального этнокультурного достояния» тӑхи кәща нє иты лупӑс, юхи хӑщум оӆӑтн тӑм нє­масыя ӑшколая аршӑк культура рәпатнекӑт пиӆтӑщсӑт, щи кўтн веӆщи – Приволжской федераль­ной округ культура ёх.
Ӛхӑт Россия мўвев ӆуваттыйн культура рәпатнекӑт айт тәсӑт, ху­тыса ӆыв хущеӆа йис вәӆупсы еӆӆы тәӆы. Якутск вош эвӑӆт искус­ствоведения доктор нє О. Доб­жанеская путӑртӑс, муй щирн ӆыв мўвеӆ шуши мир арӑт ӆавӑӆман тӑйӆӑт па айӆат ёх щиты ариты вәнӆтӑӆӑт. 
Москва хон вош эвӑӆт хәӆум хуят путрӑт тәсӑт. Искусствоведения доктор нє О. Пашина вәнӆтӑс, муй щирн йис арӑт, моньщӑт па па утӑт нємасыя Реестр тӑхия тәса нух хӑншты мосӆ. Ясӑӊ ӆєрамтты учёной нє Н. Котельникова рўщ мир ӑӆ путрӑт, арӑт, йис путрӑт, моньщӑт па па путрӑт ӑкӑтты вєр оӆӑӊӑн ай тәс. Ясӑӊ ӆєрамтты учёной нє В. Доб­ровольская рўщ мир хӑннєхә ша­виты вєр оӆӑӊӑн путӑртӑс.
Йис вәӆупсы ӆєрамтты хә Д. Вайман Пермской мўвн вәӆты арсыр мирӑт йис пура эвӑӆт хӑ­щум єпӆӑӊ ӆєтутӑт оӆӑӊӑн путрӑӆ ӆўӊӑтсӑӆэ.
Тӑм «Наставничества ăшкола» хуща вәнӆтыйӆты рәпатнекӑта н­ємасыя рәпатайт мӑсыйт, щирн Ас пот­ты тыӆӑщ пурайн уша йиӆ, муй щирн ӆыв щитӑт вєрсӑт. 

Путӑр хӑншӑс:  
Людмила Гурьева